2Makabeowo 5
5
Ŋutegawo ku ɖe aʋawɔwɔ ŋu
1Le ɣeyiɣi sia me la, Antioxo ho aʋa ɖe Egipte-nyigba ŋu zi evelia. 2Eva eme, abe ŋkeke bla ene sɔŋ ene, be wokpɔ sɔdola siwo le awu siwo wotsɔ sikaka lɔ̃e la me. Wole sɔwo dzi nɔ yiyim le dua me to ya me, le aʋalɔgowo me; hlo kple aʋawɔyiwo le wo si. 3Wolũ ɖe wo nɔewo dzi tso akpa sia akpa. Wole akɔtakpoxɔnuwo dom ɖe dzi, akplɔwo ƒo ƒu. Wole aŋutrɔwo dam eye aʋawɔnu vovovo siwo le dzo dam abe sika ene la le wo si. 4Eya ta ame sia ame nɔ gbe dom ɖa be nu siwo kpɔm yewole la nahe ɖagbe vɛ.
Yason dze Yerusalem dzi
5Esi wobewobe aɖe ɖi alakpatɔe be Antioxo ku la, Yason ƒo ƒu ŋutsu siwo sɔ gbɔ wu akpe ɖeka, eye wòho aʋa ɖe dua ŋu kpata. Wona ame siwo nɔ gliawo dzi la na ta, gbugbɔ yi megbe, eye mlɔeba woxɔ du la. Menelao yi ɖadi sitsoƒe le sitsoƒexɔ sesẽ la me. 6Ke Yason yi edzi nɔ eƒe dukɔmeviwo wum madzudzɔmadzudzɔe eye mekpɔe dze sii be ye ŋutɔ yeƒe ƒometɔwo dziɖuɖu la nye ye ŋutɔ yeƒe dzɔgbevɔ̃e gãtɔ o. Ebu xaa be yele dziɖuɖukplu xɔm ɖe futɔwo ŋu, eye menye ɖe yewoƒe dukɔmeviwo ŋu o. 7Mete ŋu xɔ dziɖuɖua hã o. Le nuwuwu la, ŋukpe ko wòɖu tso eƒe nugbeɖoɖo la me. Ale wògasí yi Amon-nyigba dzi. 8Mlɔeba la, eƒe agbe va wu enu nublanuitɔe. Wotso enu na Aretas, Arabiatɔwo ƒe dziɖula. Enɔ sisím tso du me yi du me; ame sia ame nɔ eyome tim. Wolé fui abe aglãdzela ɖe se la ŋu ene, eye amewo tsri eyama abe eƒe dukɔ la kple eƒe dukɔmeviwo wula ene. Ale wonyàe ɖo ɖe Egipte-nyigba dzi. 9Afi ma la, eya ame si nyà ame geɖe tso woawo ŋutɔ denyigba dzi yi aboyo me la, ku le aboyo me. Eɖo tɔdziʋu be yeayi Lakedaemonia le mɔkpɔkpɔ me be yeakpɔ sitsoƒe le afi ma, esi ƒomedodo le woawo kple eya dome ta. 10Eya ame si na ame geɖewo ku ɖi, ke womekpɔ amewo woaɖi wo o la, ŋutɔ ku eye ame aɖeke mefae o. Womewɔ ameɖikɔnu aɖeke ƒomevi nɛ o, eye womeɖii ɖe tɔgbuiawo ƒe yɔdo me o.
Antioxo ho aʋa ɖe Yerusalem ŋu
(Mak I, 1.20-63)
11Esi fia la se nu siwo dzɔ la, etsɔe be Yudea-dukɔ la le aglã dzem. Edo dɔmedzoe dzo le Egipte, eye wòɖaxɔ dua sesẽtɔe. 12Eɖe gbe na eƒe asrafowo be woawu ame sia ame si wodo goe nublanuimakpɔtɔe, eye woatso ta le ame siwo yi ɖe woƒe aƒewo me la hã nu. 13Ale ɖekakpuiwo kple ame tsitsiwo tsrɔ̃, ŋutsuviwo kple nyɔnuwo kple ɖeviwo ku, eye wowu ɖeviwo kple nyɔnuviwo kple ɖevi suewo kple yi. 14Le ŋkeke etɔ̃ ɖeɖe ko me la, ame akpe bla enyi tsrɔ̃. Ame akpe bla ene ku le aʋawɔwɔ, ŋkume kple ŋkume me, eye wodzra ame agbɔsɔsɔ ma ke wozu kluviwo.
