Matio 26
26
Tsham mba bo zwi Yésu là
(Mark. 14.1-2; Luk. 22.1-2; Yoha. 11.47-53)
1Ngelaṅ Yésu miagte netshob men ntshob là fa là, a tshob ghazi'te nu i ndù: 2Bin #Netu. 12.1-27lèn ndù a tù' lé'njù bàa Pasa be, bo tshwèt nswèn Mén mèn ndù bo kwimt'é num fanta'tù. 3Ghale'te Nsi tse ndùbndùb mba ghakwé mbwe ntùm ngô bumte ntshundà ngale'te Nsi ze ndùb, ze bo ke ntsiaṅ i Kaifa là, 4ngù ntse'te ndù bo tshùa ntùm nkùnkù kà ntshùb Yésu nzwi i. 5Là bo ke ntshob ndù: A ke' bwô ndù yen nu là b'a lé'njù jùa, ndùlala ndù kà tshu'te be netèt benntùn.
Neyo' Yésu mà Bètania
(Mark. 14.3-9; Luk. 7.36-50; Yoha. 12.1-8)
6Ngelaṅ Yésu be Bètania ntùm ndà Simon ngankin nà, 7mo' #Luk. 7.37-38mènnzwi se' mbaṅ i ndù a ghù ntshaṅ labinda ze tanjoṅ, naṅ num tu Yésu z'a tswe téblé là. 8Là ghazi'te nu i be yene, nja ntù, ntshob ndù: Yen nebagte li ywimt'a ke? 9Bo lo nku'ni neswèn i nkàb yàme, mfà bwoṅbwoṅ. 10Là Yésu ju', ntshob ndù: Numke bin nke ngùtni yen mènnzwi l'à? A fa' fa' mebwô num àm. 11Bin #Neb. 15.11à bwoṅbwoṅ nke mbe njoṅ ngelaṅ fa, là bag à bin ke ke mbe njoṅ ngelaṅ fa. 12Mb'a fètte yen labinda là num wul àm nà, a nabt'a netshoṅ àm. 13Kua' nenùne, me tshob bin ndù: Njoṅ dù' fa tse bo nsi ke tshob yen nkùn mebwô li bwe ntùm njoṅ ngô njù fa là, bo nsi soṅ mba ju z'a ghù là, num nekwimte lén se yi.
Mba Yuda ghù ndàm num Yésu là
(Mark. 14.10-11; Luk. 22.3-6)
14Mo' mèn netèt tse ntshob bàa gham, ze bo na' nke ntsiaṅ i Yuda Iskariot là, nèn ntèt ghale'te Nsi tse ndùbndùb, ntshob ndù: 15Ke #Sak. 11.12ze bin kô nefà me, me fà i bin à? 16Bo bam silba ṅam ntat. Fe num yen ngelaṅ nà, a nke ndiag manze mebwô z'a nsi tshùa bwe kà fà i bo là.
Jujù Pasa. Jujù nelàne
(Mark. 14.12-21; Luk. 22.7-18,21-23; Yoha. 13.1-30)
17A be mbwe lé'njù bàn keko', ghazi'te nu Yésu se' mbaṅ i, ntshob ndù: O kô ndù bag nabte jujù Pasa wù à yà? 18A tshob ndù: Bin nèn ntùm ngô, la' yen mèn nà, ntshob yi ndù: Ngatswite tshob ndù: Yàm ngelaṅ ghebte, m'a' jù Pasa à la' o bag à ghazi'te nu àm. 19Ghazi'te nu Yésu ghù be ndaṅndaṅ mb'a tshob bo là, nabte Pasa.
20Njù be sène, a tswe téblé boa ghazi'te nu i ntshob bàa gham. 21Ngelaṅ bo ke njù jujù là, Yésu tshob ndù: Kua' nenùne, me tshob bin ndù mo' mèn netèt bin nsi swèn àm. 22Bo nywin kua' neshu, nto' netshob yi ntshù' ntshù' ndù: A ke b'a me ké, Tshùaben? 23Là, #Yobk. 41.10a bùnte ntshob ndù: A b'a mèn ze bag yi tshag bu ntùm ka là, yen mèn nà bèn nswèn àm. 24Mbe se' mba Mén mèn nà, a nèn à ndaṅndaṅ mba bo na' nkite num i là, là nge' tu mèn yen nà ze bo nsi tshùa njam i kà swèn Mén mèn nà. A lo bwô yen mèn nà ndù kà bo bwe i mba nebwe. 25Là Yuda mèn z'a swèn i là, bùnte, ntshob ndù: A ke b'a me ké, Rabbi; a tshob yi ndù: Mb'o tshob là.
