Nesiaṅe Ju z'a be ntùm bwe là
Ju z'a be ntùm bwe là
Ṅwa'ni Nesiaṅe ke nsoṅ à mba bo na' nsiaṅ ba Israél yoṅ tse yàme num nelèn njoṅ yub là; nda' ndù a ke b'a be nda' yen nu nesiaṅ nà bèn mbe ntùm bwe, ke bèn mb'a ju tanjoṅ z'a be ntùm bwe là.
Ba Israél lo be kwé njoṅ ntshù' Nsi fa mi Tshùaben Nsi na' mfà Mosé Sinaï ndù a fà bo là, nabte wut yub nenèn mum ngô ze Nsi na' mbù bo là (1.1—10.10). Bo lo zin nkum Kadèsh-Barnéa z'a be mbwe yen ngô là là. Nda' ndù nke mbwôg netsho bwe. Là, a lo be ke kô nkô ndù bo tswe num kônkwa ngu'njù ṅam nkuà, ndo bwe nswe' bag mà ntèn, mbe miagte ntù' tshùa à num manze nesà kà ntsho ntùm ngô Moab z'a be bag ntumnyam diaṅnkat ntse là (10.11—21.35). Miagte nkam ṅwa'ni Nesiaṅe li ke ntshob nu à num ngô Moab. A lo be be ndù mànjam ba Israél tù' lo à bwe kà ntsho ntùm ngô Kanaan (22.1—36.13).
Ṅwa'ni Netume mba Ṅwa'ni Lévitiko be tôge, Ṅwa'ni Nesiaṅe batte. Ṅwa'ni Nesiaṅe ke nda't'a mat ben Nsi mba bo b'a kua' benntùn nyiaṅtu là, nummb'a num mbe se' num nebame, bo be bwe, mbe se' num nemagte, bo be bwe, nebam neta nse' njôge, bo be bwe; nebot num bamntù, bo be bwe; mbe se' num nekô nebe ben ndùb mba nefà wut tshob nsi, bo ke tag bwe.
Mbe se' num ze bag Nsi, Ṅwa'ni Nesiaṅe nke nda'te mba Nsi be Mèn nenùne mbèn mbe fite Mèn mbwe ben tse là. Nda' ndù, ze fite z'a ke' ghù ndù i num mènntùn nyiaṅtu là ke' ku'ni neséb sàm ju num ze nebe mba num ze nekô nunetsine. Ntùm ṅwa'ni Nesiaṅe, Mosé ghù neta dù' netèt Tshùaben boa ben tse: Mosé na' mb'a ze kwùntshaṅ Nsi mbèn mbe ngala'te ze nekô Nsi ben tse. Mosé na' mbèn mb'a ze ngakwé nta ben Nsi ze neta mbwe Nsi, mba mba ben Nsi na' mb'a ghafànnu njoṅ ngelaṅ fa là.
Currently Selected:
Nesiaṅe Ju z'a be ntùm bwe là: BMa
Highlight
Copy
Compare
Share
Want to have your highlights saved across all your devices? Sign up or sign in
La Sainte Bible en Bamiléké-Medùmba © Alliance Biblique du Cameroun, 1993. All rights reserved.