Roma 10

Ba Yuda gha nunetsin z'a fe bamntù là

1Fèt tshàm, ju ze ntù àm kô là, mba yàm nele'te Nsi num bo b'a ndù bo ghù njôge. 2Me num nkwé nta mub ndù bo ghù fùagwut num Nsi, là bo ke' lèn manze yen nkôni là. 3Nummbe bo lo ke lèn nunetsin Nsi. 4Nummbe Kristô b'a miagte ntshù', ndùlala ndù njoṅ benntùn fa tse bo bam i là, tù' ben netsine.

5Mosé #Lev. 18.5kite num nunetsin z'a be mfe ntshù' là ndù: Mèn z'a ghù a bumte là nsi yôg num i. 6Là, #Neb. 30.12-14nunetsin z'a fe bamntù là num nke ntshob ndù: Kà tshob ntùm ntù o ndù: We z'a nsi ko' mfe kamànyam à? Yen nà b'a ndù, neghù Kristô swe'e. 7Ke netshob ndù: We z'a nsi swe' nèn mànjam nsi à? Yen nà b'a ndù: Neghù Kristô ko' mà netèt fe ben. 8A ke ntshob à ndùke? Ntshob b'a mbaṅ o, ntùm ntshu o mba ntùm ntù o. Yen nà b'a ntshob bamntù mi bag num ntshob là. 9A be ze ntshu o tshob ndaṅndaṅ ndù Yésu b'a Tshùaben nà, a be ze ntù o bam ndù: Nsi lo bam i num vù là, mb'o nsi yôge. 10Nummbe bamntù be ngù mèn kwé nunetsine, ntshob bamntù ghù mèn kwé yôg.

11Nummbe #Es. 28.16ṅwa'ni Nsi tshob ndù: Mba we lo z'a bam i là, tuswe ke nsi ko i. 12Nummbe netôte ke' be netèt ze Yuda mba ze Grikia, nummbe Tshùaben njoṅ yub fa b'a ta' i ntshù', a b'a ngabwôntù num njoṅ ben fa tse bo num ntsiaṅ i là. 13Mba #Yo. 3.5we lo z'a nsi tsiaṅ lén Tshùaben nà nsi yôge.

Bo fà ntshob Nsi njoṅ benntùn fa. Latnta ke bwe num ba Yuda

14Bo ghù netsiaṅ mèn ze bo ke' bam i l'à ndùke? Bo ghù nebam mèn ze bo ke' ju' nu num i l'à ndùke? Bo ghù neju' nu num i, ke be ndù mèn tshob nu Nsi à ndùke? 15Bo #Es. 52.7ghù netshob nu Nsi, ke be ndù bo kwé ntum à ndùke? Mba bo kite ndù: Nku ben tse bo num ntshob nkùn mebwô là nebwô à! 16Là, #Es. 53.1njoṅ benntùn fa ke' ju' ntshu nkùn mebwô. A tshùa ndùlala, Esaya tshob ndù: Tshùaben, we z'a bam ntshob mag à? 17Ndùlala, bamntù ke mfe à ju ze mèn ju' là, ju ze mèn ju' là se' njam ntshob Kristô. 18Là, #Yobk. 19.5me tshob ndù: Bo ke' ju' ké? Kua' mebwô! Nze yub lo nèn num njoṅ nsitsha' fa, ntshob mub nèn tà nkum num ntôg njù. 19Là, #Neb. 32.21me bètte ndù: Israél lo ke lèn ké? Mosé lo bwôgmbwe ntshob ndù: Me nsi tshùa num nzwit z'a ke' b'a yàm nà, ma' zin ntùm ghe'te; me nsi tshùa num nzwit z'a ke' ghù zenu là, ma' zin ntùm yantù. 20Là, #Es. 65.1Esaya lo fèn ntù, ntshob ndù: Ben tse bo ke' be diag àm nà, lo fon àm; ben tse bo ke' bètt'àm nà, me lo tswite wul àm bo. 21Mbe #Es. 65.2se' mba Israél là, a tshob ndù: Njoṅ lé'njù fa, me lo nyit mbu màm, num nzwil àm z'a ke' bam nu àm, z'a be ngatshabte là.

Currently Selected:

Roma 10: BMa

Highlight

Copy