1 سَرَاكُنَ 22
22
أَنَّبِے مِكَيَ يَغَرْغَطِ أَهَبْ
﴿2 تَارْ 18.2-27﴾
1أَنْيِ شٜىٰكَرَا عُكُ بَابُ يَاڧِ ڟَكَانِنْ سُورِيَ دَ إِسْرَٰٓءِيلَ؞ 2أَ شٜىٰكَرَا تَ عُكُ سَيْ سَرْكِے يٜىٰهُواْشَڢَتْ نَ يَهُودَ يَغَنْغَرُواْ دُواْمِنْ يَظِيَرْثِ سَرْكِنْ إِسْرَٰٓءِيلَ؞
3سَرْكِے أَهَبْ يَثٜىٰ وَدَتَّاوَنْسَ «مٜىٰيَسَا بَمُ طَوْكِ مَتَاكَنْ مَيْدَ غَرِنْ رَمُواتْ غِلٜىٰيَدْ عَڧَرْڧَشِنْ مُلْكِنْمُبَ؟ كُنْ سَنْ ثٜىٰوَ تَنَ عَيَنْكِنْ ڧَسَرْمُ كُوَ؟ غَاشِ، بَمُيِ كُواْمٜىٰ دُواْمِنْ عَڨُوثٜىٰتَ دَغَ حَنُّنْ سَرْكِنْ سُورِيَ بَ!» 4سَيْ أَهَبْ يَتَمْبَيِ يٜىٰهُواْشَڢَتْ يَثٜىٰ «كُواْ ذَاكَ تَڢِے دَنِے مُيَاڧِ رَمُواتْ غِلٜىٰيَدْ؟»
سَرْكِے يٜىٰهُواْشَڢَتْ يَأَمْسَ يَثٜىٰ «إِنَ أَشِرْيٜىٰ مُتَڢِے؞ أَيْ، سُواْجُواْجِنَ سُواْجُواْجِنْكَ نٜىٰ دَوَكِنَ دَوَكِنْكَ نٜىٰ؞»#2 سَرْ 3.7
5عَمَّا يٜىٰهُواْشَڢَتْ يَثٜىٰ وَسَرْكِنْ إِسْرَٰٓءِيلَ «مُنٜىٰمِ نُڢِنْ يَهْوٜىٰهْ تُكُنَ؞»
6سَيْ أَهَبْ يَكِرَا دُكَنْ أَنَّبَاوَا وَجٜىٰنْ طَرِے حُطُ يَثٜىٰ مُسُ «إِنْكَيْوَ رَمُواتْ غِلٜىٰيَدْ يَاڧِ كُواْ إِنْبَرِ؟»
سَعَنً دُكَنْسُ سُكَ أَمْسَ سُكَثٜىٰ «كَتَڢِے غَمَا يَهْوٜىٰهْ ذَيْبَادَ عِتَ أَ حَنُّنْكَ؞»
7عَمَّا يٜىٰهُواْشَڢَتْ يَيِ تَمْبَيَ يَثٜىٰ «بَابُوَنِ أَنَّبِنْ يَهْوٜىٰهْ وَنْدَ ذَيْ نٜىٰمُواْ مَنَ نُڢِنْ يَهْوٜىٰهْ؟»
8سَرْكِے أَهَبْ نَ إِسْرَٰٓءِيلَ يَأَمْسَ مَسَ يَثٜىٰ «عِ، أَݣَويْ وَنِنْ دَ ذَامُ عِيَ نٜىٰمَنْ نُڢِنْ يَهْوٜىٰهْ تَوُرِنْسَ، سُونَنْسَ مِكَيَ طَنْ إِمْلَ؞ عَمَّا بَانَ سُوانْسَ، سَبُواْدَ بَايَ أَنَّبْثِ مَيْݣَوْ عَكَيْنَ، سَيْدَيْ مَسِيڢَ؞»
سَرْكِے يٜىٰهُواْشَڢَتْ نَ يَهُودَ يَثٜىٰ «سَرْكِے، كَدَ كَيِ مَغَنَ حَكَ؞»
