دَانِيٜىٰلْ 4
4
وَسِيڧَرْ نٜىٰبُكَدْنٜىٰزَّرْ غَمٜىٰدَ مَڢَرْكِنْسَ عَكَنْ بَبَّنْ إِتَاثٜىٰ
1وَسِيڧَ دَغَ سَرْكِے نٜىٰبُكَدْنٜىٰزَّرْ ذُوَاغَ دُكَنْ ڧَبِيلُ دَ أَلْعُمَّيْ دَ مَاسُ يَرٜىٰ دَبَمْ دَبَمْ وَطَنْدَ سُكٜىٰ كُواْعِنَ عَدُونِيَا؞ بَرِ سَلَمَ عَيَلْوَثٜىٰ تَكَسَنْثٜىٰ أَغَرٜىٰكُ! 2نَغَ يَيِݣَوْ إِنْ سَنَرْ مُكُ دَ عَلَمُ دَ أَيُّكَنْ بَنْ مَامَاكِ وَطَنْدَ اللَّهْ مَڢِے طَوْكَكَ يَيِ مِنِ؞
3إِنَا مِصَالِنْ عَلَمُنْسَ
دَ أَيُّكَنْسَ مَاسُ بَنْ مَامَاكِ!
مُلْكِنْسَ مُلْكِ نٜىٰ نَهَرْ أَبَدَا،
إِيكُوانْ مُلْكِنْسَ دَغَ ڟَارَا ذُوَا ڟَارَا نٜىٰ!
4نِے نٜىٰبُكَدْنٜىٰزَّرْ إِنَ ثِكِنْ غِدَانَ، ثِكِنْ جِنْ دَاطِے دَ ݣُونْثِيَرْ رَيْ؞ 5أَنَانً، وَنِ دَرٜىٰ سَيْ نَيِ مَڢَرْكِ وَنْدَ يَبَا نِے ڟُواْرُواْ مَيْ ڟَنَنِ؞ سَعَدَّ نَكٜىٰ ݣُونْثٜىٰ أَغَدُواْنَ، تُنَانِنْدَ نَيِ دَ رُعُيُواْيِنْدَ نَغَنِ سُنْ سَا نَڢِرْغِتَ؞ 6سَبُواْدَ وَنَّنْ سَيْ نَكَڢَ عُمَرْنِ ثٜىٰوَ عَكِرَوُاْ مِنِ دُكَنْ مَاسُ حِكِمَ نَ بَابِيلَ دُواْمِنْ سُسَنَرْ مِنِ مَعَنَرْ وَنَّنْ مَڢَرْكِ؞ 7سَيْ مَاسُ دَبُواْ دَ مَاسُ سِحِرِ دَ ڠُونَيٜىٰنْ ڟَاڢِ دَ مَاسُ يِنْ دُوبَادَ تَوْرَرِ سُكَذُواْ، نَكُوَ ڢَطَا مُسُ مَڢَرْكِنْ، عَمَّا بَسُ عِيَ ڢَطَا مِنِ مَعَنَرْسَبَ؞ 8دَغَ بَايَ سَيْ وَنِ سَوْرَيِ مَيْ سُونَ دَانِيٜىٰلْ يَشِغُواْ؞ وَنَّنْ دَانِيٜىٰلْ كُوَ أَنْكُمَ سَنْ شِ دَ سُونَ بٜىٰلْتٜىٰشَظَّرْ، وَتُواْ سُونَنْ اللَّهْنَ؞ شِے مُتُمْ نٜىٰ ثِكٜىٰ دَ رُوحٌ أَلُّواْلِ مَاسُ ڟَرْكِے؞ نَا كُوَ ڢَطَا مَسَ مَڢَرْكِنْدَ نَيِ، نَثٜىٰ، 9«يَا بٜىٰلْتٜىٰشَظَّرْ، شُوغَبَنْ مَاسُ دَبُواْ، تُنْدَيَكٜىٰ نَسَنْ رُوحٌ أَلُّواْلِ مَاسُ ڟَرْكِے يَنَ عَثِكِنْكَ، بَا وَنِ أَسِيرِنْ دَ ذَيْڢِ ڧَرْڢِنْ غَانٜىٰوَرْكَ؞ غَا مَڢَرْكِنْدَ نَيِ، سَيْ كَبَيَّنَ مِنِ مَعَنَرْسَ؞
