Psom 147
147
Laglwar Bondie Toupwisan
1Alelouya!
Ala li zoli la kan nou sant louanz nou Bondie;
li pa zis zoli, li merite ki nou sant enn kantik louanz.
2LESEGNER pe donn Zerizalem enn nouvo lavi;
bann exile Izrael pe retourn zot lakaz.
3Li geri zot leker brize,
li met pansman lor zot blesir.
4Li finn deside komie zetwal pou ena dan lesiel,
e anplis, li finn donn sak zetwal enn nom.
5LESEGNER li gran ek pwisan;
so sazes pena limit.
6Li relev bann feb ki finn kraze;
me li zet bann move dimounn anba dan lapousier.
7Anou sant kantik pou loue LESEGNER;
nou akonpagn nou sante ar sitar klasik.
8Li fann niaz partou dan lesiel;
li prepar lapli pou aroz later
e li fer lerb pouse partou.
9Li donn tou zanimo manze;
li fer parey pou ti korbo kan zot reklam nouritir.
10Li pa donn gran valer lafors enn seval,
e li pena okenn lintere dan vites enn atlet.
11Li prefer bann ki onor li,
bann ki fer konfians so lamour infini.
12Glorifie LESEGNER, O Zerizalem!
Loue to Bondie, O Sion!
13Li ranforsi sekirite bann laport lantouraz lavil;
li beni pep ki viv dan lavil-la.
14Li vey sekirite frontier pei pou ki ena lape,
e li donn lasirans enn bon rekolt.
15Li avoy so lord lor later
e so parol toutswit galoup ver so destinasion.
16Limem ki fann lanez kouma enn tapi
e aroz glason rape partou parey kouma lasann.
17Li fer lagrel grene kouma gravie;
kisann-la kapav tini kont sa freser-la?
18Li donn lord e lanez fonn;
li avoy divan e dilo koule partou.
19Li fer Zakob konn so parol,
li dikte so regleman e donn so komannman lepep Izrael.
20Li pa finn azir parey koumsa anver lezot nasion;
bann-la pa konn lalwa Bondie.
Alelouya, nou loue LESEGNER!
Currently Selected:
Psom 147: KMNT
Highlight
Copy
Compare
Share
Want to have your highlights saved across all your devices? Sign up or sign in
Nouvo Testaman Kreol Morisien Harmonisation NTPS KM © Bible Society of Mauritius, 2021.