26Ngelaṅ bo ke njù jujù là, Yésu lo' bàn, nde'te Nsi, mbe'te, mfà ghazi'te nu i, ntshob ndù: Bin ko là njù, yen ni b'a mbàb wul àm. 27Mbèn ndo' ntu', nde'te Nsi, mfà bo, ntshob ndù: Bin nu ntùm bwe njoṅ zin fa. 28Nummbe #Netu. 24.8; Yer. 31.31-34yen ni b'a lem tshàm tse kàn tse bo fètte num tu benntùn yàm ndù Nsi lagte nukebwô tshob là. 29Me tshob bin ndù: Fe ndonni me ke nsi bèn nu ndu' tà nkum sen lé'njù là se me nsi bèn nu ndu' nswe bag à bin ntùm nufen Tàa là.
Mba Yésu tshob ndù Pétro nsi gha i là
(Mark. 14.26-31; Luk. 22.31-39; Yoha. 13.36-38)
30Bo be miagte neyob kwi, ntum nèn num mbat ntene. 31Yésu #Sak. 13.7tshob ndù: Njoṅ zin fa nsi vù ntùm ywi' num àm yen tèttswe' li, nummbe bo lo kite ndù: Me nsi lab ngabéb njùmbwe, ndà njùmbwe sate. 32Là #Mat. 28.16ngelaṅ me nsi lo num vù là, m'a' kwé mbwe bin Galiléa. 33Là Pétro bùnte, ntshob yi ndù: A be ze njoṅ yub fa vù ntùm ywi' num o là, mba tu wul àm ke nsi vù tshàm ntùm ywi'. 34Yésu tshob yi ndù: Kua' nenùne, me tshob wù ndù yen tèttswe' li, kù'ngab nsi be tô ndù o à gha àm yoṅ tat. 35Pétro tshob yi ndù: A be z'a bwô ndù me kwù bag wù là, mba me ke nsi gha o tshàm. Njoṅ ghazi'te nu i fa tshob be ndaṅndaṅ.
Gétsémané
(Mark. 14.32-52; Luk. 22.40-53; Yoha. 18.1-11)
36Yésu kum bo à bo ntùm mo' dù' bo ke ntsiaṅ ndù Gétsémané là, a tshob ghazi'te nu i ndù: Bin tswe nsen ni, me nèn nsen nà tà nkum ngelaṅ me nsi miagte nele'te Nsi là. 37A lo' Pétro mba bon Zèbèdéo bàa, nto' nenywine mba netswe nge'. 38A tshob bo ndù: Ntù àm tshwèt nywin tà ntù' b'a ze vù. Bin tswe nsen ni, bag à bin zi tshùalo. 39A nèn mén nda'nda', ngwù nsi kabkab, nde'te Nsi, ntshob ndù: Tà, a be z'o kô là, o ghù yen ntu' li tôg àm. Là ke b'a mba me kô là, là mb'o kô là.
40A bèn njam mbaṅ ghazi'te nu i, njen yub ndù bo tshwèt nzi, a tshob Pétro ndù: Ndùlala bin ke' ku' nezi tshùalo bag à bin mba nda' ta' nyam ké? 41Bin zi tshùalo, nde'te Nsi ndù kà bin tsho ntùm laṅte. Ywèt num mbame, là mbàb wut nke mbole.
42A bèn nèn nde'te Nsi num mbatte yoṅ bàa, ntshob ndù: Tà, a be ze yen nà ke' ku' netôg ke me nu i là, yu nekô bumte! 43A bèn mbèn njam, njen yub bo nke nzi, nummbe bo lo ke ntshaṅkèt miaglo. 44A faṅ yub mbèn nèn nde'te Nsi num mbatte yoṅ tat, mbèn ntshob be ntshob ntshù'. 45A bèn mbèn njam mbaṅ ghazi'te nu i, ntshob bo ndù: Bin zi ndonni, mfite wut tsine; tshù, ngelaṅ ghebte, bo tshwèt nswèn Mén mèn mum mbu ben kebwô. 46Bin lo nsi bag à bin nène; tshù, mèn z'a tshwèt nswèn àm nà ghebte.
Mba bo tshùb Yésu là
47Mb'a ke nke' ntshob là, Yuda mo' mèn netèt tse ntshob bàa gham se', boa bwoṅ benntùn yàm tse ghale'te Nsi tse ndùbndùb mba ghakwé mbwe ntùm ngô tum yub là, ndù bo tshùb ṅwi mba nzwit mbu bo. 48Ngaswèn Yésu lo fà lèn bo, ntshob ndù: Mèn ze me nsi nyô nge' mi là, a yi, bin tshùb i. 49A yoṅ mbe kum mbaṅ Yésu, ntshob yi ndù: Rabbi, me tsha't'o, nyô nge' mi. 50Là Yésu tshob yi ndù: Nshun àm, a ju z'a ghù o se' nsen ni là. Bo se' mbaṅ i, njab mbu num Yésu, ntshùb i. 51Tshù, mo' mèn netèt tse boa Yésu be là, nyit bu i, nsô ṅwi, ndab tshe' ngale'te Nsi ze ndùb yi, nkeb toṅ i, 52Yésu tshob yi ndù: So ṅwi o ntùm mbàn i. Nummbe ben tse bo num ntsho' ṅwi là nsi kwù à ṅwi. 53O kwat'a ndù me lo ke ku'ni nebu' mbu Tàa! Là mb'a tum ntshu ntsho ba Angél me ndonni ntshob bàa gham. 54Mba ju ze bo na' nkite ndù a bwô a bumte là nsi bumt'a ndùke?
