Yililu 25

Festusi hakusompa muloŋa waPawulu

1Chanenziyi Festusi mwiluŋa odu, chimunahiti mafuku asatu hakufuma kuKesareya, hakuya kuYerusalema.

2Akulumpi jawatupristu niakulumpi jawaYudeya alema, hiyakumuholokela Pawulu kudi yena.

3Hiyakumulembelela nawu, Atwanakeni mwani, atukwashuku; mumuleti Pawulu enzi kuYerusalema. Elili nawu amubelamini, #9:23akamujahili munjila.

4Ilaŋa Festusi hakwakula nindi, Pawulu wudi mukaleya kuKesareya, ami aweni keŋa niyi kwenoku.

5Dichi niyi nawakwenu alumbuluka; neyi hadi chuma chatama chaneliyi akamuholokeli tuhu.

6Chimunahiti dehi mafuku atanu nasatu indi kwiji ikumi, hakuya kuKesareya. Chikunachi, hakushakama hetanda dakusompela, hakuleja antu kumuleta Pawulu.

7Chanenziyi, owu aYudeya afumini naFestusi kuYerusalema hiyakwimana kudi Pawulu kwi-ndo, nakumwinka nyiloŋa yatama yayivulu. Hela chochu, hiyatwesheli kumuhishaku.

8Pawulu hakudihakwila nindi, Hela nshimbi yawaYudeya, hela Tembeli, hela Kesari, hinayitamishi nihantuku.

9Ilaŋa Festusi, wakeŋa dehi kuyitiyisha aYudeya kuwaha, hakumwihula Pawulu nindi, Wukwiteja kukanduka kuYerusalema, akakusompesheluku yumiyi kumesu ami, tahindi?

10Pawulu hakwila nindi, Nemani kwami kwitanda daKesari dakusompela, kwatela kunsompeshelawu. Hinakoŋeli aYudeya chatamaku; hela eyi aweni wunelukumu chikupu,

11Neyi ami nakoŋaŋa chatama, hela neyi nela dehi chuma chatela kufwa, hinakaani kufwaku. Ilaŋa neyi yananholokeluwu yakutwamba, hikudi muntu wukutwesha kunlubula kudi wenaku. Niyi kwami kudi Kesari.

12Festusi, chanashakamiyi hampúŋa nachota chindi, hakwakula nindi, Chiwunalombi kuya kudi Kesari, wakaya kudi Kesari.

Festusi hakwihula Mwanta Agripa

13Chimunahiti mafuku antesha, Agripa hakushika kuKesareya naBerenisi, nawu amwimushi Festusi.

14Chaneluwu achidi kulabalaba mafuku amavulu, Festusi hakumwawila mwantowu nsaŋu yaPawulu, nindi, Kunu kudi iyala alekelawu munyonji kudi Filiksi.

15Chinadiŋi kuYerusalema, akulumpi jawatupristu niakulumpi jawaYudeya hiyakumuholokela kudami, nawu nimuhishi.

16Hinukuyakula nami, kusha muntu mukaleya chakadi kudimona nawakwakumuholokela mesu namesu, amoni jakudihakwila nansaŋu yanamuholokeluwu, hichaaku chetwetu aRomaku.

17Chapompeluwu kunu, hinalabiluku, ilaŋa dodifuku dalondelumu, hinukushakama hetanda dakusompela; hinukuleja antu kumuleta yenowu iyala.

18Chanemanuwu akwakumuholokela, hiyateneni nyiloŋa yatama yidi neyi munatoŋojokeluku;

19komana anamuholokeli tusaŋu twayijila yawu, nimuntu ijina dindi Yesu wafwili, atenaŋayi Pawulu nindi wamumi.

20Chinelili nami nijinoki mwakwihwila nsaŋu iyi, hinukumwihula nami, Wukwiteja kuya kuYerusalema, akusompesheluku nsaŋu iyi, tahindi?

21Ilaŋa chaneliyi Pawulu nalombi dehi nindi amuhembaŋa nichamba kamuketwilawu muloŋa kudi Agusitusi, hinukuleja antu nami amuhembi tuhu mukaleya, nichinakamona jakumutemesha kudi Kesari.

22Agripa hakumwila Festusi nindi, Ninami nakeŋi kumutiya yeniwu iyala. Festusi nindi, Kumadiki wakamutiya.

Pawulu kumesu aAgripa

23Chikunachi Agripa hakwinza naBerenisi, nawanta waweni; hakwiŋila mwitala dakuhoshela nyiloŋa, hamu nawakulumpi anjita, niantu amuŋanda alema. Festusi hakuleja antu kuleta Pawulu.

24Festusi hakuhosha nindi, Eyi mwanta Agripa, ninenu amayala ejima tudi nenu munu, iwu iyala munamoni iwu, anamuholokeli kudami kudi aYudeya ejima. KuYerusalema, nikunu nawa, hiyakumbidika nawu hatela kuhanda nawa cheŋuku.

25Ami hinamumoni namuloŋa wakutela kufwaku; dichi chaneliyi yomweni nalombi dehi nindi ayi kudi Agusitusi hohu, ami hinukwila nami nimutemeshi tuhu.

26Hinamoni nsaŋu yalumbuluka yinukusoneka kudi mwanta wamuku; dihu hanafumi kumuleta kumesu enu, nankashi kumesu eyeyi mwanta Agripa, kulonda tumwihujoli, tumoni mwakusonekela.

27Muloŋa natoŋojoki nami hichikweti maana kutemesha muntu wamukaleya chakadi mukanda wakushimuna nyiloŋa yamuholokeleluwuku.

Currently Selected:

Yililu 25: MWW04

Highlight

Copy

Compare