Yililu 27
27
Pawulu hakuya muwatu kuRoma
1Chaneluwu nawu twakayi kuItaliya muwatu, hiyakuyinka Pawulu nawakwakaleya amakwawu kudi mukulumpi wumu wamashidika, ijina dindi Yuliyusi, wamuchendu chaAgusitusi.
2Hitukwiŋila muwatu wakufuma kuAdamitumi, wukukeŋa kunyamuka henohu nakuya munjila yakukulisha Asiya, nakukunkakunka kunyikala yakwenoku. Hitukuya hakaluŋalwiji muwatu owu tudi naArisitaka, kaMasidoniya wakuTesalonika.
3Chikunachi tudata nikuSidoni. Yuliyusi wamwilili Pawulu chachiwahi, hakumwiteja kuya nakudya nawamabwambu jindi.
4Hitukufuma kwenoku muwatu nakukulisha Kipirosi, muloŋa mpepela jadiŋi nakukeŋa kutufuntisha munyima ho-o.
5Hitukuketula muhoŋi wamukaluŋalwiji, wela Silisiya iku, Pamfwiliya iku; tushika nikuMira wamuLisiya.
6Kwenoku mukulumpi wamashidika hakumona watu wakuAlesanderiya wudi nakuya kuItaliya; hakutwiŋijamu.
7Watu wetu hiwukwenda chovu chakukabakana hohu mafuku amavulu, tushika nikwatalaŋana naKinidusi. Chiyineli mpepela yichidi kukeŋa kutufuntisha munyima, hitukuya nakukulisha Kereta kwatalaŋana naSalimoni.
8Kwenoku twakulishili chakukabakana hohu, tushika nikwatenaŋawu nawu kuMenji Awunda, kwakwihi namukala waLaseya.
9Chimunahiti mafuku amavulu, nikwenda kwela dehi kwafwana, muloŋa #Lev 16:29-31; 23:27-29; Kuch 29:7mafuku akuleka kudya achidika Chakubuta Nshidi anahiti dehi,
10Pawulu hakuyikonkomwena nindi, Enu akwetu, natoŋojoki nami lwendu lwetu lwakekala lwakala, lwakukisaŋana yuma nankashi, hiyikumba yidi muwatu hohuku, hela ninetu aweni kwiji twakafwa tuhu.
11Mukulumpi wamashidika wabaŋili chalala mukwakwendesha watu nimwiniwatu, hakwila chahosheliyi Pawulu yena kubaŋamu nehi.
12Muloŋa mwenomu mwawoŋakana mwabulili kuwaha kuchelukilamu tukweji twamashika, dichi amavulu hiyakwila nawu tufumi kwenakunu muwatu, tuyi tukabili kushika kuFwenisi, tuchelukili kwenoku. Fwenisi himukala wakuchikumu chakuKereta, kwatala iku kukabeta, iku kumusela, iku nawa kukabeta kakwawu kwekala kwawoŋakana.
Mpepela yeneni
13Chitunamoni mpepela yakukabeta kakuchidiilu hiyikukunka chovu chovu, atoŋojoka nawu anamoni mwakeŋawu; hiyakufumisha mumenji chikuŋu chakwimikisha nachu watu, hiyakukulisha Kereta kwakwihi nachikumu.
14Ilaŋa chakadi nikuleha, hikukwinza hadi watu mpepela yasweja ŋovu yakufuma kumusela.
15Chiyinakwati hawatu wetu, hiwukukaŋanya kutala kukwinza mpepela, hitukukumina dakuyovwahila, tuhuŋumuka nikuhuŋumuka tuhu.
16Chitunahiti mumukulishu wakachitutu kanyanya ijina daku Kawuda, hitukukasa kawatu ketu kakwawu chakukabakana hohu;
17chanakikokuwu kwiwulu hiyakujiŋajiŋa watu weneni nanyonji yamaneni nankashi nawu awukoleshi. Chanatiyuwu woma nawu keŋa atunatili hawusekulula namalola kuSiritisi. hiyakulemuna mahina akwendesha nachu watu, hitukukumina dakuhuŋumuka.
18Chikunachi, tuchidi kukabakana nankashi nanoyu mpepela yasweja, hiyakutachika #v38; Yona 1:5kunata yuma yamuwatu mumenji.
19Hefuku damuchisatu hiyakunata yuma yakwendesha nachu watu namakasawu aweni.
20Chineli nimutena nitutumbwa kututoŋekela mafuku amavulu nehi, oyu mpepela yeneni yichidi kukunka, kukuhwelela kwejima kwakwila netu tukuhanda hikukutufuma.
