1 Tesalonikə 4
4
Ta mə kəɗam tu Ifraya
1Daw ba mba, ndo' vun rum, namba ta' vari məni hi gak ta kə ndi kədan hi kəɗam tu Ifray nə ne ni, kəzin', hi wə ta ndəna', ama mgbaŋ ni nə, namba wə mi o kə mi har kə semɗe Bârî mba Zezu: I gi də kofo pâ mə ni na. 2Zə hi we dan Bârî mba Zezu məni namba ta' ne ni nə si. 3Kwa məni Ifray wə wa' kuni ni na: Mum wə wa' i i ke dan dan mə bro', ɓay i ji tu ri wə du dan gi ghəghaya. 4Say swə ɗaw ɗaw daŋ' du ri nə we vari cin ma rum kə vari mə ɓay kə zur, 5ɓay nə gi fəfô ce' ndə sôwâ məni cu we Ifray mi wə gi kuni mi. 6Wə du kwa rum, swə ɗaw cu kə vari kədan mum gi kwa mə bro' wə hay' vay ba um, ko gi vur vur kə rum mi, zə namba in dan rum ɓa' si, ɓay namba har ni ɓayrum wa dan rum kərem i Bârî wə də gi boni ne kə sôwâ məni wə gi kwa mə bro' mə ni kuna. 7Ifray cu ɗe mba kədan namba gay' wə du ghəghay mi, ama kədan namba ke kəleŋe. 8Zə rum, swə məni wə vaɗ dan ta' rum, bə rum cu vaɗ sumra' mi, ama mum vaɗ Ifray məni wə mi ne Simbeɗ umu.
9Cu kə sin kədan namba wây' ɗerwa hay' ri wa dan bə daw ba mi məni ve Kris za' mi, zə Ifray ta' vari məni hi gak bə nji mbok nji nə ne ni si, 10kəzin', hi wə gi ndəna' wə hay' daw ba mba məni wə Maseduwanə daŋ'ŋ. Ama daw ba mba, namba wə mi o, i gi də kofo pâ mə ni na: 11I keɓ kə gbəgboŋ kədan i gay' heɓ, i ɗik dan wa sin mə kəca mi, ɓay i ur tu ri kə tu ri ce' ndə məni namba ta' ne ni ɓa' si. 12Ndəna', hi də fe mbra' wə hay' sôwâ məni cu ve Kris mi zə ta mi mə ɓay, ɓay hi cu də cik swə ɗaw mi.
Mbə Bârî
13Daw ba mba, namba wə wa' i i we dan mə kəzin' wa dan sôwâ məni mar, kədan hi gay' kə dan ɗik ce' ndə sôwâ məsin məni cu ve i Ifray wə də ra' sôwâ mbə mar mi nə mi. 14Namba ve i Zezu mar, ɓay mum car mbə mar si, ndəna', namba gak ve i sôwâ məni ve Zezu ɓay mar kə rum, Ifray wə də nday ra' mbə mar kə rum ta'a. 15Dan məni namba wə mi ta' ne, məni car mbə hay' Bârî mba nə ni na: Kəri məni Bârî mba wə də mbə, namba sôwâ məni kə i ɓo, namba cu də fray cop kə sôwâ məni mar si kuni mi. 16Kəri rum, Ifray də dlay dan, toŋ sum sin Ifray mə wafray də ka' dan, Ifray də pe duɓ, ɓay Bârî mba kə tu rum də mba: Ndəna' sôwâ məni ve Kris ɓay mar kə rum, handay də nday car mbə mar copo. 17Kəki rum, namba sôwâ məni kə i kəri rum, mum də mba ra' kə nday du dləmbur kədan namba də ndewa kə Bârî wafray, ndəna' namba də gay' kə Bârî hâ də hâ. 18Zə rum, i jeŋ vunduk ne kə nji mbok nji kə dan rumu.
Currently Selected:
1 Tesalonikə 4: KMN
Highlight
Share
Copy
Want to have your highlights saved across all your devices? Sign up or sign in
Le Nouveau Testament et Psaumes en Peve © Alliance Biblique du Tchad, 2014.