15Esia meɖi ƒo na Menelao, ame si medea bubu se la ŋu o la o, eye wòde eƒe dukɔ la asi la. Ale wokplɔ Antioxo wòdo dzi ge ɖe gbedoxɔ si le kɔkɔe wu ɖe sia ɖe le xexe blibo la me la me. 16Etsɔ eƒe asi makɔmakɔwo tsɔ vɔsakplu kɔkɔeawo eye vɔsanunana, si fia bubuwo na be woatsɔ ado kɔkɔ ahade bubu teƒea ŋu la, elɔ wo kple eƒe asi madzemadzeawo. 17Dàdatɔe la, Antioxo mekpɔe dze sii, be Aƒetɔ la do dziku ɖe eƒe ame siwo le dua me la ƒe nuvɔ̃wo ta o, eye be esia tae wòɖe kɔ ɖa le teƒe kɔkɔe la ŋu hena ɣeyiɣi ʋɛ aɖe o. 18Gake nenye ɖe ameawo mewɔ nuvɔ̃ geɖe o la, anye ne woaƒo Antioxo eye woatrɔe enumake tso eƒe amemabunuwɔna la me. Woawɔe nenema esime wòdo va ŋgɔ abe ale si wowɔ na Heliodoro, ame si fia Seleuko dɔ ɖa be wòava lé ŋku ɖe gadzraɖoƒe la ŋu la ene. 19Gake Aƒetɔ la metia dukɔ la ɖe teƒe kɔkɔe la ta o, ke boŋ etia teƒe la ɖe dukɔa ta. 20Eya ta teƒe la hã kpɔ gome le dzɔgbevɔ̃e si dzɔ ɖe dukɔa dzi la me, abe ale si, emegbe la, wòkpɔ gome le nu nyui siwo va na dukɔ la mee ene. Ale nu si gbɔ wogbe nu le esime Ŋusẽkatãtɔ la do dziku la, wogbugbɔe ɖo tè le ŋutikɔkɔe blibo me, esi Aƒetɔ gã la gawɔ ɖeka kpli wo.
Wogaho aʋa ɖe Yerusalem ŋu
21Ale Antioxo tsɔ klosaloga kilo akpe bla ade vɔ eve tso gbedoxɔ la me dzoe, eye wòwɔ kaba yi Antioxia. Ebu xaa, le eɖokuidodo ɖe dzime, be yeate ŋu aɖo tɔdziʋu ato anyigba dzi, eye yeate ŋu azɔ afɔ le atsiaƒu dzi, elabe edo eɖokui ɖe dzi le susu me. 22Eɖo nutomedziɖulawo ɖi be woate ameawo ɖe anyi. Le Yerusalem la, eɖo Filipo, Frigiatɔ, ame si ƒe nɔnɔme vlo wu ame si ɖoe la tɔ, la ɖi. 23Eda Androniko ɖe Gerizim. Hekpe ɖe ame siawo ŋu la, egble Menelao, ame si ɖu amegã ɖe wo detɔwo dzi wu ame bubuawo la ɖi. Le eƒe vɔɖivɔ̃ɖi me ɖe wo detɔ Yuda-vidzidziawo ŋu ta la, 24Antioxo dɔ Apolonio, Misiatɔwo ƒe aʋakplɔla hã ɖa. Ekplɔ asrafo akpe bla eve vɔ eve, eye wòɖe gbe nɛ be newu ŋutsu tsitsi ɖe sia ɖe eye wòadzra nyɔnuwo kple ŋutsuviwo woazu kluviwo. 25Esi ame sia va ɖo Yerusalem la, ewɔ abe ŋutifafa dzi wòva ɖo ene, eye wòlala ʋuu dzudzɔgbe kɔkɔe ɖo. Azɔ esi wòkpɔ be Yudatɔwo dzudzɔ dɔwɔwɔ la, eɖe gbe na eƒe asrafowo be woazɔ kple woƒe aʋawɔnuwo. 26Eɖe gbe be wonewu ame siwo katã va ƒo ƒu, be yewoakpɔ asrafoawo ƒe wɔna teƒe. Eyome asrafoawo ge ɖe dua me eye wowu ame geɖe fũu ŋutɔ.
27Ke Yuda Makabeo kple abe ame asieke bubu aɖewo ene, sí yi gbedadaƒo eye eya kple eŋumewo nɔ agbe abe gbemelãwo ene le towo dzi. Wonɔ agbe ɖe nuɖuɖu siwo le gbea dzi la ŋu, ale be womaɖu nu siwo agblẽ kɔ ɖo na wo la ƒe ɖeke o.
EƲEGBE BIBLIA © The Bible Society of Togo, 2014.