Matio 10
10
Mba Yésu tum tse ntshob bàa gham nà
(Mark. 3.13-19; 6.7-11; Luk. 6.12-16; 9.1-5)
1A tsiaṅ ghazi'te nu i ntshob bàa gham mbaṅ i, mfà ngù' neta' ywètkebwô, neyate njoṅ ngokèt fa mba njoṅ lo' nzenze fa bo. 2Ndèn ghantum ntshob bàa gham nà b'a ndù: Mbwe i, Simon mo' lén se be Pétro là, Andréa mfèl i, Yakobo mén Zèbèdéo mba Yohané mfèl i; 3Filibo mba Bartélémi. Tomas mba Matio ngakwéfé', Yakobo mén Alféo mba Tadéo; 4Simon mén la' mba Yuda Iskariot mèn z'a swèn i là.
5Yésu tum tshen ben ntshob bàa gham ni, mfà men ntag li bo ndù: Kà bin nèn mbaṅ ghakelèn Nsi, kà bin tsho ntùm sàm ngô ba Samaria. 6Bin nèn à be mbaṅ njùmbwe tunndà Israél tse bo bi là. 7Bin #Luk. 10.4-12be zin num manze nke ntshob ndù nufen kamànyam à ghebte. 8Bin ke njate ghangokèt, mbam fe ben, ndànte ghankine, mbèn nta' ba ywètkebwô. Bin na' nkwé à banban, bin bèn mfà zin banban.
9Kà bin diag nelo' gol ke silba, mba keba lo ntùm nkob mine, 10ke #1 Korin. 9.14; 1 Tim. 5.18lo' bàm num katte, ke lo' nzwe bàa mba nketo'o, ke lo' kôg, nummbe ngafa' ku'ni num jujù i. 11Mba ntùm zit taṅla' lo ze bin nsi tsho bwe là, bin bètte mèn z'a ku'ni nelo' zin nà. Bin tswe bwe tà nkum ngelaṅ bin tum nà. 12Ngelaṅ bin tshwèt ntsho ndà là, bin tsha't'é. 13A be ze yen ndà là ku'ni là, fite zin se' num i; a be z'a ke' ku'ni là, fite zin bèn bin. 14Mèn #Mfa' Gha. 13.51z'a ke' lo' zine, ke bèn nju' ntshob min nà, bin tum ntùm yen ndà là, ke ntùm yen ngô là lo, mbe tum mbé'te mbab num nku mine. 15Kua' #Mat. 11.24; Net. 19.24-28nenùne, me tshob bin ndù: Nu ngô Sodom mba Gomora nsi bwô tshùa ze yen ngô là mum lé'njù netsho'te ntsha.
16Tshù, #Luk. 10.3me tum zin mba njùmbwe netèt ba nzwimàntô là, ndùlala bin zete mba ba nyu là, mbèn ndàn mba ba bwoṅtambia' là. 17Bin #Mark. 13.9-11; Luk. 12.11-12; 21.12-15bamnà num benntùn, nummbe bo nsi te zin mbwe ghatsho'te ntsha, lab zin nshua' ntùm sinagogue tshobe. 18Bo nsi nèn bin mbwe ba ngomna mba fenfen num àm ndù bin kwé nta mbwe bo mba mbwe ghakelèn Nsi. 19Ngelaṅ bo nsi te zin mbwe bo là, kà bin lab wut tsin num nu ze bin nsi tshob là, mba mat ze bin nsi tshob yi là; bo nsi fà nu ze bin nsi tshob là bin be num yen nyam nà. 20Nummbe bin ke bèn tshobe, là Ywèt Tà zin bèn tshob num bin.
