Nesiaṅe 12

Nkin tshùb Miriam

1Aron bo Miriam tshobte Mosé num ngon Etiopia z'a na' nso là, nummbe a na' nso à ngon Etiopia, ngon Kus. 2Ntshob ndù: Nsi na' ntshob nu à be nda' Mosé tù' yi ké? A lo ke tshob nu mba bag ké? Tshùaben ju' yen nu là. 3Mosé na' mb'a ngafà wut nsi ntshùa njoṅ benntùn fa num nsitsha'a. 4Nsi ke ghubte ntshob Mosé, Aron mba Miriam ndù: Bin nèn njoṅ zin ntu tat fa, mbwe ndà mbumte. Njoṅ yub fa ntu tat nèn mbwe ndà mbumte. 5Tshùaben swe' ntùm bwoṅ ndot ntsin mbwe ntshundà mbumte. A tsiaṅ Aron bo Miriam bo nèn mbwe.

6A tshob bo ndù: Bin ju' ntshob màm. A be ze ngatshob ntshob Nsi be netèt bin nà, mba me Tshùaben, bèn nse' ntùm njem ntshob nu yi. 7A #Héb. 3.2ke' b'a ndaṅndaṅ num ngafa' àm Mosé ze me yab ntù àm num i num njoṅ ndà àm fa là. 8Me ke ndo' à ntshobte kà nke ntshob nu yi, a nke njen àm, ke lo' à lamte ntshobe, ngù a nke njen netshaṅ mfi' wut Tshùaben. Numke bin nke ntshobte ngafa' àm Mosé à?

9Tshùaben ya ntù tshen nà ndo nène. 10Ndot lo num tu ndà mbumte nèn tù, be ngelaṅ mbile, nkin ghom Miriam, a kaṅ mfôge mba mbem nà. Aron shua wul i ndôt'é njen ndù nkin ghom i. 11A tshob Mosé ndù: ô tshùaben àm, me le't'o, kà ghù ndù nukebwô tsho num bag, mba bag fàn nu là, bag b'a ba kagni, mbe ngaghù nukebwô. 12Ô, a ke' bwô ndù Miriam tù' mba sôbam mén ze mbàb wul i num tum bam màab ndù a sàmte fa là. 13Mosé kua' Tshùaben ntshob ndù: ô, Nsi, ko ndèn, njat'é. 14Tshùaben #Nes. 5.2-3tshob Mosé ndù: Tàab lo mfim ntsi num se i, mba tuswe ke ko i num lé'njù sammbàa ké? Bo sô i mum mbàn a tswe lé'njù sammbàa ntshundà, tshen lé'njù là mi kà mbèn njam num ze dù'. 15Bo sô Miriam netèt benntùn a tswe lé' sammbàa. Benntùn ke bèn nèn dù' k'a bèn njam num ze dù'. 16Yen nu là be tôge, benntùn lo Hatserot nèn ngù mbàn yub num kônkwa Paran.

Currently Selected:

Nesiaṅe 12: BMa

Highlight

Copy

Compare