Roma 12

Mb'a bwô nefa' Nsi là

1Ndùlala, fèt tshàm, me tsiaṅ zin ntshùa num kondèn Nsi, ndù bin fà wut tsin mba ju nele'te Nsi, ze ntùn, ze nelàne, z'a bwô Nsi là; yen ni b'a zin nefa' z'a ku'ni là. 2Kà bin lo' fi'te yen njù li, là bin tshùa num zenu z'a tù' ze nswe là, mbate zin nebe, ndùlala ndù bin lôte, ndèn ze nekô Nsi, ju z'a bwô là, ju z'a bwô i là, ju z'a bwô miagte là.

Ta' wut ntshù', nkam wut yàme

3Njam kondèn ze Nsi na' mfà me là, me tshob mba zit mèn no netèt bin ndù: Kà bin lèn njoṅ wut tsin ntshùa mba bin be Là, là bin be kum benntùn ntùm mfi' bamntù ze Nsi fi' mfà bin nà. 4Nummbe, #1 Korin. 12.12ndaṅndaṅ mba be ghù nkam wut yàm num ta' wut ntshù', njoṅ nkam wut fa ke ghù à ta' fa' ntshù' là, 5be ndaṅndaṅ, be tse be b'a yàm nà, be b'a ta' wut ntshù' num Kristô, njoṅ be fa b'a nkam wut, be be, 6là, #1 Korin. 12.4-11ntùm kondèn ze Nsi na' mfà be là, be kwé à tshu nzenze: A be ze be kwé ntum nà, be ghù ntùm mfi' bamntù be; 7mèn z'a kwé fa' là, a fà wul i num fa'; mèn z'a b'a ngatswite là, a fà wul i num netswite; 8mèn z'a b'a ngafà ntag là, a fà wul i num nefà ntage; ngafà ju fà ntùm ntù mebwô; ngatshagte tshagte ntùm nenùne; ngakondèn ghù ntùm tsiaṅte.

Mfa' nkôni

9Kà nkùnkù be ntùm nkôni. Bin bémte nukebwô, ndat num numebwô. 10Bin tshùa num nkôni fètfèt nke nku'ni wut tsin bin bin, mba we lo ke ndo' mfèl i mb'a tshùa i là. 11Bin ghù fùagwut, kà bin lô; bin dun mbwôg Ywèle, mfa' Tshùaben. 12Bin tsiaṅte ntùm nenywinte, mfènte ntùm nge', nkagtùn ntùm nele'te Nsi. 13Bin tomte ben nelàn ntùm bwoṅ; bin ke nkù ntù nelo' ba ghùn. 14Bin #Mat. 5.44; Luk. 6.28naṅ mbotni num ben tse bo num ntsho' nku min kebàn nà; bin naṅ mbotni, ke so ndon. 15Bin tsiaṅte bin à ben tse bo tshwèt ntsiaṅte là, ndàn bin à ben tse bo tshwèt ndàn nà. 16Bin #Tànk. 3.7ghù be nkwate ntshù' bin bin; kà bin ko'te nkwatenu mine, là bin ghù ndù nefà wut nsi tshagte zine. Kà bin yen wut tsin mba ghazenu là. 17Kà bin lo' nukebwô njagte nukebwô yi sàm mèn. Bin diag nu z'a bwô là mbwe njoṅ benntùn fa. 18Bin yôg ntùm fite bin à njoṅ benntùn fa, a be ze bin ku'ni là, bin ghù ju ze bin ku'ni neghù là. 19Fèt #Neb. 32.35tshàm tse nkôni, kà bin yagte mba' zin tu, là bin faṅ dù' yantù Nsi, nummbe bo kite ndù: Tshùaben tshob ndù: Neyagte mba' b'a yàm nu, me nsi bèn keb ntsha. 20Là, #Tànk. 25.21-22a be ze nziku' ya ngakeban no là, o fà jujù yi; a be ze ntù i kù là, o fà ntse yi; nummbe a nsi tshùa ndùlala, o tse'te nge'mbwôg num tu i. 21Kà bam ndù nukebwô tshùa o, a bwô o lo' numebwô ntshùa nukebwô yi.

Currently Selected:

Roma 12: BMa

Highlight

Copy