9سَرْكِنْ إِسْرَٰٓءِيلَ يَكِرَا وَنِ دَغَ ثِكِنْ دَتَّاوَنْسَ يَثٜىٰ «يِمَظَا، كَكَٰوُاْ مِكَيَ طَنْ إِمْلَ أَنَنْ؞»
10سَرْكِے أَهَبْ نَ إِسْرَٰٓءِيلَ دَ سَرْكِے يٜىٰهُواْشَڢَتْ نَ يَهُودَ كُوَ سُكَسَا رِيغُنَنْ مُلْكِنْسُ، سُكَ ذَوْنَ عَكَنْ كُجٜىٰرُنْ مُلْكِ كُسَدَ وُرِنْ بُغُنْ حَڟِ نَبَاكِنْ ڧُواْڢَرْ بِرْنِنْ سَمَرِيَ؞ دُكَنْ أَنَّبَاوَنْ ڧَسَرْ سُكَيِ تَ أَنَّبْثِ أَغَبَنْسُ؞ 11سَعَنً طَيَ عَثِكِنْسُ مَيْ سُونَ صَدِڧِيَ طَنْ كٜىٰنَعَنَ يَيِ وَكَنْسَ ڧَهُواْنِنْ بَڧِنْ ڧَرْڢٜىٰ يَثٜىٰ «إِنْجِ يَهْوٜىٰهْ، ‹دَ وَطَنَّنْ ڧَهُواْنِ ذَاكَ تُورَ سُرِيَاوَا حَرْ سُهَلَّكَ؞› » 12دُكَنْ أَنَّبَاوَنْ سُكَيِ أَنَّبْثِ إِرِ طَيَ سُنَ ثٜىٰوَ «كَتَڢِے كَڢَاطَوَ رَمُواتْ غِلٜىٰيَدْ دَ يَاڧِ، ذَاكَيِ نَصَرَا؞ يَهْوٜىٰهْ ذَيْبَادَ عِتَ أَ حَنُّنْكَ؞»
13طَنْ عَيْكَنْدَ يَتَڢِے كِرَنْ مِكَيَ يَثٜىٰ مَسَ «دُكَنْ سَوْرَنْ أَنَّبَاوَا سُنْيِ وَسَرْكِے أَنَّبْثِنْ نَصَرَا، سَيْ كَيْ مَا كَيِ حَكَ؞»
14عَمَّا مِكَيَ يَأَمْسَ يَثٜىٰ «نَا ضَنْڟٜىٰ دَ سُونَنْ يَهْوٜىٰهْ مَيْ رَيْ، أَبِنْدَ يَهْوٜىٰهْ يَثٜىٰ إِنْڢَطَا شِينٜىٰ كَطَيْ ذَنْ ڢَطَا؞»
15سَعَدَّ يَذُواْ غَبَنْ سَرْكِے أَهَبْ، سَيْ سَرْكِے يَثٜىٰ مَسَ «مِكَيَ، مُڢِتَ مُڢَاطَوَ رَمُواتْ غِلٜىٰيَدْ دَ يَاڧِ كُواْ مُبَرِ؟»
مِكَيَ يَأَمْسَ يَثٜىٰ «كَڢَاطَ مُسُ دَ يَاڧِ، أَيْ، ذَاكَثِ نَصَرَا؞ يَهْوٜىٰهْ ذَيْبَادَ عِتَ أَ حَنُّنْكَ؞»
16سَيْ سَرْكِے أَهَبْ يَأَمْسَ مَسَ يَثٜىٰ «سَوْ نَوَ ذَنْسَا كَرَنْڟٜىٰ مِنِ دَ سُونَنْ يَهْوٜىٰهْ ثٜىٰوَ غَسْكِيَ كَطَيْ ذَاكَ ڢَطَا مِنِ؟»