10«غَا رُعُيَرْدَ نَغَنِ سَعَدَّ نَكٜىٰ ݣُونْثٜىٰ أَغَدُواْنَ؞ إِنَ كَلُّواْ، سَيْ نَغَ وَنِ إِتَاثٜىٰ أَڟَكِيَرْ دُونِيَا؞ إِتَاثٜىٰنْ كُوَ يَنَدَ ڟَيِ ڨُورَيْ؞ 11إِتَاثٜىٰنْ يَيِ تَغِرْمَ، يَيِ ڧَرْڢِے حَرْ ڟَيِنْسَ يَكَيْ سَمَ، يَدَّ أَنَ عِيَ غَنِنْسَ دَغَ كُواْعِنَ عَدُونِيَا؞ 12غَنْيٜىٰنْسَ مَاسُ ݣَنْ غَنِ نٜىٰ، كُمَ یَیَنْسَ سُنَانَنْ دَيَوَ، حَرْ سُنَ ثِيَرْدَ كُواْوَ دَ كُواْوَ؞ نَمُواْمِنْ دَاجِ سُنَ سَامُنْ إِنُوَ عَڧَرْڧَشِنْسَ، ڟُنْڟَيٜىٰنْ سَرَرِنْ سَمَ كُمَ سُنَ ذَمَ أَ رَسَّنْسَ؞ دُكَنْ مَاسُ رَيْ، أَغَرٜىٰشِ سُكٜىٰ سَامُنْ عَبِنْثِ؞
13«عَثِكِنْ وَنَّنْ رُعُيَرْدَ نَغَنِ سَعَدَّ نَكٜىٰ ݣُونْثٜىٰ أَغَدُواْ، سَيْ كُمَ غَ وَنِ مَلاَىِٕكَ مَيْ ڟَرْكِے، طَنْ سِنْتِرِ يَنَ سَوْكُواْوَ دَغَ سَمَ؞ 14سَيْ يَيِ كِرَا دَ بَبَّرْ مُرْيَ يَثٜىٰ، ‹أَ سَارٜىٰ إِتَاثٜىٰنْ، عَيَيَّنْكَ رَسَّنْسَ، عَثِثِّرٜىٰ غَنْيٜىٰنْسَ كَكَڢْ، أَوَرْوَاڟَرْدَ یَیَنْسَ؞ أَ سَا نَمُواْمِنْ دَاجِ سُغُدُ دَغَ ڧَرْڧَشِنْسَ، ڟُنْڟَيٜىٰ كُمَ سُتَاشِ دَغَ رَسَّنْسَ؞ 15عَمَّا عَبَرْ تُوشٜىٰنْ دَ سَيْوُاْيِنْسَ عَڧَسَا؞ سَيْ أَطَطَّوْرٜىٰشِ دَ سَرْڧَرْ بَڧِنْ ڧَرْڢٜىٰ دَ تَغُلَّ، عَبَرْ شِ ثِكِنْ طَنْيَرْ ثِيَوَ؞ بَرِ رَٻَ تَيِ تَجِڧٜىٰشِ، كُمَ يَيِ تَثِنْ ثِيَوَ تَرٜىٰدَ نَمُواْمِنْ دَاجِ؞ 16بَرِ أَرَبَشِ دَ حَنْكَلِ إِرِنْ نَمُتَنٜىٰ، عَبَاشِ إِرِنْ نَدَبَّ؞ ذَيْ ذَوْنَ أَوَنَّنْ حَلِ حَرْ ڟَوُانْ لُواْكَثِ بَݣَويْ؞ 17وَنَّنْ شِينٜىٰ حُكُنْثِنْ دَ یَنْ سِنْتِرِ سُكَ ڢَطَا، شِينٜىٰ مَتَاكِنْ دَ مَاسُ ڟَرْكِے سُكَ عُمَرْتَ، دُواْمِنْ دُكَنْ مَاسُ رَيْ سُسَنِ مَڢِے طَوْكَكَ شِينٜىٰ يَنَ مُلْكِ عَكَنْ دُكَنْ یَنْ أَدَمْ؞ شِينٜىٰ يَكَنْ بَادَ مُلْكِ غَ وَنْدَ يَغَ دَامَ، كُمَ يَكَنْ عِيَسَا تَلَكَ يَذَمَ سَرْكِے؞› »
