1 سَرَاكُنَ 1
1
سَرْكِے دَاوُدَ أَڟُوڢَرْسَ
1سَرْكِے دَاوُدَ كُوَ يَڟُوڢَ، شٜىٰكَرُنْسَ كُمَ سُنْيِيَوَ، بَيْ عِيَ جِنْ طُمِبَ، كُواْ دَ أَنْرُڢٜىٰشِ دَ بَرْغُواْ؞ 2سَيْ مَاسُ يِمَسَ حِدِمَ سُكَثٜىٰ «رَنْكَيَدَطٜىٰ، بَرِ مُنٜىٰمُواْ مَكَ يَارِنْيَرْ دَ ذَاتَ ذَوْنَ تَرٜىٰدَكَيْ تَلُورَ دَكَيْ؞ ذَاتَ دِنْغَ ݣُونْتَ أَغٜىٰڢٜىٰنْكَ دُوانْ تَسَا كَجِ طُمِ، يَا مَيْغِرْمَ سَرْكِے؞»
3عَكَ شِغَ كُواْعِنَ عَڧَسَرْ إِسْرَٰٓءِيلَ أَنَ نٜىٰمَنْ ݣَكْݣَوَرْ يَارِنْيَ؞ سَيْ عَكَ سَامِ وَتَ يَارِنْيَ مَيْ سُونَ أَبِشَغْ أَغَرِنْ شُنٜىٰمْ، عَكَ كَٰوُاْوَ سَرْكِے؞ 4يَارِنْيَرْ كُوَ ݣَكْݣَوَاثٜىٰ سُواْسَيْ، تَلُورَ دَ سَرْكِے تَنَ مَسَ حِدِمَ؞ عَمَّا سَرْكِے بَيْيِ جِمَاعِ دَ عِتَبَ؞
أَدُواْنِيَ يَنٜىٰمِ يَڨُوثٜىٰ مُلْكِ
5أَدُواْنِيَ، طَنْ دَ هَغِّتْ تَحَيْڢَا وَ دَاوُدَ، يَڢِتُواْ دَ كَنْسَ يَنَ ثٜىٰوَ «نِے ذَنْ ذَمَ سَرْكِے!» سَبُواْدَ حَكَ سَيْ يَشِرْيَ وَكَنْسَ كٜىٰكُنَنْ دُواْكِ دَ دَوَكِ، يَكُمَ سَامِ مُتَنٜىٰ حَمْسِنْ سُوُثٜىٰ غَبَنْسَ؞#2 سَمْ 3.4 6أَ دُكَنْ رَايُوَرْسَ بَابَنْسَ بَيْتَٻَ ڟَاوَتَا مَسَ يَثٜىٰ «دُوانْمٜىٰ كَكٜىٰيِنْ حَكَ؟» بَ؞ أَنْ حَيْڢِ أَدُواْنِيَ بَايَنْ أَبْسَلُوامْ، شِے مَا ݣَكْݣَوَنْ مُتُمْ نٜىٰ؞ 7أَدُواْنِيَ يَيِ مَغَنَ دَ يُواْوَبْ طَنْ ظٜىٰرُوِيَ دَ كُمَ أَبِيَتَرْ ڢِرِسْتِ؞ سُو كُوَ سُكَ يَرْدَ سُيِ غُواْيُوانْ بَايَنْسَ؞ 8عَمَّا ظَدُواكْ ڢِرِسْتِ دَ بٜىٰنَيَ طَنْ يٜىٰهُواْيِدَ دَ أَنَّبِے نَتَنْ دَ شِمٜىٰيِ دَ رٜىٰيِ دَ سُواْجُواْجِنْ دَاوُدَ مَڢِيَ عِيَ يَاڧِ بَسُ غُواْيِ بَايَنْ أَدُواْنِيَ بَ؞