17دُواْمِنْ حَكَ مِكَيَ يَثٜىٰ «عَثِكِنْ رُعُيَ، نَغَ دُكَنْ جَمَعَرْ إِسْرَٰٓءِيلَ أَوَرْوَڟٜىٰ عَكَنْ تُدَّيْ كَمَرْ تُمَكِنْدَ بَاسُ دَ مَكِيَايِ؞ نَكُمَجِ يَهْوٜىٰهْ يَثٜىٰ، ‹وَطَنَّنْ بَاسُ دَ شُوغَبَا، بَرِ كُواْوَ يَكُواْمَ غِدَنْسَ لَاڢِيَ؞› »#لِـ ڧِدْ 27.17؛ مَتْ 9.36؛ مَرْ 6.34
18سَرْكِنْ إِسْرَٰٓءِيلَ يَثٜىٰ وَ يٜىٰهُواْشَڢَتْ «بَنْ ڢَطَا مَكَبَ، بَذَيْ يِ أَنَّبْثِ مَيْݣَوْ عَكَيْنَبَ، سَيْدَيْ مَسِيڢَ؟»
19مِكَيَ يَثِيغَبَ يَثٜىٰ «سَبُواْدَ حَكَ كُجِ مَغَنَرْ يَهْوٜىٰهْ، غَمَا نَا غَا يَهْوٜىٰهْ يَنَ ظَوْنٜىٰ عَكُجٜىٰرَرْ مُلْكِنْسَ دَ دُكَنْ تَارُوانْ حَلِتُّو نَسَمَ سُنَ ڟَيْڟَيٜىٰ كُسَدَشِ أَ حَنُّنْ هَغُنْسَ دَ حَنُّنْ دَامَنْسَ؞#عِشـ 6.1؛ أَيُو 1.6 20سَيْ يَهْوٜىٰهْ يَثٜىٰ، ‹وَنٜىٰنٜىٰ ذَيْ لَلَّشِ أَهَبْ يَهَوْرَ يِنْ يَاڧِ دُواْمِنْ يَڢَاطِ أَ رَمُواتْ غِلٜىٰيَدْ؟› عَكَيِ تَكَٰوُاْ شَوَرَا إِرِ إِرِ؞
21«عَڧَرْشٜىٰ وَنِ رُوحُ يَا بَيَّنَ أَغَبَنْ يَهْوٜىٰهْ يَثٜىٰ، ‹ذَنْ لَلَّشٜىٰشِ!›
22«يَهْوٜىٰهْ يَثٜىٰ مَسَ، ‹تَيَيَا ذَاكَيِ وَنَّنْ؟›
«سَيْ رُوحٌ يَثٜىٰ، ‹ذَنْ تَڢِے إِنْذَمَ رُوحٌ ڧَضْيَا عَبَاكِنْ دُكَنْ أَنَّبَاوَنْسَ؞›
«يَهْوٜىٰهْيَثٜىٰ مَسَ، ‹تَڢِے، كَلَلَّشٜىٰشِ؞ ذَاكَيِ نَصَرَا؞› »
23مِكَيَ يَثٜىٰ «تُواْ، كَا غَنِ، يَهْوٜىٰهْ يَا سَا رُوحٌ ڧَضْيَا عَبَاكِنْ دُكَنْ أَنَّبَاوَنْكَ؞ غَمَا يَا رِغَا يَا ڢَطَا شِرِنْسَ نَمَسِيڢَ دُواْمِنْكَ!»
24سَيْ أَنَّبِے صَدِڧِيَ طَنْ كٜىٰنَعَنَ يَتَڢِے وُرِنْ مِكَيَ يَبَا شِ مَرِ عَكُمَتُ سَيْ يَتَمْبَيٜىٰشِ يَثٜىٰ «تُنْ يَوْشٜىٰ نٜىٰ رُوحٌ يَهْوٜىٰهْ يَبَرْنِ يَذُواْ يَيِ مَغَنَ دَكَيْ؟»
25مِكَيَ يَأَمْسَ يَثٜىٰ «ذَاكَ سَنِ أَ رَانَرْ دَ ذَاكَ غُدُ كَٻُيَ ثِكِ ثِكِنْ وَنِ طَاكِ!»
