Psom 88
88
Osekour, Segner Bondie!
Enn sante. Instriksion Emann. Enn Psom ki sorti dan fraternite Kore. Pou sef koral, zwe dan enn fason melankolik.
1SEGNER Bondie, mo Sover,
toutlazourne mo kriy osekour;
toutlanwit mo priye twa.
2Ekout mo lapriyer ki devan twa,
tann mwa kriye osekour.
3Traka pe ranpli mo lavi;
lamor pe koste kot mwa.
4Mo lor lalis bann ki ena enn lipie dan tom,
mo parey enn dimoun ki nepli ena lafors.
5Mo koumadir kikenn ki finn abandone dan rwayom lamor;
mo kouma bann solda mor ki finn zet dan fose,
kouma kikenn ki to finn bliye net,
ki to finn koupe net ar zot.
6To finn rezet mwa dan fon trou lamor,
dan finfon marenwar.
7To lakoler pez lour lor mwa,
kouma gro-gro vag li kraz mwa.
8To finn fer mo bann kamwad abandonn mwa;
aster zot get mwa ar degou.
Miray otour mwa, mo peyna sime sorti;
9soufrans ek larm finn febli mo lizie.
SEGNER, toulezour mo sipliy twa;
mo lev lame ver twa pou dimann led.
10Eski to fer mirak pou dimoun mor?
Eski dimoun mor leve pou sant to louanz?
11Eski dan tom, kadav koz lor to lamour infini?
Eski dan landrwa destriksion, lamor koz lor to fidelite?
12Eski dan nik marenwar to mirak vizib?
Eski dan lemond san memwar to bonte reyone?
13SEGNER, mo pe dimann twa ed mwa;
toulegramatin mo sipliy twa.
14Kifer to bous to zorey?
Kifer to get lot kote?
15Depi mo zanfan mo pe soufer;
souvan mo pas pre ar lamor;
mo finn sibir laterer ki to inpoze,
mo dan dezespwar.
16Dife to lakoler kraz mwa;
to violans fini mwa.
17Toutlazourne zot bar mwa partou kouma debordman;
lor tou kote zot fons lor mwa san pitie.
18Mo bann meyer kamwad finn fini abandonn mwa;
zis marenwar epe ki koste ar mwa.
Currently Selected:
Psom 88: KMOTPOR
Highlight
Copy
Compare
Share
Want to have your highlights saved across all your devices? Sign up or sign in
Kreol Morisien OT Portions © Bible Society of Mauritius, 2020.