55Num #Luk. 19.47; 21.37yen ngelaṅ nà, Yésu tshob bwoṅ benntùn ndù: Bin tum ndo' ṅwi mba nzwit nse' neghom àm yi, mba me b'a fimntshu là; njoṅ lé'njù fa, me lo ke ntswe nsi ntùm Ndà Nsi, nke ntswite, bin ke tshùb àm. 56Là njoṅ yen nà fa se' à ndù ju ghatshob ntshob Nsi na' nkite là bumte. Njoṅ ghazi'te nu i fa faṅ i nkù.
Yésu mbwe Kaïfa. Mba Pétro gha Yésu là
(Mark. 14.53-65; Luk. 22.54,63-65; Yoha. 18.12; 13.19-24)
57Là ben tse bo tshùb Yésu là lo' i nèn yi ju Kaifa ngale'te Nsi ze ndùb, dù' ze ghalèn ṅwa'ni Nsi mba ghakwé mbwe na' ntse'te là. 58Là Pétro nke mbwe i tà ngùanesà, tà nèn nkum ntshundà ngale'te Nsi ze ndùb, ntsho bwe, ntswe nsi boa bônke' tse num neyen miagte nu.
59Ghale'te Nsi tse ndùbndùb mba ntse'te ghatsho'te ntsha fa nke ndiag kwénta tatte ze bo nsi yab num Yésu kà zwi i là. 60Bo ke yen, mba mba ghakwénta tatte na' ntum yàm nà. A be be mànjam, tsemo' ben bàa tum ntshob ndù: 61Yen #Yoha. 2.19mèn ni lo tshob ndù: Me ku'ni nesate Ndà Nsi, mbèn nkut mo' mum lé'njù tat. 62Ngale'te Nsi ze ndùb tsin tù, ntshob yi ndù: O ke' bùnte sàm nu ké? Ke ze tshen ben ni tshwèt ntete num o à? 63Là Yésu mi ntswe. Ngale'te Nsi ze ndùb tshob yi ndù: Num lén Nsi z'a be ntùn nà, me le't'o, tshob bag a be z'o b'a Kristô Mén Nsi là.
64Yésu #Dan. 7.13tshob yi ndù: Mb'o tshob là. Là me tshob bin ndù: Fe ndonni, bin nsi yen Mén mèn ndù a tswe num bag bu neta ze zwim, a nsi se' num ndot kamànyam. 65Là #Lev. 24.16ngale'te Nsi ze ndùb fag kummbaṅ se, ntshob ndù: A tshabte Nsi. Be bèn ndiag ghakwénta numke? 66Bin kwate ndùke? Bo bùnte ntshob ndù: A ku'ni mèn vù. 67Bo #Es. 50.6tôg nkekùà num se i, ndab i, ntsham i nto', ntshob ndù: 68Kristô, tshob bag, we z'a lab o à?
Pétro gha Yésu
69Là Pétro tswe nsi njù ntshundà, mo' mènnzwi ngafa' se' mbaṅ i, ntshob ndù: Mba wù lo be bin Yésu ze Galiléa. 70Là, a gha mbwe njoṅ yub fa, ntshob ndù: Me ke' lèn nu z'o tshwèt ntshob là. 71Là, a be tum nzendà, mo' yen i, ntshob ben tse bo be nsi là ndù: Yen mèn ni lo be bo Yésu ze Nazarèt. 72Là, a be ghubte nkàn mfe, ntshob ndù a ke' lèn yen mèn nà. 73Là, a be ghubte mén nda'nda', ben tse bo be bwe là, se' mbaṅ Pétro, ntshob yi ndù: Kua' nenùne, mba wù yu, o b'a mo' mèn netèt tshen ben nà, nummbe yu mat netshob tshwèt nda't'o. 74Là, a to' nema' njom, nkàn mfe, ntshob ndù: Me ke' lèn tshàm yen mèn nà. Be ndùse kù'ngab tô. 75Pétro kwimte ntshob Yésu mi a tshob yi ndù: Kù'ngab nsi be tô ndù o à gha àm yoṅ tat là, ntum njù, nkua' neshu.
Currently Selected:
Matio 26: BMa
Highlight
Copy
Compare
Share
Want to have your highlights saved across all your devices? Sign up or sign in
La Sainte Bible en Bamiléké-Medùmba © Alliance Biblique du Cameroun, 1993. All rights reserved.