26سَرْكِے أَهَبْ يَثٜىٰ «عَكَمَ مِكَيَ عَكَيْ شِ وُرِنْ أَمُوانْ ڠُومْنَنْ بِرْنِنْ دَ كُمَ وُرِنْ طَانَ يُواْوَشْ؞ 27كَثٜىٰمُسُ نِے سَرْكِے نَبَادَ عُمَرْنِ أَ سَا مِكَيَ عَكُرْكُكُ؞ كَدَ عَبَاشِ كُواْمٜىٰ سَيْدَيْ طَنْ غُرَاسَ كَطَنْ دَ طَنْ ضُوَ حَرْ سَيْ نَدَاوُاْ لَاڢِيَ؞»
28مِكَيَ يَأَمْسَ يَثٜىٰ «عِدَنْ كَدَاوُاْ لَاڢِيَ، تُواْ، بَ يَهْوٜىٰهْ نٜىٰ يَيِ مَغَنَ دَنِے بَ؞» مِكَيَ يَسَاكٜىٰ ثٜىٰوَ «كُواْوَ ڢَا يَجِ أَبِنْدَ نَڢَطَا!»#مَيْ شَـ 18.22
مُتُوَرْ أَهَبْ
﴿2 تَارْ 18.28-34﴾
29دُواْمِنْ حَكَ سَرْكِے يٜىٰهُواْشَڢَتْ نَ يَهُودَ دَ سَرْكِے أَهَبْ نَ إِسْرَٰٓءِيلَ سُكَ تَڢِے دُواْمِنْ سُڢَاطَوَ رَمُواتْ غِلٜىٰيَدْ دَ يَاڧِ؞ 30سَيْ سَرْكِے أَهَبْ يَثٜىٰ وَ سَرْكِے يٜىٰهُواْشَڢَتْ «ذَنْ ثَنْجَ كَمَنِّنَ إِنْشِغَ يَاڧِنْ، عَمَّا كَيْ كَسَا رِيغُنَنْ مُلْكِنْكَ؞»
31سَرْكِنْ سُورِيَ كُوَ يَبَا شُوغَبَنِّنْ كٜىٰكُنَنْ دُواْكِنْ يَاڧِنْسَ تَلَاتِنْ دَ بِيُ عُمَرْنِ ثٜىٰوَ كَدَ سُيِ يَاڧِ دَ كُواْ ڧَرَمِ كُواْ بَبَّنْ سُواْجَ، سَيْدَيْ سَرْكِنْ إِسْرَٰٓءِيلَ كَطَيْ؞ 32سَعَدَّ سُكَغَ سَرْكِے يٜىٰهُواْشَڢَتْ، سَيْ سُكَثٜىٰ «بَاشَكَّ غَ سَرْكِنْ إِسْرَٰٓءِيلَ؞» سَيْ سُكَ جُويَا دُواْمِنْ سُيِ يَاڧِ دَشِ؞ عَمَّا دَ سَرْكِے يٜىٰهُواْشَڢَتْ يَيِ إِيهُ، 33سَيْ سُكَ غَانٜىٰ بَشِينٜىٰ سَرْكِنْ إِسْرَٰٓءِيلَ بَ، سَيْ سُكَ دَيْنَ بِنْسَ؞ 34وَنِ سُواْجَنْ سُورِيَ يَهَرْبَ كِبِيَرْسَ أَ حَكَ كَوَيْ، سَيْ كِبِيَرْ تَشِغَ جِكِنْ سَرْكِنْ إِسْرَٰٓءِيلَ دَيْدَيْ عِنْدَ سَاشٜىٰ بِيُ نَرِغَرْ ڧَرْڢٜىٰنْسَ سُكَ حَطُ؞ سَيْ يَثٜىٰ وَمَيْ تُوڧِنْ كٜىٰكٜىٰنْ دُواْكِنْسَ «كَجُويَا كَڢِتَرْ دَنِے دَغَ يَاڧِنْ، غَمَا أَنْيِ مِنِ رَوْنِ سُواْسَيْ؞»
35يَاڧِنْ يَثِيغَبَدَ ڟَنَنِ سُواْسَيْ أَ رَانَرْ؞ عَكَ ذَوْنَرْ دَ سَرْكِے أَهَبْ دَ بَايَنْسَ أَجِنْغِنٜىٰ ثِكِنْ كٜىٰكٜىٰنْ دُواْكِنْسَ دُواْمِنْ يَڢُسْكَنْثِ سُورِيَاوَنْ؞ جِنِنْ رَوْنِنْ دَ عَكَيِ مَسَ يَيِ تَظُبَ عَثِكِنْ كٜىٰكٜىٰنْ دُواْكِنْسَ؞ سَيْ ثَنْ دَ يَمَّ يَمُتُ؞ 36دَڢَاطُوَرْ رَانَ سَيْ شٜىٰلَ تَبِے ثِكِنْ دُكَنْ سُواْجُواْجِنْ ثٜىٰوَ «كُواْوَنٜىٰ مُتُمْ يَكُواْمَ غَرِنْسَ دَ ڧَسَرْسَ!»
