Nesiaṅe 23
23
1Balaam tshob Balak ndù: Nabte tômbwôge neghamte Nsi bwe nsen ni sammbàa, mbèn njab du mfô sammbàa, ngù nkekomnjù sammbàa. 2Balak ghù be ndaṅndaṅ ju ze Balaam tshob yi là. Bo tamte ben bàa, nton ta' ndu mfô mba ta' kekomnjù mba num zit tômbwôg lo. 3Balaam tshob Balak ndù: Tsin mbaṅ yu ju netone, num yen ngelaṅ nà me na' ndo mbaṅ bwe, mo' ndù Tshùaben se' bag yi bumte, k'a nsi tshob à nu ke me lo, mba me nsi ghù o lène. A lo nèn num manze. 4Nsi se' mbwe Balaam, a tshob yi ndù: Me ghù bo nabte tômbwôge sammbàa, nton ta' ndu mfô mba ta' kekomnjù mba num sit tômbwôg lo.
Balaam naṅ mbotni num ntô Israél
5Ndùlala Tshùaben so ntshob mi ntshu Balaam, ntshob yi ndù: Bèn njam mbaṅ Balak. Tshù mb'o nsi tshob yi li ndù: 6Balaam bèn njam mbaṅ Balak, njen i ndù a tsin mbaṅ ze ju netone boa kamkam Moab. 7A lo' ntshobe ntshob ndù: Balak ghù me fe Aram nse'e.
Mfen Moab tsiaṅ àm,
me fe num ba mbat bag ntumnyam nse'e.
Se' naṅ ndon tu Yakob num yàm tu.
Se' nkag tuswe tu Israél num yàm tu.
8Me nsi naṅ ndon tu mèn ze Nsi ke' naṅ
ndon tu i l'à ndùke?
9Ngelaṅ ze me tsin num ghô nke ndôt'é,
ngelaṅ ze me tsin num kônga là,
me yen bwoṅ benntùn ndù bo tsin,
ke so wut tshob netèt tsemo' ntumntum.
10We z'a ku'ni nesiaṅ mbab Yakob à?
Mba nelèn nzwit Israél z'a be ntsha'ntsha' là à?
A bwô ndù me kwù vù ben netsine.
Yàm nemiagte fute ze!
11Balak tshob Balaam ndù: O ghù à ke me à? Me lo' o nse' yi ndù o naṅ ndon tu ghakeban tshàm, o se' nke naṅ à mbotni num bo à? 12Balaam bùnte ntshob yi ndù: Ngelaṅ me tshwèt ntshob nu là, mba me ke tshob à ju Tshùaben fà ntshu àm nà ké?
Balaam naṅ mbotni mbatte bàa
13Balak bèn ntshob ndù: Se' bag wù tsin mo' dù' ghua, o yen tshen benntùn nà, o lo ke njen à nda' mo' bag, num bo, ke yen yub fafa. O nsi tsin num yen dù' là kà naṅ ndon tu bo num yàm tu. 14A lo' i nèn yi dù' netsin njen dù' mebwô, tu mbat Pisga, nkut ntômbwôg bwe sammbàa, nton ta' ndu mfô mba ta' kekomnjù mba num sit tômbwôg lo. 15Balaam tshob Balak ndù: Tsin mbaṅ yu ju netone, me nèn mfe dindin mbébe. 16Tshùaben se' bwe. Balaam nso ntshob ntshu i, tshob yi ndù: Bèn njam mbaṅ Balak, tshù mb'o nsi tshob li ndù: 17Balaam bèn njam mbaṅ Balak, njen i, a tsin mbaṅ ze ju netone boa kamkam Moab. Balak bètt'é ndù Tshùaben tshob ndùke? 18Balaam tshob ndù: Lo tù me Balak, nju'u, kù' ntoṅ, me nshum Tsipor.
19Nsi ke' b'a mènntùn num netatte.
Ke mén Adam no, netshob nu, mbèn ntshob ndù me ze ke!
A num ntshob ke ghù ké?
A num ntshob ta' nu ke ghù mb'a tshob là ké?
20Bo fà fa' me, ndù me naṅ mbotni,
nummbe a naṅ mbotni, me ke' ghù nebate.
21Bo num nke nte lag num Yakob,
ke yen mo' nge' z'a ghù là,
ke yen mo' nukebwô ze Israél ghù là.
Bo Tshùaben Nsi i bèn mbe.
Bo tshwèt nke mfà ghamte ndùb tun mfen yub.
22Nsi lo ghù a tum Egipto.
A ghù neta mba nyatnyàm nà.
23Nebètte nu mo' ju ghua ke' be Yakob.
Nebètte nu ka ke' be Israél.
24A lo be ngelaṅ z'a na' nkô là, a tshob Yakob,
mba Israél ju ze Nsi na' ntshob là.
Tshù benntùn nà, tse bo lo nsi mba nzwimàntô, ntsin tù
mba ngwayit là.
A ke nsi nô nsi ke be ndù a fèt nyàm z'a ghom nà,
mbèn nu mba lem tse.
25Balak tshob Balaam ndù: A be z'o ke' naṅ ndon tu i là, kà naṅ mbotni num i. 26Balaam tshob yi ndù: Me lo ke tshob wù ndù me nsi ghù a be ju ze Nsi tshob me là ké?
Balaam naṅ mbotni mbatte tat
27Balak tshob Balaam ndù: Se' me lo' o nèn yi mo' dù' ghua, mo' ndù Nsi bam wù ndù o naṅ ndon tu tshen ben nà me. 28Balak lo' Balaam nèn yi tu Péor, z'a tsin mbwe kônkwa là. 29Balaam tshob yi ndù: Nabte ntômbwôg nsen ni sammbàa, ngù du mfô sammbàa, mba nkekomnjù sammbàa. Balak ghù be ndaṅndaṅ mba Balaam tshob yi là. A ton ta' ndu mfô mba ta' kekomnjù mba num sit tômbwôg lo. 30Balak ghù ndaṅndaṅ mba Balaam na' mbètt'é yi là, mfà ta' mén mfô neton nde'te Nsi yi num mba sit tômbwôg tshule'te lo.
Currently Selected:
Nesiaṅe 23: BMa
Highlight
Copy
Compare
Share
Want to have your highlights saved across all your devices? Sign up or sign in
La Sainte Bible en Bamiléké-Medùmba © Alliance Biblique du Cameroun, 1993. All rights reserved.