21Mèn #Mark. 13.12; Luk. 21.16nsi ghù bo zwi mfèl i, tà ghù bo zwi mén i. Bon nsi ya ntù tà yub mba mà yub, zwi yube. 22Njoṅ #Mat. 24.9,13; Mark. 13.13; Luk. 21.17benntùn fa nsi bàn zin num lén sàm, là mèn z'a fènte tà nèn miagte là, mba yen mèn nà nsi yôge. 23Ngelaṅ bo tsho' nku min kebàn ntùm mo' ngô là, bin kù nèn ntùm mo' ze ghua. Nummbe me tshob bin kua' nenùn ndù bin ke nsi miagte ngô Israél ke be ndù Mén mèn se'e. 24Ngazi'te #Luk. 6.40; Yoha. 13.16; 15.20ke' be tshùa ngatswite, nkuan ke bèn ntshùa tàab. 25A #Mat. 9.34; 12.24; Mark. 3.22; Luk. 11.15ku'ni ngazi'te nebe mba ngatswite là, mba nkuan nebe mba tàab là. A be ze bo tsiaṅ tàndà ndù Bèèzèbul là, mba bo nsi tsiaṅ ba ndà yoṅ yàm ntshùa ndùlala.
26Kà #Mark. 4.22; Luk. 8.17bin bwôg yube. Mo' nu nelem ke be z'a ke nsi tum njù mbwôgtshù là; mo' nu ke bèn mbe ntùm tsham ze bo ke nsi lèn nà. 27Ju ze me tshob bin ntùm dù' njam nà, bin tshob ntùm dù' tàyage. Nu ze bo tagte toṅ bin nà, bin tsin num tuba' kà ntshobe. 28Kà bin bwôg benntùn tse bo num nzwi wut, là ke ku'ni nezwi zwiag là, bin bwôg à mèn z'a ku'ni nebiagte zwiag mba wut ntùm mbwôg là. 29Bo ke' be swèn ntôgzin mba ta' keba ké? Là ta' i mba ntshù' ke' be vù num tsha' ke be ndù Tà zin kô. 30Mbèn mbe, bo siaṅ njoṅ ntàn nyiaṅtu tsin fa. 31Kà bin bwôg sàm ju, bin tanjoṅ ntshùa ntôgzin yàme. 32Njoṅ benntùn fa tse bo nsi bam àm mbwe benntùn nà, mba mba me nsi bam yub mbwe Tà z'a mfe kamànyam nà. 33Mèn #2 Tim. 2.12z'a gha àm mbwe benntùn nà, mba mba me nsi gha i mbwe Tà z'a be mfe kamànyam nà.
34Kà bin kwate ndù me se' nema' à fite num tsha'a; me ke' se' nema' à fite, là me se' nema' à ṅwi. 35Nummbe #Mik. 7.6me se' nefagt'a nshum bo tàab, ngon bo màab, nzwi mén bo màndu i. 36Ghakeban mèn nsi tum à be kua' ndà i. 37Mèn z'a kô tàab ke màab lo ntshùa àm nà, a ke' ku'ni num àm. Mèn z'a kô nshum i ke ngon i lo ntshùa àm nà, a ke' ku'ni num àm. 38Mèn #Mat. 16.24; Mark. 8.34; Luk. 9.23z'a ke' ket ze fanta'tù ntam njam àm nà, a ke' ku'ni num àm. 39Mèn #Mat. 16.25; Mark. 8.35; Luk. 9.24; 17.33; Yoha. 12.25z'a lem yôg se là, mb'a nsi ghua' i; mèn z'a ghua' yôg se num àm nà, mb'a lem i.
40Mèn #Mark. 9.37; Luk. 9.48; 10.16; Yoha. 13.20z'a lo' zin nà lo' àm; mèn z'a lo' àm nà, lo' mèn z'a tum àm nà. 41Mèn z'a lo' ngatshob ntshob Nsi num lén ngatshob ntshob Nsi là, a nsi kwé ntsho'fa' mba ngatshob ntshob Nsi là; mèn z'a lo' mèn netsin num lén mèn netsin nà, a nsi kwé ntsho'fa' mba mèn netsin nà. 42Mèn z'a nsi fà ntu' ntse fi mèn netèt tshen bontsit tse li num lén ngazi'te nu àm nà, me tshob bin kua' nenùn ndù yen mèn nà ke nsi bi mi ntsho'fa'.
Currently Selected:
Matio 10: BMa
Highlight
Copy
Compare
Share
Want to have your highlights saved across all your devices? Sign up or sign in
La Sainte Bible en Bamiléké-Medùmba © Alliance Biblique du Cameroun, 1993. All rights reserved.