18سَيْ سَرْكِے نٜىٰبُكَدْنٜىٰزَّرْ يَثٜىٰ «وَنَّنْ شِينٜىٰ مَڢَرْكِنْ دَنِے نَا يِ؞ كَيْ كُمَ بٜىٰلْتٜىٰشَظَّرْ، سَيْ كَڢَطَا مِنِ مَعَنَرْسَ، غَمَا دُكَنْ مَاسُ حِكِمَ نَثِكِنْ مُلْكِنَ بَسُ عِيَ ڢَطَا مِنِ مَعَنَرْسَبَ؞ عَمَّا كَيْ ذَاكَ عِيَ، غَمَا رُوحٌ أَلُّواْلِ مَاسُ ڟَرْكِے يَنَ ثِكِنْكَ؞»
مَعَنَرْ مَڢَرْكِنْ دَ ثِكَاوَرْسَ
19سَيْ دَانِيٜىٰلْ وَنْدَ عَكَ كُمَ سَنْ شِ دَ سُونَ بٜىٰلْتٜىٰشَظَّرْ، يَڟَيَ شِضُ نَطَنْ لُواْكَثِ أَ ضِكِثِے سَبُواْدَ تُنَانِنْسَ يَبَا شِ ڟُواْرُواْ؞ سَيْ سَرْكِے يَثٜىٰ مَسَ «بٜىٰلْتٜىٰشَظَّرْ، كَدَ كَبَرْ مَڢَرْكِنْ كُواْ مَعَنَرْسَ يَبَاكَ ڟُواْرُواْ؞»
سَيْ بٜىٰلْتٜىٰشَظَّرْ يَأَمْسَ يَثٜىٰ «يَا مَيْغِرْمَ، بَرِ اللَّهْ يَسَا مَڢَرْكِنَّنْ دَ مَعَنَرْسَ سُذَمَ عَكَنْ أَبُواْكَنْ غَابَنْكَ! 20كَغَا وَنِ إِتَاثٜىٰ وَنْدَ يَيِ غِرْمَ يَيِ ڧَرْڢِے حَرْ ڟَيِنْسَ يَكَيْ سَمَ، حَرْ أَنَ عِيَ غَنِنْسَ دَغَ كُواْعِنَ عَدُونِيَا؞ 21يَنَ دَ غَنْيٜىٰ مَاسُ ݣَوْ، یَیَنْسَ سُنَانَنْ دَيَوَ حَرْ سُنَ ثِيَرْدَ كُواْوَ دَ كُواْوَ؞ نَمُواْمِنْ دَاجِ سُنَ سَامُنْ إِنُوَ عَڧَرْڧَشِنْسَ، ڟُنْڟَيٜىٰ كُمَ سُنَ ذَمَ أَ رَسَّنْسَ؞ 22يَا سَرْكِے، كَيْنٜىٰ وَنَّنْ إِتَاثٜىٰ؞ كَيْ نٜىٰ كَيِ غِرْمَ، كَيِ ڧَرْڢِے، غِرْمَنْكَ يَكَيْ حَرْ سَمَ، مُلْكِنْكَ كُمَ يَكَيْ كُواْعِنَ عَدُونِيَا؞
23«يَا سَرْكِے، سَعَدَّ كَكٜىٰ كَلُّواْ، سَيْغَا وَنِ مَلاَىِٕكَ مَيْ ڟَرْكِے، طَنْ سِنْتِرِ يَنَ سَوْكُواْوَ دَغَ سَمَ؞ يَنَ ثٜىٰوَ ‹أَ سَارٜىٰ إِتَاثٜىٰنَّنْ، أَ هَلَّكَ شِ، عَمَّا عَبَرْ تُوشٜىٰنْ دَ سَيْوُاْيِنْسَ ثِكِنْ ڧَسَا؞ أَ طَطَّوْرٜىٰ دَ سَرْڧَرْ بَڧِنْ ڧَرْڢٜىٰ دَ تَغُلَّ، عَبَرْ شِ أَطَنْيَرْ ثِيَوَ؞ بَرِ رَٻَ تَيِ تَجِڧٜىٰشِ، يَذَوْنَ تَرٜىٰدَ نَمُواْمِنْ دَاجِ حَرْ ڟَوُانْ لُواْكَثِ بَݣَويْ؞›
