ROMA 1
1
1Anuú Paulo barwaárí ngina gooiím. Aníng a lawaalmoó Kristo Yesu, tina ateét tawa ya/abusmo, nee tiri tsawaár as Ya/abtór hho' ar Mungú ngiwa alki/iit.
2Ya/abtoorí hho' Mungú aa al'axweés iimír aáng wa ale ar afér aaruuse, kaa gooín baraá Gooír hhohho'. 3Ya/abtoorí a kángw Garmaawós, Aakoorén Yesu Kristo. Inós an hee, nee tlahhaywós oo baraakaá yaamu a tlahhoó Daudi. 4Slám inós ku hhoohhoó' adór Mungú wa ale, asma inós an Garmoó Mungú. Gaarí kaa laqán qoomár inós kuwa waasle/atís baraá múk aa qaátl wa ale. 5Mungú aníng ina tsuuqaá i haniís niwa ya/abusmo tleehhiit as Kristo. Adoorí gana tleéhh ar loohír Kristo, as aníng xoordu sleémeero ngiwa geerahaar amoorós, as nguwa haratlintii'iya', nee nguwa iialooeemisiya'. 6Baraá tla/angw'ine kuungá' sleeme a deer, kuungaásingá' taa ateét as tawa múk Yesu Kristo.
7Barwaárí ngina gooiím amorhúng i alé, kuungaásingá' baraá gixsár Roma, kuungaásingá' sleémeero awa taa slaá' nee Mungú, nee tunduri ateét tawa múk hhohhó' oo Mungú.
Mungú Baabuúrén nee Aakoorén Yesu Kristo kuungá' nu tsuuqi nee nu waydií haniisi.
Firór ilahhooa
8Gár har geera a Munguúeé' un sluufmiís ar baraá Yesu Kristo as kuungá' sleémeero. Asma umuúqo diiro baraá yaamu sleémeerowo haratlintaaorhúng ka alki/iit. 9Asma Mungú kwí án ni sagadiyuus ar muunaáeé', Ya/abtoorí hho' ar Garmaawós ngiwa alki/iít, inós a lamabu'usmooeé' adór kuungá' nur inslasláw baraá firooro umuúqo daqto, ga xuu' adór kuungá' án nur aleefiririím umuúqo daqto. 10Án Mungú un fiririím umuúqo daqto hardahamuú amorhúng nguwa aleeslaw barnaxes a sla'aarír Mungú. 11Asma án kuungá' nu ló'wa artá wa slaá', as tsuuqaá Qeeru ngiwa haniis as kuungá' /uuru kuwa sleera' baraá haratlintaaooro. 12Gár ni kah an tí, «Gár ni slaa' masók tin gurkwa/amisaán, aníng /uuru nguwa slaw ar haratlintaaorhúng, nee kuungá' /uuru kuwa sleera' ar haratlintaaor'eé'.»
13Hhaee'eé', gár án dirhunge ni xu'utisár wa slaa' a tí, aníng aga slaá' daqtá yaariire niwa amorhúng i hardah. Ala taa il/án tam ay hamí. Gár nisa daqeemuú slaá' amorhúng as kahhó' múk ni amór Yesu i huuw nguwa slaw dirhunge, adoodá' muu ngura sláw dír múk xoordaá hatlá' sleémeerowo. 14Aníng ti iinuus nee múk Yunani, tam múk Yunanirooká sleeme. Aníng ti iinuus nee múk sagalooár koóm, nee kuduú daktana sleeme. 15Gawaá adoorihe aníng a ló'wa slaá' Ya/abtór hho' ngiwa alki/iit dirhunge sleeme, kuungaásingá' baraá gixsár Romár hootá'.
/Uuruú Ya/abtór hho'
16Aníng Ya/abtór hho' a murér wa ara'araaká. Asma Ya/abtór hho' an /uuruú Mungú kudá' ba/amár huwahuúw dír umuúqo heé aa haratlintii'i, har geeraawo a dír heé Yahudi, nee tam dír heé Yunani sleeme. 17Asma baraá Ya/abtór hhoe loohír Mungú kaa geehhooatís ar hee nguwa gan'amií harafaari as haratlintaao. Nee loohirí i haratlintaaór huwaahúp sleeme. Asma Gooi i kat, «Heé gan'amuú koóm gár ir slafi a haratlintaao.»