9وَتَرَانَ أَدُواْنِيَ يَتَڢِے دُوڟٜىٰنْ ذُواْهٜىٰلٜىٰتْ كُسَدَ عٜىٰنْرُواْغٜىٰلْ، عِنْدَ يَيِ هَدَايَرْ تُمَكِ دَ شَانُنْ نُواْمَ دَ شَانُنْ دَ عَكٜىٰكِيوُاْ أَغِدَا؞ يَكُمَ غَيَّثِ یَنْعُوَنْسَ، وَتُواْ سَوْرَنْ یَیَنْ سَرْكِے دَاوُدَ، تَرٜىٰدَ دُكَنْ دَتَّاوَنْ سَرْكِے دَ سُكَ ڢِتُواْ دَغَ يَهُودَ؞ 10عَمَّا أَدُواْنِيَ بَيْ غَيَّثِ أَنَّبِے نَتَنْ دَ بٜىٰنَيَ دَ سُواْجُواْجِنْ دَاوُدَ مَڢِيَ عِيَ يَاڧِ، كُواْ كُوَ طَنْعُوَنْسَ سُلَيْمَٰنُ بَ؞
كُوكَنْ نٜىٰمَ أَنَطَ سُلَيْمَٰنُ سَرْكِے
11سَعَنً أَنَّبِے نَتَنْ يَتَڢِے وُرِنْ بَتْشٜىٰبَةُ مَامَرْ سُلَيْمَٰنُ، يَتَمْبَيٜىٰتَ يَثٜىٰ «بَكِجِ ثٜىٰوَ أَدُواْنِيَ طَنْ هَغِّتْ يَنَطَ كَنْسَ سَرْكِے بَ؟ كُمَ سَرْكِے دَاوُدَ بَيْ سَنْ كُواْمٜىٰ عَكَيْبَ!#2 سَمْ 12.24 12تُواْ، بَرِ إِنْ بَاكِ شَوَرَا يَدَّ ذَاكِ ثٜىٰثِ رَنْكِ دَ نَطَنْكِ سُلَيْمَٰنُ؞ 13يَنْذُ نَنْ كِتَڢِے وُرِنْ سَرْكِے دَاوُدَ كِثٜىٰمَسَ، ‹رَنْكَيَدَطٜىٰ، سَرْكِے، بَكَيْ كَايِ مِنِ أَلْڧَوَرِ دَ ضَنْڟُوَا ثٜىٰوَ طَانَ سُلَيْمَٰنُ ذَيْ يِمُلْكِ بَايَنْكَ يَذَوْنَ عَكُجٜىٰرَرْ مُلْكِنْكَبَ؟ تُواْ، يَيَ عَكَيِ أَدُواْنِيَ يَذَمَ سَرْكِے؟› 14يَايِنْ دَ كِكٜىٰ ثِكِنْ مَغَنَ دَ سَرْكِے، ذَنْ شِغُواْ إِنْ تَبَّتَرْ دَ مَغَنَرْكِ؞»
15سَيْ بَتْشٜىٰبَةُ تَشِغَ ثِكِنْ طَاكِنْ ݣُونْثِيَرْ سَرْكِے؞ أَ لُواْكَثِنْ كُوَ، سَرْكِے يَڟُوڢَ سُواْسَيْ، كُمَ أَبِشَغْ یَرْ غَرِنْ شُنٜىٰمْ ثٜىٰ تَكٜىٰيِ مَسَ حِدِمَ؞ 16بَتْشٜىٰبَةُ تَرُسُنَ دَ ڢُسْكَرْتَ حَرْ ڧَسَا تَغَيْ دَ سَرْكِے، سَيْ يَتَمْبَيٜىٰتَ يَثٜىٰ «مٜىٰكِكٜىٰ نٜىٰمَ؟»
17تَا أَمْسَ تَثٜىٰ «رَنْكَيَدَطٜىٰ، سَرْكِے! كَارِغَا كَا ضَنْڟٜىٰ مِنِ دَ سُونَنْ يَهْوٜىٰهْ اللَّهْ نْكَ ثٜىٰوَ سُلَيْمَٰنُ طَانَ نٜىٰ ذَيْ يِمُلْكِ بَايَنْكَ، ذَيْ كُوَ ذَوْنَ عَكُجٜىٰرَرْ مُلْكِنْكَ؞ 18غَاشِ يَنْذُ أَدُواْنِيَ يَذَمَ سَرْكِے، رَنْكَيَدَطٜىٰ، كُواْدَيَكٜىٰ بَكَ سَنِبَ؞ 19يَرِغَا