24«غَا مَعَنَرْسَ، يَا سَرْكِے! وَنَّنْ نٜىٰ عُمَرْنِنْ دَ مَڢِے طَوْكَكَ يَكَڢَ، ذَيْ ڢَاطُواْ وَ مَيْغِرْمَنَ سَرْكِے نٜىٰ؞ 25ذَاعَكُواْرٜىٰكَ دَغَ ثِكِنْ مُتَنٜىٰ ذُوَا دَاجِ، ذَاكَ ذَوْنَ تَرٜىٰدَ نَمُواْمِنْ دَاجِ؞ ذَاكَ كَسَنْثٜىٰ حَكَ نَڟَوُانْ لُواْكَثِ بَݣَويْ، كَنَ ثِنْ ثِيَوَ كَمَرْ بِجِمِ، رَٻَ تَنَ جِڧٜىٰكَ؞ سَعَنً ذَاكَ سَنِ مَڢِے طَوْكَكَ نٜىٰ يَكٜىٰ مُلْكِ عَكَنْ یَنْ أَدَمْ، يَكَنْ كُمَ بَادَ مُلْكِ غَ وَنْدَ يَغَ دَامَ؞ 26كَمَرْ يَدَّ عَكَ عُمَرْتَ عَبَرْ تُوشٜىٰنْ إِتَاثٜىٰنْ دَ سَيْوُاْيِنْسَ، حَكَنَنْ ذَاعَ تَبَّتَرْ مَكَ دَ مُلْكِنْكَ دَغَ لُواْكَثِنْدَ كَڢَارَ سَنِ ثٜىٰوَ مَيْ سَمَ نٜىٰ يَكٜىٰ مُلْكِ؞ 27سَبُواْدَ حَكَ، يَا سَرْكِے، سَيْ كَكَرْٻِ شَوَرَاتَ، كَدَيْنَ ذُنُبَنْكَ كَيِ أَدَلْثِے؞ كَبَرْ مُغُنْتَارْكَ تَوُرِنْ عَيْكَتَ أَلْحٜىٰرِ غَ وَطَنْدَ عَكٜىٰيِ مُسُ دَنِّيَ؞ وَتَڧِيلَ ذَاعَ ڧَارَ ڟَوُانْ ذَمَنْكَ ثِكِنْ سَلَمَ؞»
28دُكَنْ أَبُبُوَنْ دَ دَانِيٜىٰلْ يَڢَطَا، سُنْ ڢَرُ دَ سَرْكِے نٜىٰبُكَدْنٜىٰزَّرْ؞ 29أَنَانً بَايَنْ وَتَا غُواْمَشَا بِيُ، سَعَدَّ سَرْكِے يَكٜىٰ ذَاغَيَ عَكَنْ رُڢِنْ غِدَنْسَ عَ بَابِيلَ، 30سَيْيَثٜىٰ «أَشٜىٰ، بَوَنَّنْ عِتَثٜىٰ بَابِيلَ بَبَّ وَدَّ نِے دَكَيْنَ نَغِنَ دَ ڧَرْڢِنْ إِيكُواْنَبَ؟ بَنِينٜىٰ نَا غِنَتَ دُواْمِنْ تَذَمَ غِدَنْ مُلْكِنَبَ؟ بَنِينٜىٰ نَا غِنَتَ دُواْمِنْ دَرَجَرْ طَوْكَكَتَبَ؟»
31كَاڢِنْ سَرْكِے يَرُڢٜىٰ بَاكِ، سَيْغَا مُرْيَ دَغَ سَمَ تَنَثٜىٰوَ
«يَا سَرْكِے نٜىٰبُكَدْنٜىٰزَّرْ دَكَيْ عَكٜىٰ مَغَنَ! يَنْذُ إِيكُوانْ مُلْكِنْكَ يَرَبُ دَكَيْ! 32ذَاعَكُمَ كُواْرٜىٰكَ دَغَ ثِكِنْ مُتَنٜىٰ ذُوَا دَاجِ، ذَاكَ ذَوْنَ تَرٜىٰدَ نَمُواْمِنْ دَاجِ؞ ذَاكَ كَسَنْثٜىٰ حَكَ نَڟَوُانْ لُواْكَثِ بَݣَويْ، كَنَ ثِنْ ثِيَوَ كَمَرْ بِجِمِ؞ سَعَنً ذَاكَسَنِ ثٜىٰوَ مَڢِے طَوْكَكَ نٜىٰ يَكٜىٰ مُلْكِ عَكَنْ یَنْ أَدَمْ، يَكَنْ كُمَ بَادَ مُلْكِ غَ وَنْدَ يَغَ دَامَ؞»
