Matio 12
12
Nefag nsa lé' Sabbat
(Mark. 2.23-28; Luk. 6.1-5)
1Num #Neb. 23.26yen ngelaṅ nà Yésu tshùa ntùm nà nsa mo' lé' Sabbat. Nziku' ya ghazi'te nu i, bo to' nefag nsa, mfèle. 2Ba Férésia yen, ntshob Yésu ndù: Tshù, ghazi'te nu o tshwèt ngù ju ze ntshù' ke' bam neghù lé' Sabbat là. 3Là, #1 Sam. 21.1-7a tshob bo ndù: Bin ke' siaṅ ju ze David na' ngù ngelaṅ nziku' ya i boa ben tse bo à bo na' mbe là, 4mb'a #Lev. 24.9na' ntsho Ndà Nsi njù bàn le'te Nsi ze ntshù' na' mbe ke bam yi nejù, mba ben tse bo à bo be là, là k'a ke nda' ghale'te Nsi tù' bo là. 5Bin #Nes. 28.9-10lo ke bèn nsiaṅ ntùm ntshù' ndù ghale'te Nsi num mbagte ntshù' Sabbat ntùm Tèmpèl lé'njù Sabbat, ke be ghavù ntsha ké? 6Là me tshob bin ndù: Nsen ni mo' ju ndùb num bwe ndù a tshùa Tèmpèl. 7Bin #Mat. 9.13; Os. 6.6lo mbe kà ndèn tun men ntshob li ndù: Me kô à kondèn ke b'a ju nele'te Nsi, mba bin ke' naṅ ntsha tu ben tse bo ke' vù ntsha là. 8Nummbe Mén mèn b'a tà lé' Sabbat.
Mèn ze bu i jum nà
(Mark. 3.1-6; Luk. 6.6-11)
9A tum yen dù' là, nèn ntùm sinagogue yub. 10Tshù, mo' mèn lo be bwe ndù bu i jum. Bo bètte Yésu ndù: Ntshù' bam neyate mèn lé' Sabbat ké? Bo na' nke ndiag à nu ze bo tshùa bwe kà bot'é là. 11A #Luk. 14.5tshob bo ndù: We z'a netèt bin z'a ghù mbwe i a vù tàm lé' Sabbat, mb'a ke tshùb i, nsô i à? 12Mènntùn ke' tanjoṅ neshu ntshùa mbwe ké? Ndùlala ntshù' bam ndù mèn ghù numebwô lé' Sabbat. 13A tshob mèn nà ndù: Nyit bu o. A nyit bu i, bu i tswe mba mo' là. 14Là ba Férésia tum, ngù ntse'te nediag mba bo nsi tshùa kà zwi Yésu là.
Ngafa' ze Nsi tsho' là
15Là Yésu be lèn yen nu là, ntum yen dù' là. 16Benntùn yàm tam njam i, a yate yub fa, a tshobte yub kua' neta ndù kà bo ghù bo lèn i, 17ndù men ntshob li mi Esaya ngatshob ntshob Nsi na' ntshob là bumte ndù:
18Tshù #Es. 42.1-3ngafa' àm ze me tsho' i li,
mèn ze me num nkô i,
ze ntù àm yab nkwatenu mi num i là;
m'a' yab Ywèt tshàm num i,
a nsi tshob nunetsin ghakelèn Nsi.
19A ke nsi kam ntsha, ke bèn ntshobte neta,
bo ke nsi ju' nz'é num manze.
20A ke nsi be' nka'nesoṅ z'a ben nà,
ke bèn mbiag nesèn mbwôg z'a tshwèt nziag là,
tà nkum ngelaṅ z'a nsi ghù nunetsin ma' ntshùa là.
21Ghakelèn Nsi nsi nywinte num lén se.
Yésu mba Bèèzèbul. Tù mba ntàm mi
(Mark. 3.20-30; Luk. 11.14-23)
22Bo lo' mo' ngaghù ywètkebwô nse' yi mbwe i; a na' mb'a mfùmiag mbèn mbe ketshob. A yat'é; yen mèn nà yen, mbèn ntshobe. 23Njoṅ bwoṅ benntùn fa tshàm, ntshob ndù: Yen mèn ni ke b'a mén David ké? 24Là #Mat. 9.34; 10.25ba Férésia ju', ntshob ndù: Yen mèn ni ke ndo' à Bèèzèbul mfen ba ywètkebwô kà nta' ywètkebwô yi.
25Yésu be lèn nkwatenu mube, ntshob bo ndù: Njoṅ nufen fa z'a num ngabte wul i là, ke nèn à nebi. 26A be ze Satan ta' Satan nà, mb'a ghabte wul i ze tu, mba nufen i nsi tswe à ndùke? 27A be ze me num ndo' à Bèèzèbul nta' ywètkebwô yi là, mba bon tsin ke ndo' à we nta' yub yi à? A ndùlala, bo nsi be tsin ghatsho'te ntsha. 28Là, a be ze me num ndo' à Ywèt Nsi nke nta' ywètkebwô yi là, mb'a b'a ndù nufen Nsi se' tà nkum mbaṅ bin. 29Be mèn ku'ni netsho ndà mèn neta, ndagte tshu tse, a be z'a ke' bwôgmbwe nkut yen mèn neta là kà njôg ndagte ndà i là ké? 30Mèn #Mark. 9.40ze bag yi ke' bèn mbe là, mb'a b'a ngakeban àm; mèn ze bag yi ke bèn nke ntse'te tshu là, mb'a ke nesate.
