Psom 135
135
Lesegner Bondie, tomem pli gran
1Alelouya!
Loue nom LESEGNER!
Zot tou, serviter LESEGNER, sant so louanz,
2zot ki debout dan lakaz LESEGNER,
dan lakour Tanp nou Bondie.
3Nou selebre LESEGNER parski li bon;
nou sant louanz LESEGNER parski li zenere.
4Li ti swazir Zakob pou limem;
pep Izrael kouma so prop trezor.
5Mo kone ki LESEGNER li gran;
pli gran ki tou lezot bondie.
6Li kapav fer tou seki li anvi
dan lesiel ek lor later,
lor lamer ek dan profonder losean.
7Li ris niaz siklonn depi finfon later;
li lans zekler pou alim tanpet lapli;
li larg rafal depi so prop rezerv.
8Dan Lezip li ti touy bann premie ne,
premie ne dimounn kouma zanimo.
9Laba li ti fer mirak ek prodiz
kont Faraon ek so bann minis.
10Li ti detrir plizier nasion
e li ti touy plizier lerwa pwisan:
11Sihon, lerwa Amorit,
Og, lerwa Basann,
e tou bann lerwa dan Kanaan.
12Li ti pran zot later pou li donn so pep,
ti donn posesion zot later lepep Izrael.
13SEGNER, to pou renome pou touletan;
zenerasion apre zenerasion nou pou rapel sa.
14LESEGNER pou fer lazistis pou so pep;
li pou ena konpasion pou so bann serviter.
15Bann tribi priye bann idol fabrike ar lor ek larzan;
lame imin ki donn zot form.
16Zot ena labous me zot pa kapav koze;
zot ena lizie me zot pa trouv kler.
17Zot ena zorey me zot pa tande;
zot mem pa ena lesouf ki sorti dan zot labous.
18Bann artizan ki fabrik idol,
bann ki finn met zot konfians dan idol,
pou vinn parey kouma zot.
19Anou loue LESEGNER, pep Izrael!
Loue li, zot ki bann pret Bondie!
20Zot bann Levit, loue LESEGNER;
zot ki ador li, sant so grander!
21Loue LESEGNER ki lor montagn Sion,
lamem kot li reste, dan Zerizalem.
Alelouya, nou sant louanz LESEGNER!
Currently Selected:
Psom 135: KMNT
Highlight
Copy
Compare
Share
Want to have your highlights saved across all your devices? Sign up or sign in
Nouvo Testaman Kreol Morisien Harmonisation NTPS KM © Bible Society of Mauritius, 2021.
