يُواْشُوَ 9
9
غِبٜىٰيُواْنَاوَا سُنْ رُوطِ يُواْشُوَ
1أَنَانً سَيْ وَطَنْسُ سَرَاكُنَ سُكَجِ لَابَرِنْ نَصَرَرْ إِسْرَٰٓءِيلَاوَا، وَتُواْ دُكَنْ سَرَاكُنَنْ دَسُكٜىٰ يَمَّ دَ كُواْغِنْ يُواْدَنْ دَ نَثِكِنْ يَنْكِنْ ڧأَنَانً تُدَّيْ دَ نَڧَسَرْدَ تَكٜىٰ ݣُورِ دَ نَدُكَنْ ڧَسَاشٜىٰنْ دَسُكٜىٰ عَيَنْكِنْ بَاكِنْ بَبَّرْ تٜىٰكُنْ مٜىٰدِتٜىٰرٜىٰنِيَ حَرْ ذُوَا لٜىٰبَنُوانْ؞ وَطَنَّنْ سُونٜىٰ سَرَاكُنَنْ هِتِّيَاوَا دَ نَ أَمُواْرِيَاوَا دَ نَ كَنْعَنِيَاوَا دَ نَ ڢٜىٰرِظِّيَاوَا دَ نَ هِوِيَاوَا دَ كُمَ نَ يٜىٰبُسِيَاوَا؞ 2دَ سُنْجِ لَابَرِنْ، سَيْ سُكَ تَتَّارُ سُكَ حَطَ كَنْسُ دُواْمِنْ سُيَاڧِ يُواْشُوَ دَ إِسْرَٰٓءِيلَاوَا؞
3عَمَّا، سَعَدَّ مَذَوْنَنْ غِبٜىٰيُوانْ سُكَجِ أَبِنْدَ يُواْشُوَ يَيِ وَ يٜىٰرِكُواْ دَ أَيْ، 4سُكَ شِرْيَ دَبَرَ سُرُوطِ يُواْشُوَ؞ سَيْ سُكَ شِرْيَ طَنْ عَبِنْثِ، سُكَيِ وَجَاكُنَنْسُ لُواْدِ دَ ڟُواْڢَڢِّنْ بُهُنَ دَ ڟُواْڢَڢِّنْ سَلْكُنَنْ ضُوً إِنَبِے وَطَنْدَ سُكَ يَيَّاغٜىٰ سُنْ كُوَ شَا طِنْكِ؞ 5سُكَ كُمَسَا ڟُواْڢَڢِّنْ تَاكَلْمَ وَطَنْدَ سُكَ يَيَّاغٜىٰ سُنْ كُوَ شَا ڠَرَ دَ كُمَ ڟُواْڢَڢِّنْ رِيغُنَ؞ دُكَنْ عَبِنْثِنْسُ يَبُوشٜىٰ، يَيِ ڢُمْڢُنَ؞ 6سَعَنً سُكَ تَڢِے وُرِنْ يُواْشُوَ أَ عِنْدَ إِسْرَٰٓءِيلَاوَا سُكَيِ ذَنْغُواْ أَ غِلْغَلْ؞ سَيْ سُكَيِ مَغَنَ دَشِ دَ كُمَ إِسْرَٰٓءِيلَاوَا سُكَثٜىٰ «مُنْ ڢِتُواْ نٜىٰ دَغَ ڧَسَا مَيْ نِيسَ، يَنْذُ ڢَا سَيْ كُيِ يَرْجٜىٰجٜىٰنِيَ دَمُو؞»
7عَمَّا إِسْرَٰٓءِيلَاوَا سُكَ ڢَطَا وَ هِوِيَاوَنْ «دُوانْمٜىٰ ذَامُيِ يَرْجٜىٰجٜىٰنِيَ دَكُو؟ وَتَڧِيلَ كُنَ ظَوْنٜىٰ أَنَنْ كُرْكُسَ دَمُو؞»#ڢِتْ 23.32؛ 34.12؛ مَيْ شَـ 7.2
8سُو كُوَ سُكَثٜىٰ وَ يُواْشُوَ «مُو بَايِنْكَنٜىٰ؞»
يُواْشُوَ يَتَمْبَيٜىٰسُ «وَنٜىٰنٜىٰ كُو؟ دَغَ إِنَا نٜىٰ كُكَ ڢِتُواْ؟»
