Roma 11

Nsi ke' ghua' njoṅ Israél fa

1Ndùlala, #Fili. 3.5me tshob ndù: Nsi ghua' nzwil i ké? Nga, a ke b'a ndùlala. Nummbe mba tu wul àm b'a ze Israél, mèn ntùm nzwit Abraham, ntùm tunndà Benjamin. 2Nsi ke' ghua' i z'a na' ndèn i tà fe mbwe là. Bin ke' lèn nu ze ṅwa'ni Nsi num ntshob num Elia, mb'a ke mbu' mbu Nsi num nebote Israél là ké? A lo tshob ndù: 3Tshùaben, #1 Fen. 19.10,14bo zwite ghatshob ntshob Nsi tsho, nsate ntômbwôg nele't'o, me tù' à nda' tù' me, bo tshwèt ndiag nezwi àm. 4Là #1 Fen. 19.18Nsi lo bùnte, ntshob yi ndùke? Me lo lem tshé' benntùn ntsha' sammbàa num yàm tu, tse bo ke' kwim ntunkekwi' mub mbwe Baal là. 5Be ndaṅndaṅ, mba num yen ngelaṅ ni, tshé' i num bwe ntshùa njam netsho' kondèn. 6Là, a be z'a tshùa à njam kondèn nà, mb'a ke bèn mb'a num mfa'; ntag ndùlala, mba kondèn ke bèn mb'a kondèn. 7A b'a ndùke? Ju ze Israél num ndiag là, a ke' kwé, là ben tse Nsi tsho' yub là kwé. Là Nsi lo ma' sag ntù tsemo'o, 8ndaṅndaṅ #Neb. 29.4; Es. 29.10mba bo kite ndù: Nsi lo fà Ywèt bwôg bo, mfà miag ke yen bo, mba ntoṅ ke ju' bo, tà nse' nkum sènni. 9David #Yobk. 69.23-24tshob ndù: A bwô téblé sob tù' nkù ywi', ju nefa'te, mba ntsho'fa' bo. 10A bwô miag mub sènte ndù kà bo bèn neyene, mbèn ngù mvèn yub tswe neṅam njoṅ ngelaṅ fa.

Nefa'te Israél fà yôg ghakelèn Nsi

11Ndùlala me bètte ndù: Bo fa't'a num nevù nsi ké? Nga, a ke b'a ndùlala. Là yub nefa'te fà yôg ghakelèn Nsi, ndùlala ndù bo ma' yub ntùm ghe'te. 12Là, a be ze yub nefa'te tù' fu' njù, yub negha tù' fu' ghakelèn Nsi là, bag bin lèn kua' mebwô ndù yub nebam nsi ghù ntshùate.

13Là, me tshob à bin, ghakelèn Nsi: Mba tu wul àm b'a ngantum ghakelèn Nsi là, me num ngamte fa' sàm, 14nke ndiag manze nema' nzwit yag ntùm ghe'te, njôg tsemo' netèt bo. 15Nummbe, a be ze neghua' yub tamte njù bo Nsi là, mba nebèn ndo' yub nsi b'a ndùke? A nsi b'a nelo num vù. 16A be ze mbwe bàn làn nà, mba mba njoṅ bàn fa làn; a be ze ngatù làn nà, mba mba nkaṅ mi làn. 17Là, a be ze bo na' nkeb memo' nkaṅtù, a be ze bo lo' o, wù tù mà tshwèt, njab num dù' yube, o tamte bin ngatù mba nzit ten nà, 18o bamnà neta' nsoṅ mbwe men nkaṅtù là; a be z'o ta' nsoṅ nà, o lèn ndù o ke bèn nke nket ngatù, là ngatù bèn nke nkel o.

19O nsi tshob ndù: Bo lo keb nkaṅtù à ndù bo yab àm num dù' yube. 20A b'a nenùne! Bo na' nkeb yub à nummbe bo ke' ghù bamntù; là tu wul o, o tsin tù à num bamntù o. Kà tù' ngako'tewut, là bwôge! 21Nummbe, a be ze Nsi na' mbe ke faṅ nkaṅtù là, mb'a ku'ni nebe ke faṅ mba wù yu. 22Lôte bwôntù mba yantù Nsi njene; yantù num ben tse bo vù nsi là, bwôntù num o, a be z'o kagtùn ntùm bwôntù là, ntag ndùlala, mba bo nsi keb mba wù yu. 23Mbe se' mba bo là, a be ze bo ke' ghô ntùm nebe ke ghù bamntù là, mba bo nsi bèn yab yub num dù' yube. Nummbe Nsi ku'ni nebèn njab yub bwe; 24a be ze bo na' nkeb o num tù mà tshwèt s'a na' mb'a so ko' tù njab o num ten mebwô s'a ke' b'a so ko' tù là, bag à bin lèn kua' mebwô ndù Nsi ku'ni neyab ko' nkaṅtù num ten s'a b'a sob là.

Kaṅ ntù Israél

25Fèt tshàm, nummbe me ke' kô nelem zin sen tsham ni, (mbwôg ndù kà bin lo' wut tsin mba ghazenu là:) Nsi ma' mo' bag Israél ntùm sagntù tà nkum ngelaṅ njoṅ ghakelèn Nsi fa nsi tsho là. 26Ndùlala #Es. 59.20njoṅ Israél fa nsi yôge, ndaṅndaṅ mba bo kite ndù: Ngakwé i nsi fe à mà Sion, a nsi sô newag Nsi mà netèt Yakob, 27sen #Yer. 31.33-34ni b'a kàn se me nsi wat bag à bo ngelaṅ me nsi bù' nukebwô tshob là. 28Mbe se' mba nkùn mebwô là, bo b'a ghakeban num bin; là mbe se' mba netsho' Nsi là, Nsi kô yub num tà tshobe. 29Nummbe Nsi ke' be kwé ju z'a fà là, mba ze netsiaṅe. 30Nummbe, ndaṅndaṅ mba bin na' mbe ke ju' ntshu Nsi tà mbwe, nkwé kondèn ndonni ntshùa njam yub nebe ke ju' ntshu Nsi là, 31be ndaṅndaṅ, mba bo yub ke' ju' ntshu Nsi ndonni, ndùlala ndù mba bo tshùa njam kondèn ze bin kwé là, nkwé kondèn ndonni. 32Nummbe Nsi lo fùn njoṅ benntùn fa ntùm nebe ke ju' ntshu i, ndùlala ndù a ko ndèn njoṅ yub fa.

33Wé! #Es. 55.8Mi' fu' zenu mba ze nelèn Nsi ghu' neshu! Be mèn ke tswe' ntun ze nekeb ntsha Nsi, be mèn ke yen manze tse. 34Nummbe, #Es. 40.13we z'a lèn nkwatenu Tshùaben à? Ze ngafà ntag b'a we? 35We #Yob 41.11z'a to' bwôgmbwe mfà ju Nsi k'a bèn mba' yi à? 36Nummbe #1 Korin. 8.6njoṅ i fa mfe à yi, njoṅ i fa b'a num i, njoṅ i fa ke nèn à num i. Ghamte be yi ngu'ngu'. Amén.

Currently Selected:

Roma 11: BMa

Highlight

Copy