Lukas 4

Mba Satan laṅte Yésu là

(Mat. 4.1-11; Mark. 1.12-13)

1Yésu dun Ywèt Nelàne, nke mfe Yordan; Ywèt Nelàn tshag i num kônkwa. 2Satan laṅt'é lé'njù ṅam nkuà. A ke jù sàm ju num tshen lé'njù là. Tshen lé'njù là be tshùa, nziku' ya i.

3Ndùlala Satan tshob yi ndù: A be z'o b'a Mén Nsi là, o tshob sen loṅ ni kaṅ ntù' bàn. 4Yésu #Neb. 8.3bùnte yi ndù: Bo lo kite ndù: A ke nda' bàn bèn ghù mènntùn yôge.

5Satan lo' i nèn yi nda'te nufen njù fa yi num mo' metsit ngelaṅ. 6Satan tshob yi ndù: Me nsi fà yen njoṅ ngù' fa li wù boa nkuni tshen nufen nà, nummbe bo lo fà me, me ghù neta nefà mèn ze me kô là. 7A be z'o vù nsi mbwe àm, ngamt'àm nà, mba njoṅ tshen tshu là fa nsi tù' tsho. 8Yésu #Neb. 6.13bùnte ntshob yi ndù: Bo lo kite ndù: O nsi ke vù nsi ghamte Tshùaben Nsi o, ke fa' be nda' yi tù' i.

9Satan lo' i nèn yi Yérusalém, nte i num tu Ndà Nsi, ntshob yi ndù: A be z'o b'a Mén Nsi là, o tsho' nsen ni ngwù mànsi. 10Nummbe #Yobk. 91.11bo lo kite ndù: A nsi tshob ba Angél tse ndù bo ke mbéb o. 11Bo #Yobk. 91.12nsi kel o mum mbu mube, ndù k'o tsho' ku o num loṅ. 12Yésu #Neb. 6.16bùnte ntshob yi ndù: Bo lo tshob ndù: Kà laṅte Tshùaben Nsi o.

13Satan be miagte njoṅ manze laṅte fa, ndo mbaṅ i, tà nèn nkum num mo' ngelaṅ.

Fa' Yésu mà Nazarèt

(Mark. 6.1-6)

14Ntùm neta Ywèt Nelàne, Yésu bèn njam Galiléa. Lén se ju'ni ntùm njoṅ ngô fa. 15A nke ntswite ntùm sinagogue tshobe, njoṅ benntùn fa nke ngamt'é.

16A nèn Nazarèt dù' z'a ku' bwe là, ntsho sinagogue lé'njù Sabbat, mb'a be ze matnu là, a lo nsi num nesiaṅe. 17Bo fà ṅwa'ni ngatshob ntshob Nsi Esaya yi. A be ké'te ṅwa'ni nkum dù' ze bo na' nkite bwe ndù:

18Ywèt #Es. 61.1-2Tshùaben num num àm,

nummbe a lo yo' àm ndù

me tshob nkùn mebwô bwoṅbwoṅ.

A lo tum àm ndù me ghù ntù benntùn

ts'a be'te là yate,

ndù me tshob ba kuan ndù bo tswe yub tu,

ndù ba mfùmiag yene,

ndù benntùn tse bo tshwèt ngùtni yub là nèn tsiaṅte.

19Mbèn ntshob ngu'njù mbotni

z'a fe Tshùaben nà.

