Nesiaṅe 13
13
Mosé tum ba ntom Kanaan
(Neb. 1.19-33)
1Tshùaben tshob Mosé ndù: 2Tum benntùn ndù bo nèn ntùm ngô Kanaan ze me fà bon Israél là. Bin nsi tum ta' mèn mum tunndà ba tà tshobe. Bin nsi tsho' yub à netèt ghatô bon Israél. 3Mosé tum yube, bo lo Paran nèn mba Tshùaben na' ntshob là. Njoṅ yub fa na' mb'a ghatô benntùn netèt bon ba Israél. 4Tshù ndèn mub li: Num tunndà Rubèn: Shamua, nshum Zakkur. 5Num tunndà Siméon a be Shafat nshum Hori. 6Num tunndà Yuda a be Kaléb, nshum Yéfuné. 7Num tunndà Isakar a be Yigal, nshum Yosèf; 8num tunndà Efraim a be Hoshéa, nshum Nun, 9num tunndà Benjamin a be Palti nshum Rafu, 10num tunndà Zabulon a be Gadiel nshum Sodi. 11Num tunndà Yosèf, tunndà Manasé a be Gadi nshum Susi. 12Num tunndà Dan, a be Amiél, nshum Gémali. 13Num tunndà Aser, a be Setur, nshum Mikaél; 14num tunndà Néftali, a be Nabi, nshum Wofsi; 15num tunndà Gadi, a be Géuél, nshum Maki. 16Tshù ndèn benntùn tse Mosé na' ntum bo nèn nton ngô là. Mosé bate lén Hoshéa mén Nun ntsiaṅ ndù Yoshua.
17Mosé tum yub bo nèn nton ngô Kanaan, ntshob bo ndù: Bin ko' a Negéf, nko' mbale. 18Njen mba ngô be là, ke benntùn tse ghù neta lo, ke bo bot lo, ke ba ntùm ngô kag ke bo yàm no. 19Bin nsi yen mba ngô be là, k'a bwô; k'a bag lo, ke bo kut ngô nebéb ntshu i, ke ngô b'a mbàn no. 20Bin yene, ke tsha' ngô num mbwô ju ke nga lo, ke ntù bwe, ke nga lo, bin kagtùn ndo' ntamtù ntùm yen ngô là nse' yi. A na' mb'a ngelaṅ nekab mbwe ntamtù ndu'. 21Bo ko' nèn netom ngô neto' Sin tà nèn nkum Rehof, mbaṅ Lebot-Hamat. 22Bo ko' Negéf, tà nèn nkum Hébron, dù' ze Ahima, Shedai, mba Telai, nzwit Anak na' nke ntswe bwe là. Bo lo kut Hébron, a tswe ngu'njù sammbàa kà bo nkut Tanisi mà Egipto. 23Bo zin tà nkum tômbo'o Eskol dù' ze bo se' bwe nkeb kaṅtù ndu' mba ntsha mi bwe nso mbwoṅ bwe, benntùn bàa diaṅ, bo kab mba ntam bwe, mba tshom. 24Bo tsiaṅ yen dù' là ndù tômbo'o Eskol, a b'a ndù: Tômbo'o tsha' ntamtù num tsha ntamtù mi bon Israél na' nkab bwe là.
Ghatom soṅ yub tshô fa'
25A lo be tshùa lé'njù ṅam nkuà bo tom ngô kà bèn njam. 26Bo se' njen Mosé, Aron, mba ntse'te bon Israél, mà Paran, Kadèsh. Bo soṅ yub tshô manze, nda'te lèn ntamtù mi a be ntùm yen ngô là bo. 27Bo soṅ Mosé tshô manze ntshob ndù: Bag nèn ntùm ngô z'o tum yag bwe là. Bin bwe kua' nenùne. A b'a ngô ndù mbùn na' mba ṅwa'a yàm bwe neshu. Tshù lèn ntamtù mi a tum bwe là li. 28Nda' ndù ba tswe bwe b'a ben neta, ndù bo kut ngô yub mebwô, nke mbwôg ntsho. Bag yen mba nzwit Anak bwe. 29Amalék ke ntswe à Negéf, ba Hit. Ba Yébusia mba Amor nke ntswe à num mbale, ba Kanaan nke ntswe yub mà kaṅntse diba, mba kaṅntse Yordan. 30Kaléb tshwèt ntshob tshu benntùn tse bo ke nga ntshob ntshu Mosé là, ntshob ndù: Bin ghù bag bin nène, ndo' yen ngô là bag bin nsi tô yube. 31Là benntùn tse boa bo na' nko' là tshob yi ndù: Bag ke' ku'ni tshag nenèn nkam tshen benntùn nà, bo ta ntshùa yage. 32Bo to' nebagte lén ngô là mbwe ba Israél ntshob ndù: Yen ngô ze bag nèn ntom njen nà b'a ngô ndù a num mfèt ben tse. Njoṅ benntùn fa tse bag na' njen nà, b'a sagket benntùn. 33Mbèn #Net. 6.4njen mba nzwit Anak ndù bo sag yub neshu. Bag nke ntù' yen wut tshag à mba ngamntàn nà, mba bo yub nke njen yag be ndùlala.
Currently Selected:
Nesiaṅe 13: BMa
Highlight
Copy
Compare
Share
Want to have your highlights saved across all your devices? Sign up or sign in
La Sainte Bible en Bamiléké-Medùmba © Alliance Biblique du Cameroun, 1993. All rights reserved.
