Irm 13
13
Entoning lelo ooitoreisho
1Entoning pooki tung'ani oitoreisho. Amu meetae enkitoria neme Enkai eing'uaa, ore lelo ooatae naa Enkai naitasheyie. 2Neaku ore ake oloibooyo enkitoria te ngogong'i ina naa Enkai naitasheyie, ore lelo ooibooyo te ngogong'i naa ate eyaki enkiguana. 3Amu meiture laitoriak oltung'ani lo lkuaak supat, kake eiture olo ltorrono. Iyieu iyie nimiaata enkuretisho te ilo oitoreisho? Taasa naa isupati, naa itum errepet te ninye. 4Amu osinka le Nkai ninye likiyaki isupati. Kake ore ake pee ias intorrok, tureisho, amu menapita ninye olalem pesho; osinka le Nkai ninye oitabaiki engoro enye ilo oas intorrok. 5Ore enkaraki ina entoning naa, neme enkaraki ake naa iurere engoro e Nkai kake te nkaraki oltoilo lo ltau. 6#Mat 22.21; Mk 12.17; Lk 20.25 Naa enkaraki ake ina sii pee ilakilaka kodi, amu ore lelo ooitoreisho naa laisiaayiak le Nkai ooirrita ina bae. 7Enchoo lelo pooki nena naairirikino ninche, enchoo kodi ilooishori kodi, ninchosho esotore lelo le sotore, entureita ninchosho enkanyit lelo ooiririkino enkanyit.
Enyorrata oo lalashera
8Emiaatayie esile oltung'ani hoo obo, ae neme ene nyorrata maate; amu ore ilo onyor ole latia enye neitabayie nkitanapat. 9#Ena 20.13-15,17; Enkig 5.17-19,21; Ilaw 19.18 Ore nena kitanapat naajo, “Miloloito, miaar metua, mipurrisho, ming'uar” o kulie ake kitanapat, naa kulo rorei ooitululung. “Tonyorra ole latia ino anaa eninyor kewan.” 10Meitaas enyorrata ole latia entorrono; enkaraki ina paa enyorrata enkitabaroto oo nkitanapat.
Etinyikua enkolong e Kristo
11Ore etii nena niyiololo sii aajo kaa saa ena nchere etabawua tukul enkata pee iputunyenye aaing'uaa injo. Amu taata etataanikia iyiook enjeunoto alang enapa kata pee kinteru aairuk; 12etinyikayie enkewarie, etaa ekenyu. Ematuburukushu#13.12 Matuburukushu ematushurtu aaiturraa naa isiaaitin e naimin emaishopo masaa e wang'an; 13emaitobirai ate anaa loopuo dama, neme te sikar o te merai, neme te malmalisho oo ng'uarrat torrok, neme too nkitarrikinot o to lom. 14Kake enchopo Olaitoriani Yesu Kristo, naa emintoki ake aaisho osesen erishata, metaa nena ake naayieu intabayaya.
Currently Selected:
Irm 13: SINYATI
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2020
©Bible Society of Tanzania, 2020
