Matio 4
4
Mba Satan laṅte Yésu là
(Mark. 1.12-13; Luk. 4.1-13)
1Ywèt #Héb. 2.18; 4.15Nelàn lo' Yésu nèn yi kônkwa ndù Satan laṅt'é. 2A tswe ke jù ju lé'njù ṅam nkuà, mbwôgtshù mba tèttswe'; yen nà lo be tshùa, nziku' ya i. 3Ngalaṅte se' ntèl i, ntshob yi ndù: A be z'o b'a Mén Nsi là, o tshob ndù men ndoṅ ni kaṅ ntù' bàn. 4Là, #Neb. 8.3a bùnte ntshob ndù: Bo lo kite ndù: A ke nda' bàn bèn ghù mènntùn yôge, là, a ke ntswe ntùn à num ntshob mi a num ntum ntshu Tshùaben nà. 5Satan lo' i nèn yi ntùm ngô nelàne, nte i mfe num tu Ndà Nsi, 6ntshob #Yobk. 91.11-12yi ndù: A be z'o b'a Mén Nsi là, o tsho' ngwù mànsi, nummbe bo lo kite ndù: A nsi tshob ba Angél tse num o, bo nsi kel o mum mbu mube, ndù k'o tsho' ku o num loṅ. 7Yésu #Neb. 6.16tshob yi ndù: Bo lo nkite mba ndù kà laṅte Tshùaben Nsi o. 8Satan bèn ndo' i nèn yi num tu mbat z'a sag neshu là, nda'te njoṅ nufen njù fa yi mba nkuni mi, 9ntshob yi ndù: A be z'o vù nsi mbwe àm, ngamt'àm nà, mba me nsi fà njoṅ tshen tshu li fa wù. 10Yésu #Neb. 6.13tshob yi ndù: Satan, lo njam àm, nène! Nummbe bo lo kite ndù: O nsi ke vù nsi, ghamte Tshùaben Nsi o, ke fa' fa' be nda' yi tù' i. 11Satan faṅ i nène; ba Angél se' ntèl i, nke mfa' yi.
Mba Yésu to' fa' ntsiaṅ mbwe bônke' tse là
(Mark. 1.14-15; Luk. 4.14-15)
12Ngelaṅ #Mat. 14.3; Mark. 6.17; Luk. 3.19-20Yésu ju' ndù bo tshùb Yohané là, a tum, nèn Galiléa. 13A #Yoha. 2.12lo Nazarèt nèn Kapernaum z'a be kaṅ dibantse ntùm bag ngô Zabulon mba Néftali là, nke ntswe bwe, 14ndù men ntshob li mi Esaya ngatshob ntshob Nsi na' ntshob là bumte ndù: 15Tsha' #Es. 8.23—9.1Zabulon mba tsha' Néftali, ts'a be kaṅ dibantse, mo' yoṅ Yordan, Galiléa ghakelèn Nsi là, 16benntùn tse bo ke ntswe ntùm ngô mba ntùm netshaṅ vù là, yen mà làne ndùb.
17Fe #Mat. 3.2yen ngelaṅ nà, Yésu to' netshob ntshob Nsi, ntshob ndù: Bin kaṅ ntù tsine, nummbe nufen kamànyam à ghebte!
18Mb'a *gi*na' nke nkatte kaṅ dibantse Galiléa là, a yen tsemo' fètfèt bàa, Simon ze bo ke ntsiaṅ i Pétro là, mba Andréa mfèt Simon, bo nke ma' mbunjà ntùm dibantse, nummbe bo na' mb'a ghaghom ngontse. 19A tshob bo ndù: Bin tam njam àm, me nsi ghù bin tù' ghaghom benntùn. 20Be ndùse, bo faṅ mbunjà, ntam njam i. 21A lo nsen ni, nèn mbwe, njen tsemo' fètfèt bàa, Yakobo mén Zèbèdéo, mba Yohané mfèl i, ntùm kenu boa Zèbèdéo tà yub, bo nke nkwitte mbunjà mube. 22Be ndùse bo faṅ kenu mba tà yub, ntam njam i.
23Yésu #Mat. 9.35; Mark. 1.39nke nzin ntùm ngô Galiléa fa, nke ntswite ntùm ba sinagogue tshobe, nke ntshob nkùn mebwô nufen Nsi, nke njate njoṅ ngokèt fa, mba njoṅ lo' nzenze fa netèt benntùn. 24Bo ju' tshô i ntùm njoṅ ngô Siria fa. Bo lo' njoṅ benntùn fa tse bo na' ntswe kebwô, ngù ngokèt nzenze mba lo' yàme, ghaghù ywèt kebwô, ghaghù wà'à mba ba kekat là, nse' yi, a yate yube. 25Bwoṅ benntùn yàm tam njam i, fe Galiléa, Dékapol, Yérusalém, Yudéa, mba mo' yoṅ Yordan.
Currently Selected:
Matio 4: BMa
Highlight
Copy
Compare
Share
Want to have your highlights saved across all your devices? Sign up or sign in
La Sainte Bible en Bamiléké-Medùmba © Alliance Biblique du Cameroun, 1993. All rights reserved.