21Chanashakamuwu nanzala mafuku amavulu, Pawulu hakwimana mukachi kawu nindi, Enu akwetu, neyi mwantiyilili, mutenowu mwabulili kufuma kuKereta, mubuli kumona kukabakana kwejimiku, nikujimbesha yuma.
22Ichi dinu nukuyikundeja nami tiyenu kuwaha, hikukufwa mwinenu hela wumuku, chiŋa yowu watu hohu.
23Muloŋa #18:9; 23:11wufuku wowenawunu kaŋelu kaNzambi yami, wánheta inakalakelaŋa nawa, wemana kunidami.
24Hakuŋila nindi, Eyi Pawulu, bayi wutiya womaku; chiŋa wakemani kumesu aKesari hohu. Tiya, Nzambi nakwinki dehi akwenu ejima wudi nakwenda nawu muwatu.
25Dichi dinu enu akwetu, tiyenu kuwaha muloŋa namukuhweleli Nzambi, neluki chikupu nami mwanahoshiyi mwakamwekana mwejima.
26Hela chochu, akatunatila hachitutu chimu.
Watu hiwukubaluka hamalola
27Chiwunashiki wufuku wekumi nachiwana (14), hitukuhuŋumuka niniku niniku mukaluŋalwiji kaAdiriya. Kwiji kwela dehi mukachi kawufuku, akwakwendesha watu hiyakutoŋojoka nawu hiyakuya nakuswila kwakwihi nampata yimu.
28Hiyakweseka namwonji mwakunamina menji, hiyakuwana kudi jimita 37. Chihanahiti mpinji yanti hiyakweseka cheŋi, hiyakuwana kudi jimita 27.
29Hiyakutiya woma, nawu keŋa atunati hamalola akuchikumu; hiyakuzelumuna yikuŋu yiwana yakwimikisha nachu watu kuntoŋi yakunyima; hiyakulombela nawu kuchi.
30Akwakwendesha watu hiyakukeŋa kutemuka, anazelumuni dehi kawatu kanyanya mumenji, kulonda adimbani nawu tukukeŋa kuzelumwina yikuŋu yakwimikisha nachu kuntoŋi yakumbidi.
31Dichi Pawulu hakumwila mukulumpi wamashidika nimashidika nindi, Neyi wenawa akubula kushala muwatu himukutwesha kuhandaku.
32Mashidika aketula ninyonji yakawatu oku, hikakuholoka mumenji.
33Chikwakeŋeli kucha, Pawulu hakuyilembelela wejima wawu, nindi dyenu. Nindi, Lelu ifuku dekumi nakawana (14) dimunashakami nanzala, kudyahu chuma nehi.
34Dichi nalembi mwani, dyenu muhandi; hikwakajimbala hela lusuki lwamuntu nilumuku.
35Chanahoshiyi ochu, hakutambula dinkendi, hakumusakilila Nzambi, iku wejima wawu amutiyaŋa; hakudihumuna nakutachika kudya.
36Wejima wawu hiyakutiya kuwaha, hiyakudya niwena nawa.
37Kubomba etu antu ejima twadiŋi muwatu owu, twashika munkulakaji jiyedi namakumi atanu nayedi nawantu atanu nawumu (276).
38Chanekutuwu, hiyakunata tidiku mumenji kulonda kupepelesha watu.
39Chikunachi, hiyelukili mpatoyuku. Nawu atali, hiyakushinshika kumu kwawoŋakana, kudi wusekulula kuchikumu; hiyakutiyaŋana nawu tukuŋikiluku watu, neyi tunatweshi.
40Chanaketuluwu nyonji yayikuŋu yakwimikisha nachu watu, hiyakuyilekela mumenji; hiyakukasununa yilapu yadiŋi yakwolola nachu watu, hiyakulema ihina dakumbidi kulonda dikwati mpepela, hiyakweseka kuya kuchikumu.
41Ilaŋa chanashikuwu halunduka wusekulula, watu hiwukukakela hawusekulula; ntoŋi yakumbidi hiyikukakela mbe, ilaŋa ntoŋi yakunyima hiyikutachika kubaluka naŋovu jamankanda.
42Mashidika atiyaŋana dehi nawu akajahi akwakaleya, nawu akenda kela amakwawu akasala, hiyakapuluka.
43Ilaŋa mukulumpi wamashidika wakeŋeli kumuhandisha Pawulu, dichi hakuyilekesha kwila mwenomu. Hakuyileja nindi, antu ejima anatweshi kusala adumbi mumenji akashikaŋahu dehi kumpata.
44Anabuli kutwesha kusala akwati kumapulaŋa, hela kuyuma yakuwatu, chaneluwu mwenomu hiyakupuluka chachiwahi, ashika nikuchikumu.
Currently Selected:
Yililu 27: MWW04
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Lunda Ndembu © United Bible Societies, 2003.