31A ndùlala me tshob bin ndù: Njoṅ nukebwô fa, njoṅ tshabte fa, bo nsi lagte benntùn, là bo ke nsi lagte tshabte num Ywèle. 32Mba #Luk. 12.10we lo z'a tshob mo' ntshob num Mén mèn nà, mba bo nsi lagt'é; là mèn z'a tshob nu num Ywèt Nelàn nà, mba bo ke nsi lagte yi ntùm yen njù li, mba ntùm njù z'a nsi se' là.
33Bin #Mat. 7.20; Luk. 6.44tshob ndù: Tù bwô mba ntàm mi a' bwô; ke netshob ndù: Tù bag mba ntàm mi a' bag. Nummbe bo ke ndèn tù à ntàm mi. 34Nzwit #Mat. 3.7; 23.33; 15.18; Luk. 3.7; 6.45ngamnyu, be bin ben kebwô ku'ni netshob numebwô à ndùke. Nummbe ju z'a dun ntùm ntù mèn nà, ntshu ke ntshob à be yi. 35Mèn mebwô num nsô ju mebwô ntùm tshu mebwô ts'a tse'te là; mèn kebwô sô ju kebwô ntùm tshu tse tse kebwô. 36Me tshob bin ndù: Mum lé'njù netsho'te ntsha, benntùn nsi tshob nu fà num ntshob ke tun i mi bo na' ntshob là. 37Nummbe bo nsi tsiaṅ o mèn netsine, ntshùa à num ntshob mu, bèn naṅ ntsha tu o, ntshùa num ntshob mu.
Yésu gha neghù nsà
(Mat. 16.1-4; 11.20-24; Mark. 8.11-12; Luk. 11.29-32)
38Tsemo' #Mat. 16.1; Mark. 8.11; Luk. 11.16ghalèn ṅwa'ni Nsi mba ba Férésia bùnte yi ntshob ndù: Ngatswite, bag kô ndù o ghù nsà bag yene. 39Là, #Mat. 16.4; Mark. 8.12a bùnte ntshob bo ndù: Zwiaṅ ben kebwô mba ghaghù màndà tshwèt mbètte nsà; bo ke nsi bèn fà nsà yi, k'a ke nda' nsà Yona ngatshob ntshob Nsi. 40Nummbe #Yoha. 1.17mba Yona na' ntswe lé'njù tat, mbwôgtshù mba tèttswe' ntùm bam ngontse là, Mén Mèn nsi tswe lé'njù tat, mbwôgtshù mba tèttswe' ntùm tsha'a. 41Ba #Yon. 3.5Ninive nsi ghù tsin tù ntùm ndàntsha boa yen zwiaṅ benntùn ni ghù bo vù ntsha, nummbe ba Ninive lo kaṅ ntù tshob num ntshob Nsi mi Yona tshob bo là. Tshù, mo' mèn nsen ni ndù a tshùa Yona. 42Mfen #1 Fen. 10.1-10; 2 Kron. 9.1-12ze mènnzwi z'a fe mà ntèn nà, nsi ghù lo tù ntùm ndàntsha boa yen zwiaṅ benntùn ni, ghù a vù ntsha, nummbe a lo fe mo' bag njù, nse' neju' zenu Salomon. Tshù, mo' mèn nsen ni ndù a tshùa Salomon.
43Ngelaṅ ze ywètkebwô tum ntù mèn nà, a nke nkatte ntùm dù' njum, nke ndiag dù' nefite ke fon, 44ntshob ndù: M'a' bèn njam ntùm ndà àm dù' ze me tum bwe là. A be bèn njam, ntèt ndà ndù bo nabt'é kua' mebwô. 45Ndùlala, a bèn njam, nèn ndo' tsemo' sammbàa ntamte num i, tse bo bag ntshùa ze tu wut là, bo à bo se' nke ntswe bwe; yôg yen mèn ni bèn mbag ntshùa mb'a na' mbe mbwe là. A nsi se' be be ndaṅndaṅ num yen zwiaṅ ben kebwô li.
Mà Yésu mba fèt tse
(Mark. 3.31-35; Luk. 8.19-21)
46Ngelaṅ a ke nke' ntshob nu bwoṅ benntùn nà, tshù, màab mba fèt tse tsin njù, nke ndiag i netshob nu yi. 47Là mo' mèn tshob yi ndù: Tshù, màan mba fèt tsho num njù, nke ndiag o tshob nu wù. 48Là, a bùnte ntshob mèn z'a ke ntshob yi là ndù: Màa b'a we? Fèt tshàm b'a we? 49A nyit bu i, ntshag num ghazi'te nu i, ntshob ndù: Tshù màa mba fèt tshàm ni. 50Nummbe mèn z'a ghù ju ze Tàa mfe kamànyam num nkô là, mb'a b'a mfèl àm ze mandum bo mfèl àm ze mènnzwi mba màa.
Currently Selected:
Matio 12: BMa
Highlight
Copy
Compare
Share
Want to have your highlights saved across all your devices? Sign up or sign in
La Sainte Bible en Bamiléké-Medùmba © Alliance Biblique du Cameroun, 1993. All rights reserved.