37تَهَكَ أَهَبْ يَمُتُ، عَكَ كَٰوُاْ شِ سَمَرِيَ عَكَ بِنّٜىٰشِ؞ 38عَتَڢْكِنْ سَمَرِيَ عَكَ وَنْكٜىٰ جِنِنْسَ دَ يَظُبَ عَكٜىٰكٜىٰنْ دُواْكِنْ؞ كَرْنُكَ كُوَ سُكَ لَشٜىٰ جِنِنْ، كَارُوَيْ كُمَ سُكَيِ وَنْكَ دَ ضُوً جِنِنْ، بِسَغَ مَغَنَرْ يَهْوٜىٰهْ؞
39سَوْرَنْ أَيُّكَنْ أَهَبْ دَ كُمَ دُكَنْ أَبِنْدَ يَيِ دَ غِدَنْ هَڧُواْرَنْ غِيوَ وَنْدَ يَغِنَ دَ دُكَنْ بِرَنٜىٰنْدَ يَڠَغْڠَرَ، سُنَ أَرُبُوثٜىٰ عَثِكِنْ لِتَّڢِنْ تَارِيحِنْ سَرَاكُنَنْ إِسْرَٰٓءِيلَ؞ 40أَهَبْ يَكُواْمَ غَ كَاكَنِّنْسَ عَكَ بِنّٜىٰشِ؞ سَيْ طَنْسَ أَهَظِيَ يَغَاجٜىٰشِ يَذَمَ سَرْكِے؞
سَرْكِے يٜىٰهُواْشَڢَتْ نَ يَهُودَ
﴿شٜىٰكَرَا 870-848 كَاڢِنْ حَيْڢُوَرْ عِيسَىٰ﴾
﴿2 تَارْ 20.31—21.1﴾
41أَ شٜىٰكَرَا تَهُطُ تَمُلْكٍ سَرْكِے أَهَبْ نَ إِسْرَٰٓءِيلَ، سَرْكِے يٜىٰهُواْشَڢَتْ طَنْ أَسَ يَڢَارَ مُلْكٍ يَهُودَ؞ 42يٜىٰهُواْشَڢَتْ يَنَدَ شٜىٰكَرَا تَلَاتِنْ دَ بِيَرْ سَعَدَّ يَڢَارَ مُلْكِ، يَكُمَيِ مُلْكِ حَرْ شٜىٰكَرَا عَشِرِنْ دَ بِيَرْ أَ عُرُوشَلِيمَ؞ سُونَنْ مَامَرْسَ أَظُبَ، یَرْ شِلْهِ؞ 43يَيِ تَڢِيَ أَ حَنْيَ مَيْݣَوْ كَمَرْ بَابَنْسَ أَسَ، بَيْ كُمَ كَوْثٜىٰبَ؞ يَيِ أَبِنْدَ يَكٜىٰ دَيْدَيْ أَعِدُوانْ يَهْوٜىٰهْ؞ عَمَّا دَيْ بَيْ كَوَرْدَ وَطَنْسُ وُرَارٜىٰنْ سُجَّدَ بَ، مُتَنٜىٰ سُكَ ثِيغَبَدَ مِيڧَ هَدَايُ سُنَ ڧُواْنَ تُرَارٜىٰ أَوُرَارٜىٰنْ سُجَّدَ؞ 44يٜىٰهُواْشَڢَتْ يَكُمَيِ يَرْجٜىٰجٜىٰنِيَرْ ذَمَنْ لَاڢِيَ دَ سَرْكِنْ إِسْرَٰٓءِيلَ؞
45سَوْرَنْ أَيُّكَنْ يٜىٰهُواْشَڢَتْ دَ إِيكُوانْ مُلْكِنْسَ دَ يَنُونَ دَ يَاڧٜىٰ يَاڧٜىٰنْ دَ يَيِ، سُنَ أَرُبُوثٜىٰ عَثِكِنْ لِتَّڢِنْ تَارِيحِنْ سَرَاكُنَنْ يَهُودَ؞ 46سَوْرَنْ مَظَا دَ مَاتَانْدَ سُكٜىٰيِنْ كَارُوَنْثِ أَوُرَارٜىٰنْ سُجَّدَ وَطَنْدَ سُكَ رَغُ دَغَ زَامَانِنْ بَابَنْسَ أَسَ، يَكَوَرْ دَسُو دَغَ ڧَسَرْ؞