9سُكَ أَمْسَ سُكَثٜىٰ «دَغَ ڧَسَا مَيْ نِيسَ بَايِنْكَ سُكَ ڢِتُواْ، سَبُواْدَ سُونَنْ يَهْوٜىٰهْ اللَّهْ نْكَ؞ غَمَا مُنْ جِ لَابَرِنْسَ غَمٜىٰدَ دُكْ أَبِنْدَ يَيِ عَڧَسَرْ مَصَرْ؞ 10مُنْ كُمَجِ أَبِنْدَ يَيِ وَسَرَاكُنَ بِيُ نَ أَمُواْرِيَاوَا وَطَنْدَ سُكٜىٰ أَغَبَشِنْ كُواْغِنْ يُواْدَنْ، وَتُواْ سِهُوانْ سَرْكِنْ هٜىٰشْبُوانْ دَ عُواغْ سَرْكِنْ بَشَنْ وَنْدَ يَكٜىٰ أَ عَشْتَرُواتْ؞#لِـ ڧِدْ 21.21-35 11دَتَّاوَنْمُ دَ كُمَ دُكَنْ مَذَوْنَنْ ڧَسَرْمُ سُكَثٜىٰ مَنَ مُرِڧٜىٰ طَنْ عَبِنْثِ أَ حَنُّنْمُ مُجٜىٰ مُسَامٜىٰكُ، مُڢَطَا مُكُ ثٜىٰوَ ‹مُو بَايِنْكُنٜىٰ، يَنْذُ ڢَا سَيْ كُيِمَنَ يَرْجٜىٰجٜىٰنِيَ؞› 12وَنَّنْ عَبِنْثِ، دَا مَا يَنَدَ ذَاڢِ سَعَدَّ مُكَ طَوْكَ دَغَ غِدَاجٜىٰنْمُ أَ رَانَرْ دَ مُكَ ڢِتُواْ دُواْمِنْ مُذُواْ وُرِنْكُ؞ عَمَّا غَاشِ يَنْذُ يَدَّ يَبُوشٜىٰ يَيِ ڢُمْڢُنَ؞ 13وَطَنَّنْ سَلْكُنَنْ ضُوً إِنَبِے كُمَ وَطَنْدَ مُكَثِكَ، سَابَبِّے نٜىٰ أَدَا؞ عَمَّا غَاشِ يَنْذُ سُنْ ڢَرْڢَشٜىٰ؞ رِيغُنَنْمُ كُمَ دَا مَا سَابَبِّے نٜىٰ دَ تَاكَلْمَنْمُ سُنْ ڟُوڢَ سَبُواْدَ تَڢِيَ مَيْ نِيسَ؞»
14سَيْ إِسْرَٰٓءِيلَاوَا سُكَ طِبَ دَغَ ثِكِنْ عَبِنْثِنْ مُتَنٜىٰنْ غِبٜىٰيُوانْ، عَمَّا بَسُ نٜىٰمِ نُڢِنْ يَهْوٜىٰهْ بَ؞ 15يُواْشُوَ كُوَ يَيِ يَرْجٜىٰجٜىٰنِيَرْ سَلَمَ تَرٜىٰدَسُو ثٜىٰوَ ذَيْ بَرْسُ دَ رَيْ؞ شُوغَبَنِّنْ جَمَعَرْ إِسْرَٰٓءِيلَاوَا كُمَ سُكَ ضَنْڟٜىٰ مُسُ؞
16عَمَّا بَايَنْ رَانَ تَ عُكُ دَ سُكَيِ يَرْجٜىٰجٜىٰنِيَ دَ مُتَنٜىٰنْ غِبٜىٰيُوانْ، إِسْرَٰٓءِيلَاوَا سُكَجِ ثٜىٰوَ وَطَنَّنْ مُتَنٜىٰ سُنَ ظَوْنٜىٰ كُرْكُسَدَ سُونٜىٰ؞ 17سَيْ إِسْرَٰٓءِيلَاوَا سُكَ كَامَ حَنْيَرْسُ، عَكَنْ رَانَ تَ عُكُ سُكَ إِسُواْ بِرَنٜىٰنْ دَ مُتَنٜىٰنْ سُكٜىٰ ظَوْنٜىٰ، وَتُواْ بِرْنِنْ غِبٜىٰيُوانْ دَ كٜىٰڢِرَ دَ بٜىٰيٜىٰرُواتْ دَ كُمَ كِرِيَتْ يٜىٰيَرِمْ؞ 18عَمَّا إِسْرَٰٓءِيلَاوَا بَسُ كَشٜىٰسُبَ، غَمَا شُوغَبَنِّنْ جَمَعَرْسُ سُنْ رِغَا سُنْ ضَنْڟٜىٰ مُسُ دَ سُونَنْ يَهْوٜىٰهْ اللَّهْ نَ إِسْرَٰٓءِيلَ؞
