Psom 89
89
Kantik pou letan dir
Instriksion Etann.
1SEGNER, mo pou touzour sant to lamour infini;
mo pou servi mo lavwa pou proklam to fidelite ar zenerasion fitir.
2Mo kone ki to lamour infini li etabli pou toultan;
ki to fidelite li eternel ek permanan kouma lesiel.
3To ti dir, “Mo finn fer enn lalians ar enn dimoun ki mo finn swazir.
Ala ki mo finn promet mo serviter David,
4‘Lor tronn pou ena toultan to desandan;
dinasti David pou dire eternelman.‘”
5Bann kreatir dan lesiel sant bann mervey ki to fer;
bann anz dan zot lasanble sant to fidelite, O SEGNER.
6Peyna personn dan lesiel ki kouma twa;
parmi bann kreatir dan lesiel peyna ki konparab ar twa.
7Tou kreatir lesiel per Bondie;
zot tou respe Bondie ki redoutab.
8SEGNER Bondie Toupwisan,
personn peyna lafors kouma twa;
to fidelite li toultan prezan, O SEGNER.
9Se twa ki kontrol losean pwisan
e zis twa ki kapav kalme lakoler bann vag.
10Se twa ki ti kraz latet Raab#89:10 Dapre vie zistwar babilonien Raab enn mons losean ki reprezant dezord ek lemal kouma enn karkas;
se to lafors san born ki ti fer to ennmi manz lapousier.
11Lesiel pou twa, later osi li pou twa;
lemond e tou seki ena ladan - twa ki finn kree zot.
12To finn kree lenor, to finn kree lesid;
Montagn Tabor ek Ermon sant to grander dan lazwa.
13To pouvwar li bien gran,
to lafors li san limit.
14To rwayom finn konstrir lor drwatir ek lazistis;
lamour ek fidelite prezan dan tou seki to fer.
15Bienere bann ki priye twa ar zoli sante;
bann ki viv dan lalimier to prezans, SEGNER.
16Grasa twa zot viv lazwa toutlazourne,
e zot redrese dan louanz akoz to lazistis.
17Tomem ki donn zot laglwar par to pwisans;
grasa to bonte ek to lamour nou finn gagn laviktwar.
18O SEGNER, to finn swazir nou protekter;
Bondie ki Sin ki Izrael adore, nou lerwa depann lor twa.
19Dan enn vizion to ti dir bann profet
“Mo finn donn pouvwar enn zom for;
parmi lepep mo finn swazir enn lerwa.
20Mo finn met mo serviter David lor tronn
e mo finn beni so latet ar delwil sakre.
21Lafors mo lame pou toultan akonpagn li,
pouvwar mo lebra pou rann li bien for.
22So ennmi pa pou ena viktwar lor li;
move dimoun pa pou kapav imilie li.
23Mo pou kraz so ennmi
e detrir bann ki deteste li.
24Mo fidelite ek mo lamour infini pou avek li,
me plis ki sa, li pou toultan sorti vinker akoz mo nom.
25Lotorite so lame pou lor bann lamer,
lotorite so lame drwat pou lor tou larivier.
26Li pou dir mwa, ‘Tomem mo Papa,
mo Bondie, mo protekter ek mo Sover.’
27Mo pou fer li vinn mo premie-garson,
pli gran parmi bann pli gran lerwa.
28Mo pou toultan fidel anver li;
mo pou respekte mo lalians ar li.
29So dinasti pou dire osi lontan ki ena lesiel;
so desandan pou toultan asiz lor tronn.
30Me si so desandan dezobeyir mo lalwa;
si zot abandonn mo instriksion;
31si zot bliye mo lansegnman
e pa respe mo bann komandman,
32lerla mo pou fer zot peye pou zot pese.
Mo pou fer zot soufer pou ditor ki zot finn fer.
33Pa krwar ki mo pou aret kontan David;
ki mo pou kas promes mo fidelite.
34Non! Mo pa pou renie mo lalians ar li;
Mo pa pou rezet okenn promes ki mo finn fer ar li.
35Promes ki mo finn fer li, lor mo nom sakre,
zame mo pou fer fos ar David.
36So tronn pou toultan ena eritie;
mo pou vey so rwayom tanki soley briye;
37tanki ena lalinn, touzour la, solid,
enn temwin permanan dan lesiel.”
38Me to ankoler ar lerwa ki to finn swazir;
to finn abandonn li, to finn les li tonbe.
39To finn kas lalians ar to serviter lwayal
e to finn zet so kouronn dan labou.
40Miray so lavil finn grene;
sitadel ek fortres anrwinn.
41Bann pasan pe depouy li;
so bann vwazin pe sikann li.
42So ennmi pe triyonfe;
bann adverser dan lazwa.
43Zarm nou lerwa konpletman initil;
to pe les li perdi lager.
44To finn ras sinbol so pouvwar
e so tronn finn devir anbalao lor later.
45To finn fer li vinn vie avan so ler
e to finn kouver li ar laont.
46SEGNER, to pou kontinie get lot kote? Pou touzour?
To pou les to lakoler kontinie flanbe mem?
47Rapel ki mo lavi bien kourt;
To finn kree nou mortel pou nannye ditou.
48Ki dimoun kapav viv san ki li trouv lamor?
Ki dimoun kapav sap dan grif lamor?
49Segner, kot to finn met lamour infini ki to ti ena?
Kot to finn met bann promes to ti fer David?
50Rapel, Segner, mwa to serviter fidel, mo gagn bann insilt;
tou bann lezot nasion modi mwa.
51To ennmi insilte lerwa ki twa to finn swazir, SEGNER.
Partou kot li pase li gagn zot insilt.
52Anou loue LESEGNER pou toultan!
Amenn! Amenn!
Currently Selected:
Psom 89: KMOTPOR
Highlight
Copy
Compare
Share
Want to have your highlights saved across all your devices? Sign up or sign in
Kreol Morisien OT Portions © Bible Society of Mauritius, 2020.