47ڧَسَرْ عٜىٰدُوامْ كُوَ بَاتَدَ سَرْكِے أَ لُواْكَثِنْ، سَبُواْدَ حَكَ سَرْكِنْ يَهُودَ يَنَطَ مَتَيْمَكِ يَيِ مُلْكِنْسُ؞
48سَرْكِے يٜىٰهُواْشَڢَتْ يَيِ جِضَاغٜىٰنْ ضُوَ مَاسُبِنْ بَبَّرْ تٜىٰكُ دُواْمِنْ سُتَڢِے ڧَسَرْ عُواْڢِرْ سُكَٰوُاْ ظِينَارِيَ؞ عَمَّا بَسُيِ تَڢِيَرْ بَ، سَبُواْدَ سُنْ هَلَّكَ أَ عٜىٰظِيُوانْغٜىٰبٜىٰرْ؞ 49سَرْكِے أَهَظِيَ طَنْ أَهَبْ يَسُواْ مُتَنٜىٰنْسَ سُيِ تَڢِيَ دَ جِضَاغٜىٰنْ ضُوَ تَرٜىٰدَ مُتَنٜىٰنْ يٜىٰهُواْشَڢَتْ، عَمَّا يٜىٰهُواْشَڢَتْ يَڧِ؞
50يٜىٰهُواْشَڢَتْ يَكُواْمَ غَ كَاكَنِّنْسَ، عَكَ بِنّٜىٰشِ تَرٜىٰدَسُو عَبِرْنِنْ دَاوُدَ؞ سَيْ طَنْسَ يٜىٰهُواْرَمْ يَغَاجٜىٰشِ يَذَمَ سَرْكِے؞
سَرْكِے أَهَظِيَ نَ إِسْرَٰٓءِيلَ
﴿شٜىٰكَرَا 853-852 كَاڢِنْ حَيْڢُوَرْ عِيسَىٰ﴾
51أَ شٜىٰكَرَا تَغُواْمَشَا بَݣَويْ تَمُلْكٍ سَرْكِے يٜىٰهُواْشَڢَتْ نَ يَهُودَ، سَرْكِے أَهَظِيَ طَنْ أَهَبْ يَڢَارَ مُلْكٍ إِسْرَٰٓءِيلَ أَ سَمَرِيَ؞ أَهَظِيَ يَيِ شٜىٰكَرَا بِيُ يَنَ مُلْكٍ إِسْرَٰٓءِيلَ؞ 52يَعَيْكَتَ مُغُنْتَا أَعِدُوانْ يَهْوٜىٰهْ، يَكُمَيِ تَڢِيَ ثِكِنْ حَنْيَرْ بَابَنْسَ دَ تَمَامَرْسَ، كُمَ أَ مُوغُوَرْ حَنْيَرْ يٜىٰرُواْبُواْوَمْ طَنْ نٜىٰبَتْ، وَنْدَ يَسَا مُتَنٜىٰنْ إِسْرَٰٓءِيلَ سُكَيِ ذُنُوبِ؞ 53يَيِ وَغُنْكِنَّنْ بَعَلْ سُجَّدَ دَ حِدِمَ، يَا سَا يَهْوٜىٰهْ اللَّهْ نَ إِسْرَٰٓءِيلَ يَيِ ڢُشِے دَيْدَيْ كَمَرْ يَدَّ بَابَنْسَ يَسَا يَهْوٜىٰهْ يَيِ ڢُشِے؞
Currently Selected:
1 سَرَاكُنَ 22: hauAS
Highlight
Copy
Compare
Share
Want to have your highlights saved across all your devices? Sign up or sign in
Hausa Common Language Ajami Bible © The Bible Society of Nigeria, 2020