دُكَنْ جَمَعَ كُوَ سُكَيِ غُنَغُنِ عَكَنْ شُوغَبَنِّنْ؞ 19عَمَّا دُكَنْ شُوغَبَنِّنْ سُكَ أَمْسَوَ جَمَعَ سُكَثٜىٰ «مُنْ رِغَا مُنْ ضَنْڟٜىٰ مُسُ دَ سُونَنْ يَهْوٜىٰهْ اللَّهْ نَ إِسْرَٰٓءِيلَ؞ سَبُواْدَ حَكَ يَنْذُ بَذَيْ يِوُ مُتَٻَسُبَ؞ 20أَبِنْ دَ ذَامُيِ مُسُ كٜىٰنَنْ، دُواْلٜىٰ مُبَرْسُ دَ رَيْ سَبُواْدَ ضَنْڟُوَارْ دَ مُكَيِ مُسُ، دُواْمِنْ كَدَ مُجَٰوُاْ ڢُشِنْ يَهْوٜىٰهْ عَكَنْمُ؞» 21شُوغَبَنِّنْ إِسْرَٰٓءِيلَ سُكَڧَارَ ڢَطَا وَجَمَعَ ثٜىٰوَ «عَبَرْسُ دَ رَيْ، عَمَّا ذَاسُ ذَمَ مَاسُ سَارَنْ إِتَاثٜىٰ دَ كُمَ مَاسُ طٜىٰبُواْوَ جَمَعَرْمُ ضُوَ؞» تَهَكَ شُوغَبَنِّ سُكَ ثِكَ يَرْجٜىٰجٜىٰنِيَرْسُ؞
22يُواْشُوَ كُوَ يَكِرَا مُتَنٜىٰنْ غِبٜىٰيُوانْ يَثٜىٰ مُسُ «دُوانْمٜىٰ كُكَ رُوطٜىٰمُ دَ ثٜىٰوَ كُنَ نٜىٰسَ دَمُو ڨُورَيْ، عَمَّا غَسْكِيَ كُنَ ظَوْنٜىٰ كُرْكُسَ دَمُو؟ 23سَبُواْدَ كُنْيِ وَنَّنْ، دَغَ يَنْذُ يَهْوٜىٰهْ يَا لَعَنْتَكُ؞ مُتَنٜىٰنْكُ ذَاسُ ثِيغَبَدَ ذَمَنْ بَايِ، مَاسُ سَارَنْ إِتَاثٜىٰ دَ مَاسُ طِبَنْ ضُوَ دُواْمِنْ غِدَنْ اللَّهْ نَ إِسْرَٰٓءِيلَ حَرْ أَبَدَا؞»
24سُكَ أَمْسَوَ يُواْشُوَ سُكَثٜىٰ «رَنْكَيَدَطٜىٰ! مُنْيِ حَكَنَنْ غَمَا مُنَ تَجِنْ لَابَرِ ثٜىٰوَ يَهْوٜىٰهْ اللَّهْ نْكَ يَيِ وَبَاوَنْسَ مُوسَٰى أَلْڧَوَرِ ثٜىٰوَ ذَيْبَاكُ دُكَنْ ڧَسَرْ، يَكُمَ هَلَّكَرْ دَ دُكَنْ مَذَوْنَنْ ڧَسَرْ سَبُواْدَكُو؞ دُواْمِنْ حَكَ مُنَ جِنْ ڟُواْرُوانْكُ سُواْسَيْ سَبُواْدَ رَايُكَنْمُ؞ شِيَسَا مُنْيِ وَنَّنْ؞ 25يَنْذُ دَيْ مُنَ أَ حَنُّنْكَ، كَيِ يَدَّ كَغَ يَنَدَ ݣَوْ دَ كُمَ يَدَّ يَكٜىٰ دَيْدَيْ أَغَرٜىٰكَ غَمٜىٰدَمُو؞» 26يُواْشُوَ كُوَ يَثٜىٰثِ غِبٜىٰيُواْنَاوَا دَغَ حَنُّنْ إِسْرَٰٓءِيلَاوَا، بَيْ يَرْدَ سُكَشٜىٰسُبَ؞ 27عَمَّا أَوَنَّنْ رَانَ يُواْشُوَ يَسَا غِبٜىٰيُواْنَاوَا سُذَمَ مَاسُ سَارَنْ إِتَاثٜىٰ دَ مَاسُ طِبَنْ ضُوَ دُواْمِنْ جَمَعَ دَ كُمَ دُواْمِنْ وُرِنْ دَ يَهْوٜىٰهْ يَذَاٻَا دُواْمِنْ عَيِ مَسَ سُجَّدَ؞ حَكَكُمَ سُكٜىٰ هَرْوَيَوْ؞
Currently Selected:
يُواْشُوَ 9: hauAS
Highlight
Share
Compare
Copy
Want to have your highlights saved across all your devices? Sign up or sign in
Hausa Common Language Ajami Bible © The Bible Society of Nigeria, 2020
