Matio 17
17
Mba wut Yésu kaṅ nà
(Mark. 9.2-13; Luk. 9.28-36)
1Lé'njù #2 Pét. 1.17-18ntôg lo be tshùa, Yésu lo' Pétro, Yakobo, mba Yohané mfèl i, bo à bo nèn tù' bo num mbat ndù a sage; 2wul i kaṅ mbwe bo, se i ziag mba lagnyam nà, nzwe tse tù' fôgtab mba nka' là 3Tshù, Mosé mba Elia ṅwag mbwe bo, nke ntshobte boa Yésu. 4Pétro bùnte ntshob Yésu ndù: Tshùaben, a bwô bag à bin ghô nsen ni; a be z'o kô là, mba m'a' kut ntàb tat nsen ni, mo' be yu, mo' be ze Mosé, mo' bèn mbe ze Elia.
5Mb'a #Net. 22.2; Neb. 18.15; Yobk. 2.7; Es. 42.1; Mat. 3.17; 12.18; Mark. 1.11; Luk. 3.22ke nke' ntshob là, tshù, mo' ndot neké' se' ndam yub mbume; tshù, ntùm ndot nze mèn tshob ndù: Yen ni b'a mén àm ze me num nkô i, mbèn njab ntù àm fa num i là. Bin ke nju' i. 6Ngelaṅ ghazi'te nu i ju' nze là, bo vù nsi kabkab, bwôg tshùb yub kua' neshu. 7Là Yésu se' mbaṅ bo, nkwag yub ntshob ndù: Bin lo nsi kà bin nebwôge.
8Bo bù' miag mube, ke yen sàm mèn k'a ke nda' Yésu tù' i. 9Bo be swe' num mbale, Yésu tshù' yub, ntshob ndù: Kà bin tshob yen njem bin yen nà sàm mèn tà nkum ngelaṅ Mén mèn nsi lo num vù là. 10Ghazi'te #Mal. 3.23nu i bètt'é, ntshob ndù: Ghalèn ṅwa'ni Nsi num nke ntshob ndù a bwô Elia bwôgmbwe nse' numke?
11Là, a bùnte ntshob ndù: Ṅ, Elia a' se', a nsi yab njoṅ nu fa num nka i. 12Là #Mat. 11.14me tshob bin ndù: Elia à se'e, bo ke lèn i, ngù num i mba bo kô là. Mba Mén mèn nsi yen nge' be ndaṅndaṅ mum mbu mube. 13Ghazi'te nu i lèn ndù a Yohané nganyu' benntùn ntse z'a tshwèt ntshob bo là.
14Bo be kum mbaṅ bwoṅ benntùn, mo' mèn se' mbwe i, nkwim ntunkekwi' mi nsi, ntshob ndù: 15Tshùaben, ko ndèn mén àm, nummbe a num ngwù wà'à, njen nge' neshu; nummbe a num nke ngwù ntùm mbwôge, mbèn nke ngwù ntùm ntse. 16Me lo ndo' i nse' ntèt ghazi'te nu o yi, bo ke ku'ni neyat'é. 17Là Yésu bùnte, ntshob ndù: Zwiaṅ ba ke ghù bamntù mba ben neṅu'te, me nsi tswe bag à bin tà kum ngelaṅ ndùke? Me nsi fènte zin tà kum ngelaṅ ndùke? 18Bin lo' i se' yi nsen ni, mfà me. Yésu tshobt'é, ywètkebwô tum num i, mèn nà yate fe num yen ngelaṅ nà. 19Ghazi'te nu Yésu se' mbaṅ i, ntshob yi tù' bo ndù: Numke bag num mbe ke ku'ni yag neta' i à? 20Là, #Mat. 21.21; Mark. 11.23; 1 Korin. 13.2a tshob bo ndù: Num bamntù zin ze metsili. Nummbe me tshob bin kua' nenùn ndù: A lo mbe ndù bin ghù bamntù mba lag metsit njwit tù là, mba bin tshob yen mbat li ndù: Lo nsen ni, nèn nsen nà, mb'a nsi nène; sàm ju ke nsi tshùa zine. [ 21Yen lèn ywètkebwô li ke' be tum k'a ke nda' ntùm le'te Nsi mba netswe nziku'u.]
Mba Yésu bèn nsoṅ vù se là
(Mark. 9.30-32; Luk. 9.43-45)
22Mo' lé'njù bo tse'te Galiléa là, Yésu tshob bo ndù: Bo nsi fà Mén mèn mum mbu benntùn, 23bo zwi i, a be be mbatte lé'njù tat a lo num vù. Bo nywin kua' neshu.
Ma'te Ndà Nsi
24Bo #Netu. 30.13; 38.26be kum Kapernaum, ghakwé ma'te Ndà Nsi se' mbaṅ Pétro, ntshob ndù: Ngatswite zin ke' be fà ma'te Ndà Nsi ké? 25A tshob ndù a num mfà. Ngelaṅ Pétro tsho ndà là, Yésu bwôgmbwe ntshob yi ndù: Simon, o kwate ndùke? Fenfen ntùm njù ke nkwé ma'te mba ntshub à ba we? Bon tshob ke ba ghùn à? 26Mba Pétro tshob yi ndù ba ghùn nà, Yésu tshob yi ndù: Ndùlala bo sô bon tshob bwe. 27Là nebe ke ghù ndù bo fa'te num be, nèn mbaṅ dibantse, ma' lube; mbwe ngontse z'o nsi ghom nà, tshùb i, nga' ntshu i, o nsi yen ta' statère bwe ntshù'; lo'o, mfà bo num yàm tu mba yu.
Currently Selected:
Matio 17: BMa
Highlight
Copy
Compare
Share
Want to have your highlights saved across all your devices? Sign up or sign in
La Sainte Bible en Bamiléké-Medùmba © Alliance Biblique du Cameroun, 1993. All rights reserved.