ROMA 2
2
Sakwasleemár Mungú
1Gawaá adoorihe kuúng bar múk hatlá' sakwasleemút, kuúng tam heemahe, kuúng gár ta tlank i káhh. Qoomár kuúng bar múk hatlá' sakwasleemút, a kuúng tin kilók sakwasleemút. Asma kuúng muruú ta tlehhit a kuduú kilá' ta sakwasleemut. 2Kuungá' a kata', «Atén a xuaán, sakwasleemár Mungú dír múk tlehhmi'iiká tlehhiita a sakwasleemár ganaa'. 3Mulqumooeé', kuúng múk tlehhmi'iiká' gi tlehhahhiít un sakwasleemút. Ala kuúnguú kilá' baré tlehhmi'iiká' in tlehhaahhít. Kuúng ka xu', sakwasleemár Mungú awa góba'? 4Laqaá kuúng hhooeemaá Mungú kudá' yaariir nee qiqtliingós nee daamaaraangós, in waqaaqá'a? A xu'ukáhe adór hhooeemaá Mungú kuúng ur uuruxuná' as tawa hhu'u'uun? 5Ala kuúng muunaáwók kwisíng gawide nee oo hhu'uu'úngw sla'aakahe xarasleemaá Mungú in gawaawók i tlahhmís ay bál sakwasleemár Mungú, baldá' sakwasleemár Mungú ar ganaa' bar kinga geehhooeés. 6Asma baalaadae Mungú umuúqo heewo gu buu' ar hariímár tlehhmi'iiwós. 7Kudá' xirif nee ilaiwa/ame nee hhitiru'uuma wasle nga leelehhiitiye' ar qiqtliingw baraá tlehhma'aá hhoe, Mungú gi slafíngw alhhe'eesay wáslí haniis. 8Ala awa hatlá' a múk qahuuse nee kudá' looeema ngaa si'iye' as muruú tlákw nguwa eeharahariya', Mungú buhhtaawós nee xarasleemaawós ga ku'uus gawaá múk adoorí. 9Muu sleémeero oo tlakweemaá tlehhaahhiít, gusisiingw nee slahh'amaayeero ngi slayá'. Múk giiriím oo Yahudi, ala tam múk Yunani sleeme. 10Ala mukdá' sleémeero hhooeemaá tlehhahhiít, Mungú inooín gin xirfuú i haniis, nee ilaiwa/ame nee wayda. Múk giiriím oo Yahudi, ala tam múk Yunani sleeme. 11Asma Mungú i barqaantusiiká.
12Mukdá' sleémeero hara'ayár Mose ga xuaaká, ala tlakweema kay tleéhh, inooín ki sakwasleemuut, tam hara'aya ka xuiikahe. Mukdá' hara'ayár Mose ga xuú', ala tlakweema kiri tleéhh, inooín ki sakwasleemuut ar hara'ayaadá'. 13Asma múk ta gan'amuú i harafaari nee Mungú, a ooanaaká an kudá' hara'aya gaa axaas, ala múk ta gan'amuú i harafaari, an kudá' adoodá' hara'aya i kat ga tlehhiít. 14Asma tam xoordaá hatlá', kudá' hara'ayár Mose ngi kooma'aaká, inooín baraá tlehhmi'ii'ine gár ta tleehhi a tidá' hara'ayár Mose i kat. 15Slafingw'ín ga laqaaqán adór muruudá' hara'aya i kat kura baraá muner'íní gooín. Asma tam muner'ín nee inslaway'ín adoorí ngi laqaaqaná'. Asma inslaway'ín oo kilá' inooín gin sakwasleemuut, laqaá gin aleekal/án. 16Adoorí an adoodá' tleehharuut bál Mungú bar lu/aaroó baraá munér muu gu sakwasleemuut ar baraá Yesu Kristo. Gaarí an adoodá' Ya/abtór hho' i kat, tidá' aníng ni alki/iit.
Múk Yahudi nee hara'aya
17Xáy kuúng a adoomá? Kuúng a daara/aán asma tawa heé Yahudi. Kuúng gár ta i tliintí' a hara'ayár Mose. Nee slám kuúng an daara/aán tawa kat, «Aníng a heé Mungú.» 18Kuúng taa intsaahhatimís hara'ayár Mosewo. Gawaá adoorihe gár Mungú i slai aga tsáhh, nee muruú tlákw nee oo hhoe tsaahharo u aleesleér. 19Kuúng ti kilók xú', adór tar geeraharusmoó taampu, nee gwa/aateemaá múk baraá giwtír i dirií', 20geeraharusmoó múk gár xuaaká, nee intsaahhatusmoó na/aá ninakw, asma kuúng xu'uti sleémeero nee looeemaawo i koón baraá hara'ayár Mosewo. 21Kuúnguudá' múk hatlá' intsaahhatimisuú wa slaá', ahaá kuúng mis ti kilók intsaahhatimisaká? Kuúnguudá' múk hatlá' i dahareemiís tawa kat, «Gár hee ma fiisaar,» ahaá ala kuúnguú kilá' mas fisisiín? 22Kuúnguudá' káh, «Ma fuquusaar,» ala kuúnguú kilá' baré a fuqús? Kuúnguudá' munguaá hatlá' waaqaqaá', ahaá ala kuúnguú kilá' mas fisisiín baraá maray'ín wa ale. 23Kuúnguudá' hara'ayár Mose gar waahhamiím, ahaá ala kuúnguú kilá' mas Munguú waaqaaqá' ar hara'ayaadá' kawa eeharahatká? 24Asma Gooi i kat, «Umuú Mungú ku waaqaaqaa' nee múk xoordaá hatlá' as kuungá'.»
25Kuúng barnaxes hara'ayár Mose aga iialooés, daqaní al/utloorók i gaa bú'. Ala kuúng barnaxes hara'ayár Mose aga sí', daqaní al/utloorók i gaa bu'uká. 26Heé xoorór hatlá' oo taa al/utliiká, inós barnaxes hara'aya gaa eehár, kwí ku harafaáriíke tawa adór heé taa al/uútl, inós tam kwaa al/utliikahe. 27Gawaá adoorihe kuúng heé Yahudi tu sakwasleemuut nee múk xoordaá hatlá'. Asma kuúng hara'aya tam a koonda baraá gooiro, nee kuúng tam taa al/utli, ala kuúng hara'aya a eeharahatká. Ala inooín hara'aya ka iialooeemiis, inooín tam kaa al/utliniikahe. 28Asma hee barnaxes a heé Yahudi baraá muruú tlehhma'aá slaqwa kilós, inós a heé Yahudír kil'eeká. Slám al/utlór taa tleéhh gawaá slaqwa, a al/utlór kil'eeká. 29Ala heé Yahudi oo kilá', an kudá' Yahudi'iimarós baraá muunií dirii'. Nee al/utlór kilá' a tidár muuná kuwa al/utli. Al/utloorí kan tleehh nee Qeeruú hhoohhoó' oo Mungú, slám ka tleehhiiká nee hara'aya. Heé adoorí xirfuuwós amór i dahhi a amór mukooká, ala a amór Mungú.
Currently Selected:
ROMA 2: IRQW
Highlight
Copy
Compare
Share
Want to have your highlights saved across all your devices? Sign up or sign in
The Bible in Iraqw © Bible Society of Tanzania, 2004.
