ROMA 10
10
1Hhaee'eé', aníng gár ni slaa' ar muunaáeé' sleémeero, nee gár ni fiririim dír Munguhe, as inooín, a masók inooín kin ba/amis. 2Asma aníng a lamabu'uúm adór inooín ilakaaharu ngur ló'wa koná' as Mungú, ala xu'uti ngi kona'aaká. 3Asma inooín gan'amuuduú amór Mungú daáhh ngu xuiaaká. Inooín gan'amuuín ngun kilooín leelehhiitiyá'. Gawaá adoorihe inooín taa qaasi'iiká baraá gan'amuuduú amór Mungú daáhh. 4Asma Kristo hara'aya gan boo/eemiis, as kahhó' umuúqo heewo oo gwa haratlintii' kuwa gan'amií harafaari.
Ba/amár muu sleémeero
5Asma Mose ina gooín daanduú gan'amuudá' ta slaslay ar hara'aya kawa eeharahari, iri oó', «Heé adoodá' hara'aya i kat ga tlehhiít, inós i hoot ar adoodá'.» 6Ala gan'amuudá' ta slaslay ar haratlintaao, gár i kaahi a tí, «Kuúng ma baraá muunaáwógí kaahaar, ‹Heé gawaá doorí tsa/ám a heemá?› » (Gídaabárós Kristo kunguwa baraá yaamií huwi.) 7«Laqaá ma kaahaar, ‹Heé aweér amór múk aa qaátl i alé a heemá?› » (Gídaabárós a Kristo kunguwa gáwtí huwi baraá múk aa qaátl wa ale.) 8Ala gan'amuudá' gár i kaahi an tí, «Axweesani ka dirók i tseew, i gawaá afkók, slám i baraá muunaáwók.» Axweesantí an axweesantadár haratlintaao, tidá' atén ta alki/iitaan. 9Asma kuúng Yesu bura ya/aán ar afkók, adór inós tar Aako, nee bara haratlintí' ar muunaáwók adór inós Mungú ngura waasle/atís baraá múk aa qaátl wa ale, daqaní kuúng a ba/aán. 10Asma hee in haratlintaatii' ar muuná, tam kuri gan'amuú i harafaar dír geeraá Munguhe, nee afkose iri ya/án tam ba/ama gari sláy. 11Asma Gooi i kat, «Heé inós gwa haratlintii' ku mureekeesiiká.» 12Asma baraá kaangwihe gár dimbé i káhh dír heé Yahudi nee dír heé Yunaniro. Asma sleémeero Aakooín a wak. Nee hhooeemaawós i bu'uutiyá' dír umuúqo heé inós gu ateetima. 13Asma Gooi i kat, «Umuúqo heewo kudá' umuú Aako gu ateetiím i ba/án.»
14Ala adór kur ateeti kudaádá' inooín ta haratlintati'iiká. Nee slám adór kur haratlintii'i kudaádá' kangós inooín taa axaasiiká. Nee kangós adór kur axaasi, bar heé gu alki/iít i kaahh. 15Nee slám hee adór ngur alki/iiti burkwa ya/aawiiká. Asma Gooi i kat, «Mukdá' Ya/abtór hho' alki/iít hardahamuuín ku slaa' ló'wa ale.» 16Ala a mukdá' sleémeerowooká oo Ya/abtoodá' gaa iialooees. Asma Isaya i kaahi, «Aáko, ya/abtoodá' inooín naa axaasiyé' dirén wa ale, heé gaa haratlintii' a heemá?» 17Gawaá adoorihe gár haratlintaaór huwahuuw, a Ya/abtoodá' taa axaás, nee Ya/abtoodá' baraá axweesantá Kristo gan dáhh.
18Ala aníng an yaahaás niwa kah, «Inooín Ya/abtoodá' kaa axaasiikáhe?» Aasla'áy, inooín kaa axaás, asma Gooi i kat,
«Afor'ín kaa axaás baraá yaamu sleémeerowo,
nee axweesanay'ín aa hardáh ay alhhe'eesoó yaamu.»
19Ala aníng a malé yaahaás, «Múk Israeli Ya/abtoodá' gana tsaahhiikáhe?» Tam qoomár aáng ar Mosewo Mungú ina qaroó oó',
«Kuungá' gur'e nu ót as múk xoorór hatlá',
mukdá' kuungá' ta harafadita'aaká
tawa múk kilá'.
Heé adoorí ga tleéhh a aníng.
Slám kuungá' tari buhhá'
dír múk xu'utír koomaaká
as aníng.»
20Aluuwo Isaya aa qiítl /aymi'iiká' ngiwa oó',
«Múk aníng leelehhiitaaká, aníng ina sláy,
nee múk aníng yaahamiisaaká, aníng tina dir'íní geehhooeés.»
21Ala daanduú múk Israeliwo i kaahi, «Tlaatla/aangw sleémeerowo aníng dabaaeé' ina tleés dír múk iialooeemisaaká nee oo sageegawdén.»
Currently Selected:
ROMA 10: IRQW
Highlight
Copy
Compare
Share
Want to have your highlights saved across all your devices? Sign up or sign in
The Bible in Iraqw © Bible Society of Tanzania, 2004.
