Matio 5
5
Ghafen
(Luk. 6.20-23)
1Yésu be yen tshen bwoṅ benntùn nà, nko' num mbale, ntswe nsi, ghazi'te nu i se' mbaṅ i. 2A gha' ntshu i, ntswite yub ntshob ndù:
3Ghafen b'a ben bo bwoṅ ywèt là,
nummbe nufen kamànyam b'a yube.
4Ghafen #Es. 61.2b'a ben tse bo tshwèt nkua' là,
nummbe Nsi a' ghù mfite ntù tshobe.
5Ghafen #Yobk. 37.11b'a ghafite, nummbe tsha' a' ghù
mbe ju ntsi' yube.
6Ghafen #Es. 55.1-2b'a ben tse ntù tshob tshwèt nkù,
nzi nunetsin bèn nke nja yub là,
nummbe bo a' ghù njwèle.
7Ghafen b'a ghakondèn, nummbe Nsi
a' ghù nko ndèn mube.
8Ghafen #Yobk. 24.3-4b'a ben tse ntù tshob làn nà,
nummbe bo a' ghù njen Nsi.
9Ghafen b'a ghatshùb fenkaṅ,
nummbe Nsi a' ghù ntsiaṅ yub bon tse.
10Ghafen #1 Pét. 3.14b'a ben tse bo tsho' nku mub kebàn
num nunetsin nà, nummbe nufen kamànyam b'a yube.
11Ghafen #1 Pét. 4.14nsi b'a bin ngelaṅ ze benntùn nsi ke tshabte zine, tsho' nku min kebàn, tshob tatte, tete nzenze nukebwô tu bin num àm nà. 12Bin #2 Kron. 36.16; Mfa' Gha. 7.52tsiaṅte, ṅwate ntùm tsiaṅte,
nummbe ntsho'fa' min b'a mi ndùb mfe kamànyam,
a be ndaṅndaṅ mba bo na' ntsho' nku ghatshob ntshob Nsi
tse bo be mbwe bin nà kebàn nà.
Ngwa mba nka' ntùm njù
(Mark. 9.50; Luk. 14.34-35)
13Bin #Mark. 9.50; Luk. 14.34-35b'a ngwa nsitsha'a, là, a be ze ngwa ghua' ndùm mi là, mba bo nsi bèn ghù à ndùke k'a mbèn ndùm à? A tù' bwô à nda' nema' i njù ndù benntùn nyiaṅte nku. 14Bin #Yoha. 8.12; 9.5b'a nka' ntùm njù. Ngô z'a be num tu mbat là ke' ku'ni nelemte. 15Bo #Mark. 4.21; Luk. 8.16; 11.33ke bèn ne nke nte mbwôg num lambo, nte à mum kab, là num téblé, a ké' njoṅ benntùn fa bo be ntùm ndà là. 16Ndùlala #1 Pét. 2.12ndù nka' zin ké' mbwe benntùn ndù bo yen mfa' min mi mebwô, ngamte Tà zin z'a be mfe kamànyam nà.
Ntshù' Nsi mba ghatshob ntshob Nsi
(Luk. 24.44)
17Kà bin kwate ndù me se' nebagt'a ntshù' ke ghatshob ntshob Nsi lo, me ke se' à nebagte, là ndù me ghù a bumte. 18Nummbe #Luk. 16.17me tshob bin kua' nenùn ndù: Ntùm ntshù' Nsi, ta' i ke tsho' i lo ke nsi bi, njoṅ i fa nsi bumte kà kamànyam mba tsha' tôge. 19Mèn z'a nsi bagte mo' netèt tshen bontsit ntshù' li, bèn tswite benntùn nebagte là, mba bo nsi tsiaṅ i metsit mèn ntùm nufen kamànyam; là mèn z'a nsi ze, bèn tswite neze là, mba bo nsi tsiaṅ i mèn ndùb ntùm nufen kamànyam. 20Nummbe me tshob bin ndù: A be ze zin nunetsin ke' tshùa ze ghalèn ṅwa'ni Nsi mba ba Férésia là, mba bin ke nsi tsho ntùm nufen kamànyam.
21Bin #Netu. 20.13; Neb. 5.17lo ju' mba bo na' ntshob ba mbwe ndù: Kà zwi mèn; mèn z'a zwi mèn nà, mba bo a' tsho't'é ndàntsha là. 22Là tu wul àm, me tshob bin ndù: Mèn z'a ya ntù num mfèl i là, mba bo a' tsho't'é ndàntsha; mèn z'a tshob mfèl i ndù: nkagni là, mba bo a' tsho't'é mbwe ndàntsha ndùb; mèn z'a tshob yi ndù mbabun nà, mba bo a' tsho'te ntsha i, ma' i ntùm dù' mbwôge. 23A be z'o lo' ju neghamte Nsi, nèn yi tômbwôge, nkum bwe, nkwimte ndù bin mfèl o ghù ntsha là, 24o faṅ ju neghamte Nsi mbwe tômbwôge, mbèn njam bin mfèl o be ntshu ntshù', k'o njôg nse' mfà yu ju neghamte Nsi. 25Nànte netsho shun bin ngakeban o ngelaṅ ze bin yi ke' num manze là, mbwôg ndù kà ngakeban o fà o ngatsho'te ntsha, ngatsho'te ntsha fà o ngabéb ndàtsha, a ma' o ndàtsha. 26Kua' nenùn me tshob wù ndù, o ke nsi tum bwe ke be ndù o fà nkàb tà nèn nkum num miagte keba.
