Matio 11
11
1Ngelaṅ Yésu miagte nefà ntag ghazi'te ntshob bàa gham nà, a tum yen dù' là, nèn netswite mbèn nke ntshob ntshob Nsi ntùm ngô tshobe.
Ghantum Yohané mbaṅ Yésu
(Luk. 7.18-23; Yoha. 5.36)
2Ntùm ndàtsha, Yohané ju' nu num mfa' Kristô, ntum tsemo' ghazi'te nu i bo nèn ntshob Yésu ndù: 3O b'a mèn z'a tshwèt nse' ké? Ke bag bèn mbéb mo' mènghua à?
4Yésu bùnte ntshob bo ndù: Bin nèn nsoṅ Yohané nu ze bin tshwèt nju', mbèn njen nà. 5Ba #Es. 35.5-6; 61.1mfùmiag tshwèt njene, ba kekat nke nzine, wut ghankin nke ndàne; ba mbu'ntoṅ nke nju'u, fe ben nke ndo num vù; bo tshwèt nke ntshob nkùn mebwô bwoṅbwoṅ. 6Mènfen b'a mèn z'a ke nsi fa't'a num àm kà vù nsi là. 7Ngelaṅ bo ke nèn nà, Yésu to' netshob nu bwoṅ benntùn mfà num Yohané: Bin na' nèn lôt'a ke num kônkwa à? Nka'nesoṅ ze fetmbaṅ tshwèt nyi't'é là ké? 8Là bin na' nèn yen à ke? Mo' mèn z'a ket mo' kuni nzwe là ké? Tshù, ben tse bo num nket nzwe mebwô là b'a ntùm ndà fenfen. 9Bin na' nèn à numke? Num neyen mo' ngatshob ntshob Nsi ké? Ṅ, me tshob bin ndù a tshùa ngatshob ntshob Nsi. 10A #Mal. 3.1b'a mèn ze bo na' nkite num i ndù: Tshù, me tum ngantum àm mbwe o, z'a nsi nabte manze o mbwe o là. 11Kua' nenùne, me tshob bin ndù: Netèt ben tse mènnzwi bèn mbwe yub là, sàm mèn ke' tum z'a tshùa Yohané nganyu' benntùn ntse là. Là nda' metsit mén ntùm nufen kamànyam tshùa i. 12Fe #Luk. 16.16num tse lé'njù Yohané nganyu' benntùn ntse tà nse' nkum ndonni, bo tshwèt nkagtùn netsho ntùm nufen kamànyam ntùm neta, ben neta tshwèt ntsho bwe tùn. 13Ghatshob ntshob Nsi mba ntshù' Nsi lo tshob ntshob Nsi tà nse' nkum num Yohané. 14A #Mal. 3.23; Mat. 17.10-13; Mark. 9.11-13be ze bin kô nebam nà, mb'a b'a Elia z'a na' mbwô ndù a se' là. 15Mèn z'a ghù ntoṅ nà, a ju'! 16Be me mfà mfi' yen zwiaṅ benntùn ni à num we? Bo fut'a bônke' tse bo tswe num nsém, nke nkua'a, ntshob shun tshob ndù:
17Bag bu' loṅe,
bin ke nyiaṅ;
ntôte vù, bin ke bam, ke làn.
18Nummbe Yohané lo se'e, ke be jù, ke bèn nu; bo tshob ndù: A ghù ywètkebwô. 19Mén mèn lo se'e, nke njù, mbèn nu; bo tshob ndù: Tshù ngajù mba nganu ndu', nshun ghakwéfé' mba ben kebwô li. Là mfa' mi lo la'te ndù zenu Nsi b'a netsine.
Nge' num tsemo' ngô Galiléa
(Luk. 10.13-15)
20Yésu to' netshobte ngô ts'a na' ngù nsà yàm bwe là, nummbe bo lo ke kaṅ ntù tshobe. 21Nge' #Es. 23.1-18; Ez. 26.1—28.26; Yo. 4.4-8; Am. 1.9-10; Sak. 9.2-4num wù, me Kôrazin, nge' num wù, me Bètsaida, nummbe nsà tse bo ghù netèt bin nà na' mb'a netèt Tiro bo Sidon mba bo lo à kaṅ ntù tshobe, ntôg bàm, mbèn nse' bwembwôge. 22A ndùlala, me tshob bin ndù: Nu Tiro mba Sidon nsi bwô tshùa zin mum lé'njù netsho'te ntsha.
23Wù #Es. 14.13-15; Net. 19.24-28Kapernaum,
o nsi ko' kà nèn nkum kamànyam ké?
Bo nsi lo' o, swe' yi tà nèn nkum ntùm ngô fe ben.
Nummbe nsà tse bo ghù netèl o là na' mb'a netèt Sodom,
mb'a ke' tà nse' nkum sènni.
24Ndùlala #Mat. 10.15; Luk. 10.12me tshob bin ndù: Nu ngô Sodom nsi bwô tshùa yu mum lé'njù netsho'te ntsha.
Bin se' me, nkwé fitewut
(Luk. 10.21-22)
25Num yen ngelaṅ nà, Yésu tshob men ntshob li ndù: Me nyàmt'o me Tà, Tshùaben ba mfe kamànyam mba ba mànsi, wù z'o lem tshen nu li num miag ghazenu boa ghakwanu, nda'te be nda' bônke' là. 26A b'a ndùlala me Tà, nummbe o yen ntùm yu nekô ndù a bwô ndùlala. 27Tà #Yoha. 3.35; 1.18; 10.15lo fà njoṅ tshu fa me; sàm mèn ke' lèn Mén, mb'a nda' Tà; sàm mèn ke bèn ndèn Tà, mb'a nda' Mén, mba mèn ze Mén kô nela't'é yi là.
28Bin se' me njoṅ zin fa tse bin bole, mbèn nket lèt là, tu wul àm m'a' fà fite bin. 29Bin #Yer. 6.16ket sàm kele'e, nzi'te yàm nu; me b'a mèn nefite mbèn mbe ngafà wut nsi ntùm ntù, bin nsi fon fite mum ntù tsine. 30Nummbe sàm kele' bwô, yàm lèt bèn mfùage.
Currently Selected:
Matio 11: BMa
Highlight
Copy
Compare
Share
Want to have your highlights saved across all your devices? Sign up or sign in
La Sainte Bible en Bamiléké-Medùmba © Alliance Biblique du Cameroun, 1993. All rights reserved.