Matio 25
25
Tànkùt ngonngon gham
(Mat. 24.42-44; Luk. 12.35-40)
1Nufen #Luk. 12.35kamànyam nsi fut'a ngonngon gham tse bo na' ndo' ndambo mube, ntum nèn nebumte boa ndungon nà. 2Tse tàn netèt bo na' mb'a ghafemni, tse tàn be ghazete. 3Nummbe ghafemni là lo lo' ndambo ke lo' mfèt. 4Là ghazete lo' mfèt ntùm ntshaṅ boa ndambo mube. 5Mba ndungon be se' nsèn nà, njoṅ yub fa me' miaglo, nzi. 6Là, a be tshaṅ tèttswe', mo' tshu'te tum, tshob ndù: Tshù ndungon nà, bin tum nèn bin à bo bumte. 7Njoṅ ngonngon nà fa lo num miaglo, nabte ndambo mube. 8Là femni tse tshob ghazete ndù: Bin fà mag mfèt num mine, nummbe mag ndambo tshwèt mbi. 9Là ghazete bùnte, ntshob ndù: Nga, bag fà bin, mb'a bwoṅ bag mba bin. A bwô ndù bin nèn la' ghaswèn mfèt, njun min bo. 10Ngelaṅ bo ke nèn nejun nà, ndungon se', tshen nà tse bo be tswe nke mbéb là tsho ndà nandà bo à bo; bo fùn nzendà. 11A #Luk. 13.25be ghubte mba tsemo' ngonngon nà se' yub, ntshob ndù: Tshùaben, Tshùaben, ghab nzendà bag. 12Là, a bùnte ntshob ndù: Kua' nenùne, me tshob bin ndù: Me ke' lèn zine. 13Ndùlala bin zi tshùalo, nummbe bin ke' lèn lé'njù ke nyam lo.
Tànkùt talaṅto
(Luk. 19.12-27)
14A #Luk. 19.11-27bèn mbe à mba mo' mèn z'a be nèn nkatte, ntsiaṅ ghafa' tse, ndé' tshu tse bo là. 15A lo fà talaṅto tàn mo', mfà talaṅto bàa mo', mbèn mfà talaṅto ntshù' mo'; mfà mba we lo be mb'a ku'ni num i là, nène. 16Be ndùse, mèn z'a kwé talaṅto tàn nà nèn, nta, njù tsemo' tse tàn. 17Be ndaṅndaṅ mèn z'a kwé bàa là, nèn nta, njù tsemo' tse bàa. 18Là mèn z'a kwé talaṅto ntshù' là nèn, ntswe' tô ntùm tsha'a, ndem nkàb tàab bwe. 19A be tshùa ngelaṅ yàme, tà tshen ghafa' là se', siaṅte tshu tse ts'a lem bo là. 20Mèn z'a kwé talaṅto tàn nà se' mbaṅ i, mfà tsemo' talaṅto tàn yi, ntshob yi ndù: Tà, o lo fà talaṅto me tàn; tshù, me ta njù tsemo' talaṅto tàn. 21Tàfa' tshob yi ndù: A bwô me ngafa' mebwô, o b'a mèn nenùne, mb'o be mèn nenùn num bontsit tshu là, me nsi faṅ tshu yàm wù, o ke ndé'é. Se' ntsho ntùm tsiaṅte tàan. 22Mba mèn z'a kwé talaṅto bàa là se' ze, ntshob ndù: Tà, o lo fà talaṅto me bàa, tshù, me ta njù tsemo' talaṅto bàa. 23Tàfa' tshob yi ndù: A bwô me ngafa' mebwô, o b'a mèn nenùne; mb'o be mèn nenùn num bontsit tshu là, me nsi faṅ tshu yàm wù, o ke ndé'é. Se' ntsho ntùm tsiaṅte tàan. 24Mèn z'a kwé talaṅto ntshù' là se' ze, ntshob ndù: Tà, me lo lèn ndù o b'a ngakubte z'a be ntsho' tshu dù' z'a be ke ywit là, z'a be ntse'te tshu dù' z'a be ke yag là. 25Me lo bwôg tshàm, nèn ndem talaṅto o ntùm tsha'a, tshù ju z'a be yu li!