20A be bote ṅwa'ni, mfà ngafa', ntswe nsi; miag njoṅ benntùn fa ntùm sinagogue te num i. 21A to' netshob bo ndù: Ju ze bo na' nkite là bumte sènni ntùm ntoṅ mine. 22Njoṅ benntùn fa nke nkwé nta mi, mbèn nyàmte ntshob mi a ke ntum ntshu i ndù a dun kondèn nà. Bo nke ntshob ndù: Yen ni ke b'a mén Yosèf ké? 23A tshob bo ndù: Me lèn ndù bin nsi tshob yen tànkùt li me ndù: Ngaghù fu, yate tu wul o yu tu. Njoṅ nu fa bag ju' ndù o ghù Kapernaum nà, bèn ngù be ndaṅndaṅ nsen ni ntùm yu ngô. 24A #Yoha. 4.44bèn ntshob bo ndù: Kua' nenùne, me tshob bin ndù: Sàm ngatshob ntshob Nsi ke bwe ze bo num ndo' i mebwô ntùm ngô i là. 25Me #1 Fen. 17.1tshob bin ndù a ne mb'a kua' nenùn ndù fôg bènnzwi lo yàm ntùm ngô Israél ntùm tse lé'njù Elia, ngelaṅ kamànyam fùn ngu' tat ṅwù ntôge, nziku' ndùb be ntùm njoṅ ngô fa là. 26Bo #1 Fen. 17.8-16lo ke tum Elia mbaṅ mba ze ntshù'; là k'a ke nda' ju mo' mfôg mènnzwi Sarepta, ntùm ngô Sidon. 27Be #2 Fen. 5.1-14ndaṅndaṅ ghankin lo yàm Israél ngelaṅ Elisa ngatshob ntshob Nsi. Sàm ta' i lo ke yate, là mb'a nda' Naaman, mén Siria.

28Bo be ju' men ntshob là, njoṅ yub fa bo be sinagogue là dun yantù. 29Bo lo nsi ntèn Yésu, ntum yi ntùm ngô, nèn tà nkum ntshùa mbat ze bo kut ngô yub bwe là, num netèn i ma' mànsi. 30Là Yésu tôg netèt bo, nèn tse.

Mba Yésu yate ngaghù ywètkebwô là

(Mat. 4.13-16; Mark. 1.21-28)

31A swe' nèn Kapernaum, mo' ngô ntùm Galiléa, ntswite ntùm bwe lé'njù Sabbat. 32Bo #Mat. 7.28-29nyàmte nu z'a tswite là neshu, nummbe ntshob mi lo dun ngù'. 33Mo' mèn lo be ntùm sinagogue ndù a ghù ywètkebwô, a kua' nze neta ntshob ndù: 34E! Ke z'o ghù ntùm yag nu Yésu ze Nazarèt? O se' a nebagte yag ké? Me lèn mèn z'o be yi là, o b'a mèn nelàn z'a fe Nsi là. 35Yésu tshobt'é ntshob ndù: Mi ntswe, tum num i. Ywètkebwô ma' i nsi netèt benntùn, ntum num i, ke ghù sàm nukebwô yi. 36Njoṅ benntùn fa tshàm, nke ntshob bo bo ndù: A ke lèn ntshob li à? Nummbe a num ndo' ngù' mba neta, ntô ba ywètkebwô yi, bo tum. 37Lén se be neju'ni ntùm njoṅ dù' fa ts'a ghebte mbaṅ bwe là.

Mba Yésu yate màntse Pétro là

(Mat. 8.14-15; Mark. 1.29-34)

38Là Yésu be tum sinagogue, nèn ntsho ndà Simon; màntse Simon lo ghù kua' saṅtewut ndùb num i, bo bètte Yésu ndù a yat'é. 39Yésu ben wul i num i, ntshobte saṅtewut là, a tum num i. A be lo nsi be ngelaṅ mbile, nto' nefa' bo.

Neyate nzenze

(Mat. 8.16-17; Mark. 1.32-39)

40Ngelaṅ lagnyam ke mbi là, njoṅ benntùn fa bo ghù ghangokèt tse ngokèt nzenze tshùb yub là, lo' yub nse' yi mbaṅ Yésu. A yab mbu mba num we lo kà nke njate yube. 41Ba ywètkebwô nke ntum num tse yàme, nkua' ntshob ndù: O b'a Mén Nsi. A tshobte yube, ke bam ndù ywètkebwô tshob nu, nummbe bo lèn ndù a b'a Kristô.

42Là njù be làne, a tum nèn mo' dù' banban; bwoṅ benntùn diag i, nèn nkum num i, ntswe bo à bo ke kô ndù a bèn nèn mfaṅ yube. 43Là, a tshob bo ndù: A bwô ndù me soṅ nkùn mebwô nufen Nsi mba tsemo' ngô yub, nummbe a ju ze bo na' ntum àm num bwe là. 44A nke ntshob ntshob Nsi ntùm ba sinagogue ba Yuda.

Currently Selected:

Lukas 4: BMa

Highlight

Compare

Copy