Tlakweemaá muu
18Asma Mungú xarasleemaawós gina geehhooatís gawaá doorí wa ale daanduú múk tlakuuse nee oo aa dee/aanuut, kudá' looeema gaa sii' ar tlakweemaaín. 19Mungú mukwí gár ngusa i xaraásl, a muruuduú Mungú ina xu'utiít dir'ine. Asma Mungú muruudá' gwa qaroó dir'ín i geehhooatís. 20Aleesleemuú Mungú oo alhhe'eesay wásl, nee munguiimarós, muruuwí hee gu ariiká ilaawo. Ala tam adoorihe muruuwí aa geehhooúy iimír Mungú yaamu ngiwa tleéhh. Asma tlehhemi'iiwós kudá' aa tleéhh muruuwí ngwa laqaaqané'. Gawaá adoorihe gár tar tlaanki i káhh. 21Inooín tam Mungú ngwa tsaahhi'i, ala inooín ngwa xirfayeesi'iiká tawa Mungú, nee slám ngwa sluufmiisi'iiká. Ala inslaway'ín iri daktu'uút, nee muner'ín tidá' sagalooár koomaaká iri ak gíp. 22Inooín ta kaahi, «Atén a sagalooár koomaán,» ala laatí inooín tari daktu'uút. 23Inooín Munguúduú slafíngw alhhe'eesay wásl koóm kwaa xirfayeemisiiká. Ala gár inooín taa xirfayeemiís a munguiidá' taa tleéhh ar slaqsa'aá múk qaátl nee awa tsir/o, nee awa makaay, nee awa makaydá' ya'a' waslen.
24Gawaá adoorihe Mungú inooín giri máy, as muruudá' slasla/arén oo ta slai baraá muner'ine nguwa tleehhiya'. Nee tam inooíná kilá' slaqooín ngiri mureekeemisiyé'. 25Asma inooín looeemaá Mungú ngina warqeesiyé' ar lama. Inooín gadaádá' taa tleéhh nee Mungú, kan ilaiwawaa/, nee kari xirfayeemiis, ala Mungú inósuú kilá', kuduú Tleehharusmo, kwaa xirfayeesiiká. Inós an kudá' ta xirfayeemisi ay alhhe'eesay wasle. Amin.
26Gawaá adoorihe Mungú inooín giri máy, as ilatleerir'ín ar mure wasl kawa eehari. Tam /ameena tlehhmuuín kudá' hariím, tawa alhooti nee hhawaate, guri warqés. /Ameena iri fuqús nee /ameena. 27Hhawaate sleeme tlehhmuuín kudá' hariím, tawa alhooti nee hare, kuri máy, tiri kilooín ló'wa ilatleeruusiyé'. Hhawaata iri hhawaatuú hatlá' ló'wa ilatleeruús. Hhawaata tlehhma'aá hariima'aaká, awa murér koomá', giri tlehhiít dír hhawaatuú hatlá'. Bu'utuudá' inooín wa hariím as tlehhmuuín kuduú qwanaay, kuri gawaá slaqooín wa sláy.
28Inooín xu'utidár Mungú kuwa xui, kaa gaárí xuiiká. Gawaá adoorihe Mungú sleeme inooín giri máy baraá inslaway'ín kudá' aa hhitiruut, as muruudá' hariimaaká kuwa tleehhi. 29Inooín tari haáts daa'aweemaá tlakweemaawo, ilatleerír peésa, nee hheehha nee tsaatu'uuma. Tari haáts da/ito, nee tsu/uta nee gila, nee al/ayma nee fola. Tari kaantín, 30tari /ayseenaá tlaáq, Mungú kuri aáhh. Inooín tari fahharuumiít, nee daara/uuse, nee múk ti kilooín xirfayeemiís, múk lohdaá tlehhma'aá tlákw leelehhiít, múk xwaylitér'ín iialooeemisaaká, 31tari daktu'uút múk inkihhimuú koomaaká, múk muk'ín gu sla'aaká, nee múk gurtleemuú koomaaká. 32Mukwí sakwasleemár ganaa' ar Mungú ga ló'wa xuu', adór heé muruuwí gu tlehhahhiít, gár kus hariím tar gwa'ara. Ala tam adoorihe inooín muruuwí ku tlehhiit. Nee gár ak tlaakw a tí, inooín mukdá' muruuwí gu tlehhiít ku aleeya/aa/án sleeme.
Currently Selected:
ROMA 1: IRQW
Highlight
Copy
Compare
Share
Want to have your highlights saved across all your devices? Sign up or sign in
The Bible in Iraqw © Bible Society of Tanzania, 2004.