يَمِيڧَ هَدَايَرْ شَانُو دَ دَبُّواْبِنْ دَ عَكَيِ كِيوُانْسُ أَغِدَا دَ تُمَكِ مَاسُيَوَ؞ يَغَيَّثِ أَبِيَتَرْ ڢِرِسْتِ دَ يُواْوَبْ شُوغَبَنْ سُواْجُواْجِنْكَ، تَرٜىٰدَ دُكَنْ یَیَ مَذَنْ سَرْكِے، عَمَّا بَيْ غَيَّثِ مَيْ حِدِمَرْكَ سُلَيْمَٰنُ بَ؞ 20رَنْكَيَدَطٜىٰ، أَغَرٜىٰكَ دُكَنْ جَمَعَرْ إِسْرَٰٓءِيلَ سُكٜىٰ ظُبَ عِدُواْ سُنَ جِرَا دُواْمِنْ كَڢَطَا مُسُ وَنْدَ ذَيْ ذَوْنَ عَكُجٜىٰرَرْ مُلْكِنْكَ بَايَنْكَ؞ 21عِدَنْ مَيْغِرْمَ سَرْكِے بَيْيِ حَكَبَ، بَايَنْ يَيِ بَرْثِ تَرٜىٰدَ كَاكَنِّنْسَ، ذَاعَ طَوْكٜىٰنِ دَ طَانَ سُلَيْمَٰنُ مَاسُثِنْ أَمَانَرْ ڧَسَانٜىٰ؞»
22سَعَدَّ تَكٜىٰ ثِكِنْ مَغَنَ دَ سَرْكِے، سَيْ أَنَّبِے نَتَنْ يَشِغَ؞ 23عَكَثٜىٰ وَ سَرْكِے «غَا أَنَّبِے نَتَنْ؞» دَ نَتَنْ يَذُواْ غَبَنْ سَرْكِے سَيْ يَرُسُنَ دَ ڢُسْكَرْسَ حَرْ ڧَسَا يَغَيْ دَ سَرْكِے؞ 24نَتَنْ يَثٜىٰ «رَنْكَيَدَطٜىٰ سَرْكِے، كُواْ كَسَنَرْ ثٜىٰوَ أَدُواْنِيَ نٜىٰ ذَيْ ذَمَ سَرْكِے بَايَنْكَ، يَذَوْنَ عَكُجٜىٰرَرْ مُلْكِنْكَ؟ 25غَمَا عَيَوْ طِنَّنْ يَتَڢِے يَمِيڧَ هَدَايَرْ شَانُو دَ دَبُّواْبِنْ دَ عَكَيِ كِيوُانْسُ أَغِدَا دَ تُمَكِ مَاسُيَوَ، كُمَ يَغَيَّثِ دُكَنْ یَیَ مَذَنْ سَرْكِے دَ شُوغَبَنِّنْ سُواْجُواْجِ دَ أَبِيَتَرْ ڢِرِسْتِ؞ غَاشِ كُوَ سُنَثِ سُنَشَا أَغَبَنْ أَدُواْنِيَ سُنَ ثٜىٰ مَسَ، ‹رَنْكَيَدَطٜىٰ، سَرْكِے أَدُواْنِيَ!› 26عَمَّا بَيْ غَيَّثٜىٰنِ مَيْ حِدِمَرْكَبَ، كُواْ ظَدُواكْ ڢِرِسْتِ، كُواْ بٜىٰنَيَ طَنْ يٜىٰهُواْيِدَ، كُواْ مَيْ حِدِمَرْكَ سُلَيْمَٰنُ؞ 27رَنْكَيَدَطٜىٰ، كُواْ غَسْكِيَثٜىٰ ثٜىٰوَ أَبِنْدَ يَكٜىٰ ڢَرُوَ دَ سَنِنْكَ نٜىٰ؟ كُمَ بَكَ كُواْ ڢَطَا وَوَنِ دَغَ ثِكِنْمُ مَاسُ حِدِمَرْكَ وَظَيْ ذَوْنَ عَكُجٜىٰرَرْ مُلْكِنْكَ بَايَنْكَبَ؞»
