Psom 148
148
Liniver net selebre Bondie
1Alelouya!
Loue LESEGNER depi lesiel,
loue li, depi lao laba dan oter.
2Loue li, zot ki so bann anz;
loue li, so larme divinn.
3Soley ek lalinn, zot bizin loue li!
Bann zetwal ki briye, zot bizin loue li!
4Bann lesiel pli lao ki lesiel,
bann dilo pli lao ki lesiel,
zot bizin loue li!
5Zot tou ansam, sant laglwar LESEGNER,
parski li ti koz enn parol e li ti kree zot;
6dapre so volonte zot ena zot plas permanan dan lespas
e zot pakapav al andeor lalwa ki li finn fixe.
7Loue LESEGNER depi lor later,
zot bann mons dan lamer,
tou seki dan profonder losean,
8mem zekler ek lagrel, lanez ek brouyar,
rafal siklonik ki ekzekit so lord, loue li!
9Kolinn ek montagn,
pie verze ek pie lafore,
10zanimo domestik ek zanimo sovaz,
reptil ek zwazo, zot bizin loue li!
11Bann lerwa lor later ek tou bann pep,
prins ek dirizan, zot bizin loue li!
12E zot ousi, bann zennfi ek zennzan,
grandimoun ansam ek zanfan.
13Zot tou zot bizin sant grander LESEGNER!
So nom tousel pli gran ki tou;
so laglwar pli gran ki tou, li dominn later ek lesiel.
14Li finn fer so pep vinn for;
aster so bann fidel sant so laglwar;
lepep Izrael, zotmem ki pre ar so leker.
Alelouya, nou loue LESEGNER!
Currently Selected:
Psom 148: KMOTPOR
Highlight
Copy
Compare
Share
Want to have your highlights saved across all your devices? Sign up or sign in
Kreol Morisien OT Portions © Bible Society of Mauritius, 2020.
