Matio 16
16
Ntsha' ba Férésia
(Mark. 8.11-13; Luk. 12.54-56)
1Ba #Mat. 12.38; Luk. 11.16Férésia mba ba Sadukai se' mbaṅ i, ndaṅt'é, mbètt'é ndù a la'te lèn nsà z'a fe kamànyam nà bo. 2Là, a bùnte, ntshob bo ndù: A num mbe mfetnjù, bin nke ntshob ndù: Njù a' bwô, nummbe kamànyam b'a mba mbwôg là. 3A be nkebnjù, bin nke ntshob ndù: Sènni njù a' bag, nummbe kamànyam b'a nzwe'nzwe'. Bin lèn mba ntshù' kamànyam be là ke yôg nku'ni nelèn lèn ngelaṅ njù. 4Zwiaṅ #Mat. 12.39; Luk. 11.29ben kebwô mba ghaghù màndà tshwèt mbètte lèn, bo ke nsi bèn fà lèn yi k'a ke nda' lèn Yona. A tshob ndùlala mfaṅ yub nène.
5Bo be nèn mo' yoṅ dibantse, ghazi'te nu i lagte nelo' bàn. 6Là #Luk. 12.1Yésu tshob bo ndù: Bin bam nà, nzete num ntsha' ba Férésia mba ba Sadukai. 7Bo kwate ntùm ntù tshob ndù: A b'a nummbe be ke' lo' bàn. 8Là Yésu be lèn ndùlala, ntshob ndù: Ghabamntù metsili, numke bin nke nkwate ntùm ntù tsin mba bin ke' ghù bàn n'à? 9Bin #Mat. 14.17-21ke' yoṅ nju' ke bèn nekwimte ntu' bàn ntàn num benntùn ntsha' tàn, mba njoṅ nkag mbe'te mi mi bin lo' là, 10ke #Mat. 15.34-38ntu' bàn sammbàa lo num benntùn ntsha' kuà, mba njoṅ nta' mbe'te mi mi bin lo' là ké? 11Ke z'a ghù bin ke ju' ndù a ke b'a num bàn ze me lo ntshob bin à? Là bin zete num ntsha' ba Férésia mba ba Sadukai. 12Ndùlala bo ju' ndù a lo ke ke ntshob ndù bo bam n'a num ntsha' bàn, là num ze netswite ba Férésia mba ba Sadukai.
Pétro bam ndù Yésu b'a Kristô
(Mark. 8.27-30; Luk. 9.18-21; Yoha. 6.66-69)
13Ngelaṅ Yésu kum bag ngô Késaréa Filibo là, a bètte ghazi'te nu i, ntshob ndù: Benntùn num nke ntshob ndù Mén mèn b'a we? 14Bo #Mat. 14.1-2; Mark. 6.14-15; Luk. 9.7-8tshob ndù: Tsemo' num nke ntshob ndù o b'a Yohané nganyu' benntùn ntse, tsemo' tshob ndù: Elia, tsemo' tshob ndù Yérémia, ke ndù mo' mèn netèt ghatshob ntshob Nsi lo. 15A tshob bo ndù: Là bin num ntshob zin ndù me b'a we? 16Simon #Yoha. 6.68-69Pétro bùnte, ntshob ndù: O b'a Kristô, Mén Nsi z'a be ntùn nà. 17Yésu bùnte, ntshob yi ndù: O b'a mènfen me Simon mén Yona, nummbe a ke b'a mbàb mba lem bèn nda'te yen nu là wù, là Tàa z'a be mfe kamànyam nà. 18Mba tu wul àm me tshob wù ndù o b'a Pétro, num sen loṅ nà me nsi kut yàm Ndà Nsi bwe, nzendà ngô fe ben ke nsi ta tshùa i. 19Me #Mat. 18.18; Yoha. 20.23nsi fà fùn kamànyam wù; ju z'o nsi kut num nsitsha' là, bo nsi bèn kut kamànyam; ju z'o kiagte num nsitsha' là, bo nsi bèn kiagte kamànyam. 20A to' ghazi'te nu i ndù kà bo tshob sàm mèn ndù tu wul i b'a Kristô.
21Fe num yen ngelaṅ nà, Yésu Kristô to' netswite ghazi'te nu i ndù a bwô ndù a nèn Yérusalém, njen nge' yàme, ghakwé mbwe, ghale'te Nsi tse ndùbndùb mba ghalèn ṅwa'ni Nsi zwi i, a be mbatte lé'njù tat a lo num vù. 22Pétro lo' i, bo yi bènte njam, a to' netshobt'é, ntshob ndù: Tshùaben, a bwô Nsi ko ndèn mu; yen nu là ke nsi se' num o! 23Là, a kaṅ wul i, ntshob Pétro ndù: Lo njam àm me Satan, o b'a ywi' mbwe àm, nummbe nkwatenu mu ke' b'a mi Nsi, là mi benntùn.
24Ndùlala #Mat. 10.38; Luk. 14.27Yésu tshob ghazi'te nu i ndù: A be ze mèn kô nebwe àm nà, a gha tu wul i, nket ze fanta'tù, mbèn ntam njam àm. 25Nummbe #Mat. 10.39; Luk. 17.33; Yoha. 12.25mèn z'a kô neyôg yôg se là, mb'a ghua' i, là mèn z'a ghua' yôg se num àm nà, mb'a lem i. 26Nummbe a be ze mèn ghù njoṅ ngô li fa, yôg se bi là, mb'a ywimt'é ke? Ze be mèn se' mfà ndo' mbate yôg se yi là b'a ke? 27Nummbe #Mat. 25.31; Yobk. 62.13; Rom. 2.6Mén mèn nsi se' ntùm nkuni tàab boa ba Angél tse, a nsi fà mba we lo be ndaṅndaṅ num mfa' mi. 28Kua' nenùne, me tshob bin ndù: Tsemo' benntùn netèt ben tse bo be nsen ni là ke nsi kwù tà nkum ngelaṅ bo yen Mén mèn se' ntùm nufen se là.
Currently Selected:
Matio 16: BMa
Highlight
Copy
Compare
Share
Want to have your highlights saved across all your devices? Sign up or sign in
La Sainte Bible en Bamiléké-Medùmba © Alliance Biblique du Cameroun, 1993. All rights reserved.