أَنَّطَ سُلَيْمَٰنُ سَرْكِے
28سَعَنً سَرْكِے دَاوُدَ يَثٜىٰ «عَكِرَا مِنِ بَتْشٜىٰبَةُ تَدَاوُاْ ثِكِ؞» سَيْ تَشِغُواْ وُرِنْ سَرْكِے تَڟَيَ أَغَبَنْسَ؞ 29سَرْكِے يَثٜىٰ مَتَ «نَا ضَنْڟٜىٰ دَ سُونَنْ يَهْوٜىٰهْ مَيْ رَيْ وَنْدَ يَڢَنْشٜىٰنِ دَغَ كُواْوَثٜىٰ وَهَلَ، ذَنْ ثِكَ رَنْڟُوَاتَا يَوْ؞ 30يَوْ ذَنْ ثِكَ ضَنْڟُوَارْدَ نَيِ مِكِ ثِكِنْ سُونَنْ يَهْوٜىٰهْ اللَّهْ نَ إِسْرَٰٓءِيلَ ثٜىٰوَ طَنْكِ سُلَيْمَٰنُ ذَيْ غَاجٜىٰنِ يَذَمَ سَرْكِے، ذَيْ ذَوْنَ عَكُجٜىٰرَرْ مُلْكِنَ بَايَنَ؞»
31سَيْ بَتْشٜىٰبَةُ تَرُسُنَ دَ ڢُسْكَرْتَ حَرْ ڧَسَا تَثٜىٰ وَسَرْكِے «بَرِ رَنْ مَيْغِرْمَنَ سَرْكِے دَاوُدَ يَدَطٜىٰ حَرْ أَبَدَا!»
32سَرْكِے دَاوُدَ يَعُمَرْتَ عَكِرَا مَسَ ظَدُواكْ ڢِرِسْتِ دَ أَنَّبِے نَتَنْ دَ بٜىٰنَيَ طَنْ يٜىٰهُواْيِدَ؞ دَ سُكَ إِسُواْ غَبَنْ سَرْكِے سَيْيَثٜىٰ مُسُ، 33«كُطَوْكِ سُلَيْمَٰنُ تَرٜىٰدَ دَتَّاوَنَ، كُسَا سُلَيْمَٰنُ يَهَوْ جَاكِنْ دُواْكِنَ كُغَنْغَرَ دَشِ ذُوَا غِهُوانْ؞ 34كُسَا ظَدُواكْ ڢِرِسْتِ دَ أَنَّبِے نَتَنْ سُظُبَ مَسَ مَنْ كٜىٰٻٜىٰوَ أَوُرِنْ، سُنَطَشِ سَرْكِنْ إِسْرَٰٓءِيلَ؞ سَيْ كُبُوسَ ڧَهُواْ كُثٜىٰ، ‹رَنْكَيَدَطٜىٰ، سَرْكِے سُلَيْمَٰنُ!› 35سَيْ كُهَوْرُواْ دَشِ نَنْ يَشِغَ ثِكِ يَذَوْنَ عَكُجٜىٰرَرْ مُلْكِنَ؞ غَمَا شِے ذَيْ ذَمَ سَرْكِے بَايَنَ كُمَ نَسَا شِ يَذَمَ سَرْكِنْ إِسْرَٰٓءِيلَ دَ يَهُودَ؞» 36سَيْ بٜىٰنَيَ طَنْ يٜىٰهُواْيِدَ يَأَمْسَا وَ سَرْكِے يَثٜىٰ «أَمِينْ! بَرِ يَهْوٜىٰهْ اللَّهْ نَمَيْغِرْمَ سَرْكِے يَتَبَّتَرْ دَ كُواْمٜىٰ؞ 37كَمَرْ يَدَّ يَهْوٜىٰهْ يَكَسَنْثٜىٰ تَرٜىٰدَ مَيْغِرْمَنَ سَرْكِے، حَكَكُمَ بَرِ يَكَسَنْثٜىٰ تَرٜىٰدَ سُلَيْمَٰنُ، يَكُمَسَا مُلْكٍ سُلَيْمَٰنُ يَڢِ نَمَيْغِرْمَنَ سَرْكِے دَاوُدَ؞»