33نَنْ دَنَنْ سَيْ أَبِنْدَ عَكَ ڢَطَا عَكَنْ نٜىٰبُكَدْنٜىٰزَّرْ يَثِكَ؞ عَكَ كُواْرٜىٰشِ دَغَ ثِكِنْ مُتَنٜىٰ ذُوَا دَاجِ؞ يَشِغَ ثِنْ ثِيَوَ كَمَرْ بِجِمِ؞ جِكِنْسَ يَجِڧٜىٰ دَ رَٻَ، حَرْ غَاشِنْسَ يَيِ ڟَوُاْ كَمَرْ غَاشِنْ غَغَّڢَ، ڧُمْبَرْسَ كُمَ سُكَيِ ڟَوُاْ كَمَرْ نَڟُنْڟُ؞
ڧَرْشٜىٰنْ شَيْدَرْ دَ نٜىٰبُكَدْنٜىٰزَّرْ يَبَايَرْ
34عَڧَرْشٜىٰنْ ݣُونَكِنَّنْ، سَيْ نِے نٜىٰبُكَدْنٜىٰزَّرْ، نَطَغَ عِدُواْ سَمَ، سَيْ حَنْكَلِنَ يَكُواْمُواْ مِنِ؞ نَكُوَ غِرْمَمَ مَڢِے طَوْكَكَ، نَيَبٜىٰشِ، نَغِرْمَمَشِ، شِے وَنْدَ يَكٜىٰ رَايٜىٰ حَرْ أَبَدَا؞
غَمَا مُلْكِنْسَ مُلْكِنٜىٰ نَهَرْ أَبَدَا،
مُلْكِنْسَ دَغَ ڟَارَا ذُوَا ڟَارَنٜىٰ؞
35دُكَنْ مَذَوْنَنْ دُونِيَا
بَعَبَاكِنْ كُواْمٜىٰ سُكٜىٰ أَغَرٜىٰشِيبَ؞
يَكَنْيِ يَدَّ يَغَ دَامَ دَ حَلِتُّنْ سَمَ،
يَكُمَيِ يَدَّ يَغَ دَامَ دَ مَذَوْنَنْ دُونِيَا؞
بَا مَيْ هَنَشِ، بَا مَيْثٜىٰمَسَ،
«مٜىٰ كَكٜىٰيِ؟»
36أَوَنَّنْ لُواْكَثِ كُوَ، سَيْ حَنْكَلِنَ يَكُواْمُواْ مِنِ، سَيْ عَكَ مَيَرْ مِنِ دَ غِرْمَنَ دَ دَرَجَتَ دُواْمِنْ طَوْكَكَرْ مُلْكِنَ تَدَاوُاْ؞ مَاسُ بَانِ شَوَرَا دَ دَتَّاوَنَ سُكَ نٜىٰمُواْنِ؞ بَنْدَ حَكَمَا، عَكَ مَيَرْ مِنِ دَ إِيكُوانْ مُلْكِنَ عَكَ كُمَ ڧَارَ مِنِ غِرْمَ ڢِيٜىٰدَ نَدَا؞ 37يَنْذُ نِے نٜىٰبُكَدْنٜىٰزَّرْ،
إِنَ يَبُوانْ سَرْكِنْ سَمَ،
إِنَ طَوْكَكَاشِ،
إِنَ كُمَ غِرْمَمَشِ!
دُكَنْ أَيُّكَنْسَ دَيْدَيْنٜىٰ،
دُكَنْ هَنْيُواْيِنْسَ كُمَ غَسْكِيَ نٜىٰ!
يَنَ دَ إِيكُواْ يَڧَسْڧَنْتَرْ دَ
وَطَنْدَ سُكٜىٰ تَڢِيَ ثِكِنْ غِرْمَنْ كَيْ؞
Currently Selected:
دَانِيٜىٰلْ 4: hauAS
Highlight
Copy
Compare
Share
Want to have your highlights saved across all your devices? Sign up or sign in
Hausa Common Language Ajami Bible © The Bible Society of Nigeria, 2020
