ISAYA 21

Iigu'utuú hu'uumaá Babuloni

1Kaangwí a iigu'utuú Mungú aa laqán daanduú yaamaá xaanxoó afaá tlawto.

Adoodá' bambaaór baskú daahh ir harafitsaatsit

múk ni haratláw baskú wa ale i baraá xaanxoó daahh,

amór yaamaá múk xaraásl ngin dahhiyá'.

2Iigu'utuú xaraásl kunguna aníngí laqán,

daanduú heé al/aymusmo iwa al/agin

nee daanduú hhituusmo iwa hhitiitin.

Kuungaá múk Elamu, tlawsé', gawa i tsa/amak.

Kuungaá múk Medi, tlawsé', haratlawé'.

Mungú slahh'amu sleémeero gu faak,

kudá' tindi haahuwi nee múk Babuloni.

3Gawaá adoorihe, tla/angw'eé' iri tsatiít as iigu'utuudá',

slahha'amú adór mutaai aníng iri áy,

slahha'amú adór kuqú /ameenír xwayla iri áy.

Aníng ana yaamií huú', tam gár ni axamiis i káhh,

ana daanda feehhiít tam sleeme a xumiisaaká.

4Inslaway'eé' i amoqwaqwadín, daér yaariir iga eér,

tsiindo in daamaraám,

ala niwa hardihiyé' ana ak daaraáx.

5Muruú /ayma kuna amohhe'eés,

inqwar kuna hhaáf,

hamí muu i /ayín nee i wahán.

«Kuungaásingaá geeraharuúse! Tlawaaré',

gaambu slikaak!»

6Asma Mungú aníng ina báy,

«Tláw xuumusmo qaaseek,

inós gár aa ár ngi ooi.

7Múk faras ngwaa i tsa/an oo ti tsadér wa koóm burngwa ár,

laqaá oo daqwaaye ngaa i tsa/an, laqaá angamía,

inós iia ngi ló'wa qaasi,

nee ngi ló'wa sihhi.»

8Aluuwo xuumusmoodá' iri tseé', i kaahi,

«Aáko, aníng ana gawaá /aampár wa sihhmamiít,

ana xumaamiís tlaatla/aangw sleémeero,

xuumár xweera sleeme ana óh.

9Qaytsiít, múk faras ngwaa i tsa/an i hi'iit, ti tsadér wa koomakoná'!»

Ta kaahi, «Babuloni aa hú',

nee slaqsi'iiwós kudaá mungui,

kin yaamúr slaáhh kiri giqaaqáy.»

10Aá múk Israeli, muk'eé',

kuungaasingá' taa tuuaiít adór balángw wa alé,

kángw naa dír AAKOÓ MUNGÚ Aleesleemusmoó wa axaás,

Munguú Israeli, ngwa dirhúngií oó'.

Geehhooeemaá Mungú aa laqán daanduú Edomuwo

11Kaangwí a geehhooeemaá Mungú aa laqán daanduú Edomu#21:11 Edomu: Laqaá Duma.

Heeko aníng ina amór Seírír wa ateét, i kaahi,

«Xuumusámo, gár naa aán xweeraawo?

Xuumusámo, gár naa aán xweeraawo?»

12Xuumusmo iri oó',

«Looa niqo tlatleér, nee xweera ni hardihiyá' sleeme.

Kuúng bar yaahamisuú slá', yaahamiís,

ta tleér, ni malé kí/.»

Geehhoeemaá daanduú yaamaá Ma/arabu

13Kaangwí a geehhoeemaá Mungú aa laqán daanduú yaamaá Ma/arabuwo.

Kuungaásaá aauusér Dedani,

heemaduuhúng sihhaak xweeraá laarí baraá yaamaá sla/a awa Ma/arabu.

14Kuungaásaá yaamuloouusér yaamaá Tema,

muksíng aa waxiimiit wahasaak,

muksíng naa goow muruú /aymaro qawaak.

15Asma inooín slaqwara ngina ilaguwiyé',

paangadaá taa duúx baraá qaw'iwo ngina ilaguwiyé'.

Maheeraá taa baraá tlaangasú wa duúx

nee slaqwarár xaraasl ngina ilaguwiyé'.

16Asma Aako aníng ina báy, «Baraá guruú kurkú wake, u /aaresaaká, nee u harwaarahhasaaká, adór kuquú heé ta bu'un tlaatla/ángw wake, xirfuú múk Kedari u qwaareés. 17Miguusér niina, tidá' maheeraá tlaquut ar múk Kedari, in mét. Anuú AAKOÓ MUNGÚ, Munguú Israeli, tí ana oó'.»

Currently Selected:

ISAYA 21: IRQW

Highlight

Copy