Yililu 28
28
Hachitutu chaMelita
1Chituneli tunapuluki dehi, hitukwiluka ijina dachitutu ochu netu Melita.
2Enimbu hiyakututambula wejima wetu naluwi nankashi, hiyakubutula kesi muloŋa kwadiŋi nakunoka nvula, nichishika hamu.
3Pawulu chanakuŋuliyi chita chansonsu, nachishi dehi hakesi, kabandayula chanatiyiyi iyena, hikakufuma hakesi hikakulamata kuchikasa chindi.
4Enimbu chanamonuwu kapela nalamati dehi kuchikasa chindi, hiyakudileja muntu namukwawu, nawu, Chalala iyaliwu himbanji, hela wapuluka dehi mukaluŋalwiji, Mukwakuloŋa hanamwiteji kuhandaku.
5Ilaŋa yena hakumudikumwina #Mak 16:18kapela mukesi, kutiya kukata nehi.
6Wena enimbu atoŋojokeli nawu keŋa hanani, indi kwiji tukukasumuka nadimbuki nafwi dehi. Chaneluwu talile-e, kumumona yena hanatiyi chuma chatamaku, hiyakubalumuka munyichima yawu, nawu komana #14:11himukishi.
7Kwenoku kwadiŋi mpata yamwanta wachitutu ochu ijina dindi Pubilusi. Yena hakututambula hakutudiisha chachiwahi mafuku asatu.
8Chelili tata yaPubilusi nakami dehi nayikatu yamusoŋu wamashika nikapokota, Pawulu hakwiŋila mwadiŋiyi, hakulombela, chanamunaŋikiyi makasa, hakumukolesha.
9Chaneliyi mwenimu, antu amakwawu ahachitutu ochu adiŋi nanyisoŋu, hiyakwinza, hiyakuyikolesha nawa.
10Hiyakutulemeshaŋa nakutwinka yuma yayivulu; chitwakeŋeli kuya muwatu hiyakushamu yuma yayivulu yakudiila munjila.
Pawulu hakushika kuRoma
11Chimunahiti tukweji tusatu, hitukuya muwatu wakufuma kuAlesanderiya, wukweti chinjikijilu chawakishi ampamba, Kasto niPoluki, wachelukilaku dehi nvula kuchitutu ochu;
12tudata nikuSirakusa, hitukujiŋilaku mafuku asatu.
13Kufuma kwenoku hitukuya niniku niniku, tunyeŋumuka nakushika nikuRegumi. Chikunahiti ifuku dimu, mpepela yakukabeta kakuchidiilu hiyikutachika kukunka, tushika nikuPuteyoli mumafuku ayedi hohu.
14Kwenoku hitukuwana anakwetu, hiyakutulembelela tushakami nawu mulungu wumu. Nkumininaku tushika nikuRoma.
15Chanatutiyuwu kuRoma, anakwetu hiyakwinza nakutukinkilila kuwulandilwilu waApiyusi, nikuYisolu Yisatu. Pawulu chanayimoniyi, hakusakilila Nzambi, akwata niŋovu.
16Chituneŋili muRoma, hiyakumwiteja Pawulu kushakama kankawindi neshidika wamuhembelaŋa.
Pawulu hakutaŋisha muRoma
17Chimunahiti mafuku asatu, Pawulu hakutambika akulumpi jawaYudeya. Chanapompuwu hamu, hakuyileja nindi, Enu akwetu amayala, ami hinakoŋi chuma chakutamisha akwetu aYudeya, hela yaaku yawankakulula jetuku. Hela chochu, ankwatili kuYerusalema nakunlubula kudi aRoma; wena hiyakuŋusha mukaleya.
18Wena chanaŋihujoluwu, hiyakukeŋa nawu aŋumbuku, muloŋa hiyanmweni nachitela chakufwaku.
19Chanatiyuwu aYudeya kutama mwenomu, ami hinukumona nami kunashali jakulomba kuya kudi Kesari hohu; ilaŋa hinikweti muloŋa wakuholokela akwamunza wetuku.
20Dihu hanafumi kuyitambika, nami niyimoni nihoshi nenu. Anankasili ileŋi idi nsaŋu yakuchiŋeja kwachiŋejaŋawu aIsarela.
21Wena hiyakumwila nawu, Hitunatambuli nyikanda yakufuma kuYudeya yakukuteneyuku. Hela anakwetu enjili kunu, kukushimuna hela kukutena chatama nehi.
22Ilaŋa tunakeŋi tukutiyi muwatoŋojokaŋa eyi aweni; hakwila chaaku ichi tweluka dehi netu achitenaŋa #1 Pet 2:12; 3:16; 4:14, 16chatama kwejima kwejima.
23Chiyanatiyaŋanuwu ifuku, aYudeya amavulu nankashi hiyakwinza kwitala kwashakaminiyi. Yena hakuhita munsaŋu oyu, hakushimuna wanta waNzambi, hakuyilumbulwila nsaŋu yaYesu, chakufumisha #Luk 24:27munyikanda yanshimbi yaMosi, niyawatuprofwetu, kufumisha kubudidi ndo-o nikumelela.
24Amakwawu hiyakwiteja mwahosheliyi, amakwawu hiyakuleka.
25Chanabuluwu kutiyaŋana mulwawu, hiyakudifuminamu. Henohu Pawulu nahoshi dehi izu dimu nindi, Mwalala mwahosheli Spiritu Wajila nawankakulula jenu mudi kaprofwetu Isaya,
26cheliliyi nindi,
#
Isa 6:9-10; Mat 13:13 Yaku wakaleji antu awa neyi,
Kutiya mukutiya, himwakashinshika nihantuku;
Kumona mukumona, himwakeluka nihantuku.
27Muloŋa nyichima yawantu awa yinasupi dehi, matu awu anajiki,
Nimesu awu anajimi; akenda kamona namesu awu,
Akenda katiya namatu awu, akenda kashinshika munyichima yawu,
Akenda kabalumuka hinukuyuuka.
28Dichi ilukenu nenu iwu wamwinu waNzambi anawutemeshi kudi aJentili; komana wena #13:46akatiya.
29Chanahoshiyi mazu awa, aYudeya hiyakufumaku hiyakutadika nankashi mukachi kawu.
30Pawulu washakamini nyaka yiyedi yamana chikupu mwitala dindi dakudifwetela, hakutambula antu ejima ayilaŋa mwadiŋiyi.
31Hakushimunaŋa wanta waNzambi, nakutena nsaŋu yaMwanta Yesu Kristu chakadi woma; kwosi nawa wamulekesheluku.
Currently Selected:
Yililu 28: MWW04
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Lunda Ndembu © United Bible Societies, 2003.