38سَيْ ظَدُواكْ ڢِرِسْتِ دَ أَنَّبِے نَتَنْ دَ بٜىٰنَيَ طَنْ يٜىٰهُواْيِدَ، تَرٜىٰدَ مَاسُ غَادِنْ سَرْكِے#1.38 مَاسُ غَادِنْ سَرْكِے: دَ إِبْرَانِيَنْثِ أَنْرُبُوتَ «كٜىٰرٜىٰتِيَاوَا» دَ «ڢٜىٰلٜىٰتِيَاوَا» نٜىٰ أَنَنْ؞ سُكَ غَنْغَرَ؞ سُكَسَا سُلَيْمَٰنُ عَكَنْ جَاكِنْ دُواْكِنْ سَرْكِے دَاوُدَ، سَعَنً سُكَ رَكَ شِ ذُوَا غِهُوانْ؞ 39أَوُرِنْ ظَدُواكْ ڢِرِسْتِ يَطَوْكِ ڧَهُوانْ مَيْ وَنْدَ يَكَٰوُاْ دَغَ تٜىٰنْتِنْ يَهْوٜىٰهْ، يَظُبَاوَ سُلَيْمَٰنُ يَنَطَشِ سَرْكِے؞ سَيْ سُكَ بُوسَ ڧَهُواْ، دُكَنْ جَمَعَرْ كُوَ سُكَ طَغَ مُرْيَ سُكَثٜىٰ «رَنْكَيَدَطٜىٰ، سَرْكِے سُلَيْمَٰنُ!» 40سَيْ دُكَنْ جَمَعَ سُكَ هَوْرُواْ سُكَبِيشِ، سُنَ بُوسَ سَرٜىٰوَ سُنَ مُرْنَ سُواْسَيْ، حَرْ مَا ڧَسَا تَغِرْغِظَ سَبُواْدَ إِيهُنْدَ سُكٜىٰيِ؞
41أَدُواْنِيَ تَرٜىٰدَ دُكَنْ بَڧِنْ دَسُكٜىٰ دَشِ سُكَجِ إِيهٌ دَيْدَيْ سُنَ ڧَارٜىٰ بِكِنْسُ؞ دَ يُواْوَبْ يَجِ بُوسَرْ ڧَهُواْ سَيْيَثٜىٰ «مٜىٰ يَجَٰوُاْ إِيهُ عَثِكِنْ بِرْنِ حَكَ؟» 42يُواْوَبْ يَنَ ثِكِنْ مَغَنَ كٜىٰنَنْ، سَيْغَاشِ يُواْنَتَنْ طَنْ أَبِيَتَرْ ڢِرِسْتِ يَ إِسُواْ وُرِنْ؞ سَيْ أَدُواْنِيَ يَثٜىٰ مَسَ «شِغُواْ، غَمَا كَيْ مُتُمِنْ كِرْكِنٜىٰ، لَلَّيْ كَنَ كَٰوُاْ لَابَرِ مَيْ دَاطِے؞»
43يُواْنَتَنْ يَثٜىٰ وَ أَدُواْنِيَ «أَعَ! مَيْغِرْمَنْمُ سَرْكِے دَاوُدَ يَنَطَ سُلَيْمَٰنُ سَرْكِے! 44سَرْكِے كُمَ يَعَيْكِ ظَدُواكْ ڢِرِسْتِ دَ أَنَّبِے نَتَنْ دَ بٜىٰنَيَ طَنْ يٜىٰهُواْيِدَ دَ مَاسُ غَادِنْ سَرْكِے تَرٜىٰدَ سُلَيْمَٰنُ ذُوَا غِهُوانْ؞ سُكَسَا يَهَوْ جَاكِنْ دُواْكِنْ سَرْكِے؞ 45ظَدُواكْ دَ نَتَنْ سُكَ ظُبَ مَسَ مَنْ كٜىٰٻٜىٰوَ سُكَ نَطَشِ سَرْكِے أَ غِهُوانْ؞ يَنْذُ نٜىٰ سُكَ هَوْرُواْ ثِكٜىٰ دَسُورُوتُ دَ مُرْنَ؞ دَلِيلِنْ إِيهٌ دَ كُكٜىٰجِ يَكٜىٰ ڢِتُواْوَ دَغَ بِرْنِنْ كٜىٰنَنْ؞ 46بَنْدَ حَكَمَا سُلَيْمَٰنُ يَا رِغَا يَا ذَوْنَ عَكُجٜىٰرَرْ مُلْكٍ سَرْكِے؞ 47دُكَنْ دَتَّاوَنْ سَرْكِے كُمَ سُنْ تَڢِے سُنْيِ وَمَيْغِرْمَنْمُ سَرْكِے دَاوُدَ غَيْسُوَا سُنَ ثٜىٰوَ ‹اللَّهْ نْكَ يَسَا سُلَيْمَٰنُ يَيِ سُونَ ڢِيٜىٰ دَكَيْ، بَرِ مُلْكِنْسَ كُمَ يَڢِ نَاكَ!› سَيْ سَرْكِے يَيِ سُجَّدَ عَكَنْ غَدُوانْسَ؞ 48سَعَنً يَثٜىٰ، ‹أَلْبَرْكَ تَا تَبَّتَا غَ يَهْوٜىٰهْ اللَّهْ نَ إِسْرَٰٓءِيلَ، وَنْدَ يَوْ يَبَانِ وَنْدَ ذَيْ ذَوْنَ عَكُجٜىٰرَرْ مُلْكِنَ، عِدَنُونَ كُوَ سُنَ غَنِ؞› »
49دَجِنْ حَكَ، سَيْ دُكَنْ بَڧِنْ أَدُواْنِيَ سُكَ ڟُواْرَتَ سُكَتَاشِ، كُواْوَ يَكَامَ حَنْيَرْسَ؞ 50أَدُواْنِيَ، سَبُواْدَ يَنَ جِنْ ڟُواْرُوانْ سُلَيْمَٰنُ، يَا تَاشِ يَتَڢِے وُرِنْ تٜىٰنْتِنْ يَهْوٜىٰهْ يَكَامَ ڧَهُواْنِنْ بَغَدٜىٰنْ؞ 51عَكَ ڢَطَا وَ سُلَيْمَٰنُ ثٜىٰوَ أَدُواْنِيَ يَنَ جِنْ ڟُواْرُوانْسَ؞ غَاشِ يَكَامَ ڧَهُواْنِنْ بَغَدٜىٰ يَنَ ثٜىٰوَ «بَرِ سَرْكِے سُلَيْمَٰنُ يَرَنْڟٜىٰ مِنِ ثٜىٰوَ بَذَيْ كَشٜىٰنِبَ!»
52سُلَيْمَٰنُ يَأَمْسَ يَثٜىٰ «عِدَنْ يَا نُونَ كَنْسَ مُتُمِنْ كِرْكِ نٜىٰ، كُواْ غَاشِنْ كَنْسَ طَيَ بَذَيْ ڢَاطِ عَڧَسَابَ؞ عَمَّا عِدَنْ أَنْسَامٜىٰشِ دَ مُغُنْتَا، ذَيْ مُتُ؞» 53سَيْ سَرْكِے سُلَيْمَٰنُ يَعَيْكَ عَتَڢِے أَ سَوْكَرْ دَشِ دَغَ بِسَنْ بَغَدٜىٰنْ عَكَٰوُاْ شِ؞ دَ أَدُواْنِيَ يَذُواْ سَيْ يَرُسُنَ دَ ڢُسْكَرْسَ حَرْ ڧَسَا أَغَبَنْ سَرْكِے سُلَيْمَٰنُ؞ سُلَيْمَٰنُ كُوَ يَثٜىٰ مَسَ «تَڢِے غِدَنْكَ؞»
Currently Selected:
1 سَرَاكُنَ 1: hauAS
Highlight
Copy
Compare
Share
Want to have your highlights saved across all your devices? Sign up or sign in
Hausa Common Language Ajami Bible © The Bible Society of Nigeria, 2020
