Nesiaṅe 24
24
Balaam soṅ mba ba Israél nsi be ntùm fu' là
1Balaam yen ndù a bwô Tshùaben nenaṅ mbotni num Israél, nummbe a ke' nèn ze mba tsemo' benntùn nà, num nediag ngame, a fa se i ndôt'é kônkwa. 2Balaam yen ndù ba Israél tswe tunndà tunndà. 3Ywèt Nsi se' num i, a tshob ndù:
Ntshob Balaam, nshum Béor:
Ntshob mènntùn ze miag mi làn nà.
4Ntshob mènntùn z'a num nju' ntshob
Nsi là,
z'a num njen ju ze ngaghù neta num nda'te yi
ngelaṅ z'a vù nsi,
miag mi gha' ntenge là.
5Tsho ntàb bwô neshu me Yakob
mba tsho dù'ntswe me Israél!
6A sate nèn bag bag mba nta'ntse mi a num nswe' tu mbat là,
ntswe mba nà ze bo dù' kaṅntse là,
mba ntù tshom boa ngage mi Tshùaben bwe kaṅntse là.
7Ntse dun ntùm lônga kà nke mfètte,
nke nzwi' tse tshu neywit fa.
Ze nu mfen ta ntshùa Agag.
Nufen se ko' nèn tù.
8Nsi ghù a tum Egipto.
A ghù neta mba nyatnyàm nà.
Mi ngô tse bo à bo ke' be tum mebwô là,
mbe'te mvôg mube, ndo' nka'-nkét ntamte yub yi.
9A #Net. 12.3; 49.9bag wul i nsi, nô nsi mba
ngwayit là,
mba tshùagkèt nyàm nà.
We z'a nsi ghù a lo nsi à?
Fite be mènntùn z'a naṅ fite num o là,
ndon tu mènntùn z'a nsi naṅ ndon tu o là.
Balaam soṅ mba ba Israél nsi be ntùm fu' là
10Balak ya ntù Balaam mbu' mbu mi ntshob ndù: Me na' ntsiaṅ o à ndù o naṅ ndon tu ghakeban tshàm, tshù, a ndonni à yoṅ tat z'o tshwèt nke naṅ be mbotni num bo là. 11Mb'a b'a ndùlala là, nèn la' bin. Me na' ntshob ndù me nsi fà tshu kam wù yàme, Tshùaben ghù o bi tshen tshu là. 12Balaam bùnte yi ndù: Me na' ke ntshob ghantum ts'o na' ntum me là ndù: 13Balak fà be nkàb boa tùn gol z'a be ndà i là me fa, mba me ke bagte tshàm ntshù' Tshùaben, neghù numebwô ke ze kebwô lo yàm tu ké? Me ke nsi tshob à ju ze Tshùaben nsi tshob me là ké? 14Ndonni, me nèn à ju tshàm ben, se' me te bu num o, mfà num ju ze tshen ben ni nsi ghù ndù mànjam num tsho ben nà.
15A bèn ntshob nu yi ndù:
Ntshob Balaam, nshum Béor.
Ntshob mènntùn ze miag mi làn nà.
16Ntshob ngaju' ntshob Nsi,
z'a ghù zenu Mèn-mfetù,
nke njen ju ze ngaghù ngù' num nda'te yi,
ngelaṅ ze ya' i tshùa, miag mi bèn nga' là.
17Me yen i, là a ke' b'a num ndonni.
Me tshwèt ndôt'é, ke yoṅ ngebte,
mo' sa maṅwù tum ju Yakob,
kôg nesa' ngô yi bèt ntum ze Israél.
Nke nyute nge' ba Moab fa
mbèn mbiagte nshumnshum Set fa.
18Ngô Edom nsi vù ntsho.
Ghakeban Seir nsi ma' ntsho ton i.
Israél la'te neta i.
19Ngatô njù nsi bèt tum ju Yakob.
Biagte mbwe' ju z'a tù' ntùm tusô là.
Balaam soṅ mba ghakeban Israél nsi bi là
20Balaam yen Amalék mbèn ntshob nu yi ndù:
Amalék, mbwe ngô netèt ngô yàme.
Ju z'a nsi se' ndamnjù là b'a netù' fam.
21A bèn njen ba Kén, ntshob bo ndù:
Yu dù'ntswe bwô, nta o te nkàn o à num gholoṅ.
22Mba ndùlala, Kain nsi tù'
ju lambwôge.
23Nemiagte a tshob ndù:
A b'a nge'.
We z'a nsi yôg ngelaṅ ze Nsi nsi ghù nu là à?
24Tshù sitima là, nke mfe Kitim.
Bo nsi ghùtni Asur,
ghùtni Eber,
mba yi ze tù' nenèn bi.
25Balaam lo nèn tse ntùm ngô i, Balak bèn nèn ze bag i.
Currently Selected:
Nesiaṅe 24: BMa
Highlight
Copy
Compare
Share
Want to have your highlights saved across all your devices? Sign up or sign in
La Sainte Bible en Bamiléké-Medùmba © Alliance Biblique du Cameroun, 1993. All rights reserved.