26Tàfa' bùnte, ntshob yi ndù: Ngafa' ze kebwô, o b'a ndô, o lo lèn ndù me be ntsho' tshu dù' ze me be ke ywit là, nke ntse'te tshu dù' ze me be ke yag là, 27a lo bwô ndù o fà nkàb àm ben tse bo num ndé' nkàb là, mba me be bèn njam, nsô boa bin i. 28Ndùlala, bin kwé talaṅto là yi, mfà mèn z'a ghù talaṅto gham nà. 29Nummbe #Mat. 13.12; Mark. 4.25; Luk. 8.18bo nsi fà mèn z'a ghù là, a ghù ntshùate; là mèn z'a ke' ghù là, bo a' kwé mba z'a ghù là yi. 30Mbe #Mat. 8.12; 22.13; Luk. 13.28se' mba ngafa' z'a ke' ywimte là, bin ma' i njù ntùm dù' njame. Nekua' mba nefèt nsô nsi be yen dù' là.
Netsho'te ntsha mànjam
(Yoha. 5.22; Mat. 23.26-29)
31Là #Mat. 16.27; 19.28ngelaṅ Mén mèn nsi se' ntùm nkuni mi boa njoṅ Angél fa là, a tswe num ko' nkuni mi. 32Njoṅ nzwit benntùn fa nsi tse'te mbwe i, a fagte yub bag bag mba ngabéb mbwe be mfagte njùmbwe boa fot là, 33njab njùmbwe num bag bu i ze zwim, njab ba fot num bag bu i ze kwéb. 34Mfen nsi tshob ben tse bo be num bag bu i ze zwim nà ndù: Bin se'e, bin ghambotni Tàa, njù nufen se bo na' nabte bin fe ngelaṅ nenabte njù be là; 35nummbe nziku' lo ya àm, bin fà jujù me; ntù àm kù, bin fà ntse me; me lo be ngùn, bin lo' àm ndà; 36mbe tunntôg, bin se' nzwe me; nke ngone, bin se' ndôt'àm; mbe ndàtsha, bin se' mbaṅ àm. 37Là ben netsin nsi bùnte tshob yi ndù: Bag na' njen o à zit ngelaṅ nziku' ya o, bag fà jujù wù, ntù o kù, bag fà ntse wù à? 38Bag na' njen o à zit ngelaṅ o be ngùn, bag lo' o ndà, o be tunntôg, bag fà nzwe wù à? 39Bag na' njen o à zit ngelaṅ o nke ngone, ke ndàtsha lo, bag se' mbaṅ o à? 40Mfen nsi bùnte tshob bo ndù: Kua' nenùne, me tshob bin ndù: Njoṅ ngelaṅ fa ze bin na' ngù num mo' mèn netèt tshen bontsit fèt tshàm tse nke'nke' li là, bin na' ngù à num àm.
41A nsi tshob ben tse bo be num bag bu i ze kwéb là ndù: Ghandon, bin lo mbaṅ àm, nèn ntùm mbwôg z'a tswe yoṅ ntshù', ze bo na' nabte njab Satan mba angél tse là. 42Nummbe nziku' lo ya àm, bin ke fà jujù me; ntù àm kù, bin ke fà ntse me; 43me lo be ngùn, bin ke lo' àm ndà; mbe tunntôg, bin ke fà nzwe me; me lo ke ngone, mbe ndàtsha, bin ke se' ndôt'àm. 44Mba bo yub nsi bùnte tshob ndù: Tshùaben, bag na' njen o à zit ngelaṅ nziku' ya o, ntù o kù, o be ngùn, mbe tunntôg, nke ngone, mbe ndàtsha bag ke fa' wù à? 45Là, a nsi bùnte bo, tshob ndù: Kua' nenùne, me tshob bin ndù njoṅ ngelaṅ fa ze bin na' mbe ke ghù mo' netèt tshen tse nke'nke' li là, bin na' mbe ke ghù à num àm. 46Tshen #Dan. 12.2ben ni nsi nèn ntùm nge' yoṅ ntshù', là ben netsin nèn ntùm yôg matmat.
Currently Selected:
Matio 25: BMa
Highlight
Copy
Compare
Share
Want to have your highlights saved across all your devices? Sign up or sign in
La Sainte Bible en Bamiléké-Medùmba © Alliance Biblique du Cameroun, 1993. All rights reserved.