27Bin #Netu. 20.14; Neb. 5.18lo ju' mba bo na' ntshob ndù: Kà ghù màndà. 28Là, tu wul àm, me tshob bin ndù: Mèn z'a lôte mènnzwi, nge't'é là, mb'a ghù màndà bo yi ntùm ntù i.
29A #Mat. 18.9; Mark. 9.47be ze lag so se zwim ghù ndù o vù ntùm ywi' là, o tsho' i, ngua' ngùanesà mbaṅ o, nummbe a b'a mebwô wù nebi kam wul o, ntshùa mba be bo ma' njoṅ wul o fa ntùm mbwôg là. 30A #Mat. 18.8; Mark. 9.43be ze bu o ze zwim ghù ndù o vù ntùm ywi' là, o keb i, ngua' ngùanesà mbaṅ o, nummbe a b'a mebwô wù nebi mo' kam wul o, ntshùa mba be njoṅ wul o fa, nèn ntùm mbwôge, mbi là.
31Bo #Neb. 24.1-4; Mat. 19.7; Mark. 10.4lo bèn ntshob mba ndù: Mba we lo z'a sô nzwi i là, a fà ṅwa'ni nefagte nandà yi. 32Là #Mat. 19.9; Mark. 10.11-12; Luk. 16.18; 1 Korin. 7.10-11tu wul àm me tshob bin ndù: Mèn z'a sô nzwi i, k'a ke b'a nda' num yôg kat là, mb'a tsiagt'é nte num manze màndà. Mèn z'a so mènnzwi ze ndu i sô i là, mb'a ghù màndà.
33Bin #Lev. 19.12; Nes. 30.2; Neb. 23.21lo bèn nju' mba bo na' ntshob ba mbwe ndù: Kà kàn mfe tatte, là ghù ju z'o kàn mfe num bwe mbwe Tshùaben nà. 34Là #Yako. 5.12; Es. 66.1; Mat. 23.22tu wul àm me tshob bin ndù: Kà kàn mfe mba ntshù', ke kamànyam no, nummbe a b'a ko'fen Nsi; 35ke #Es. 66.1; Yobk. 48.2tsha' lo, nummbe a b'a kamnko' dù' z'a be nte nku mi là; ke Yérusalém no, nummbe a b'a ngô mfen ndùb. 36Kà bèn nkàn mfe mba num tu o, nummbe o ke' ku' neghù ntàn nyiaṅtu fôg ke neghù a sèn no. 37A bwô ndù ntshob min ke mb'a ndù: Ṅ, ṅ, nga, nga; ju z'a bèn nkwi'te bwe là fe à mèn kebwô.
38Bin #Netu. 21.24; Lev. 24.20; Neb. 19.21lo ju' mba bo na' ntshob ndù: Lag num lag, sô num sô. 39Là tu wul àm, me tshob bin ndù: Kà bin ta tu mbwe mèn kebwô, là, a be ze mèn lab toṅ o ze zwim nà, o tswite mba ze kwéb yi. 40A be ze mèn tshwèt ndiag o ntsha num nesô nzwe o ze ntùm bwe là, o faṅ mba ze num tù yi. 41A be ze mèn tshwèt nànt'o ndù bin yi zin nku ntsha' mbùm nà, o zin nku ntsha' bàa bin yi. 42Mèn z'a lon ju wù là, o fà yi; ke kaṅ wul o mbwe mèn z'a tshwèt ndiag ndù o tshwé' ju yi là.
43Bin #Lev. 19.18lo ju' mba bo na' ntshob ndù: Ke nkô mèn z'a ghebte mbaṅ o là, nke mbàn ngakeban o là. 44Là tu wul àm me tshob bin ndù: Bin kô ghakeban tsine, nke nde'te Nsi tu ben tse bo tshwèt ntsho' nku min kebàn nà, 45ndù bin tù' bon Tà zin z'a be mfe kamànyam nà; nummbe a be ngù nyam i tà num ben kebwô mba ben mebwô, ngù mbaṅ i lo num ben netsine mba tse ketsin. 46A be ze bin ke nkô ben tse bo num nkô zin nà, mba ntsho'fa' min nsi b'a ke? Mba ghakwéfé' ke' be ghù yub be ndaṅndaṅ ké? 47A be ze bin be ntsha't'a nda' fèt tsin nà, mba nu ke to' yen ze bin ghù là b'a ke? Mba ghakelèn Nsi ke' be ghù yub be ndaṅndaṅ ké? 48Ndùlala #Lev. 19.2; Neb. 18.13bin bwô miagte mba Tà zin mfe kamànyam bwô miagte là.
Currently Selected:
Matio 5: BMa
Highlight
Copy
Compare
Share
Want to have your highlights saved across all your devices? Sign up or sign in
La Sainte Bible en Bamiléké-Medùmba © Alliance Biblique du Cameroun, 1993. All rights reserved.