Lukas 5

Neghom ngontse nsa

(Mat. 4.18-22; Mark. 1.16-20; Yoha. 21.1-11)

1A #Mat. 13.1-2; Mark. 3.9-10; 4.1be mum lé'njù ze Yésu tsin kaṅ ntse Gènèsarèt, bwoṅ benntùn nke mfél i neju' ntshob Nsi là, 2a yen nkenu mbàa kaṅ ntse ndù ghaghom ngontse tum ntùm bwe, nke nsôg mbunjà. 3A tsho ntùm mo' kenu s'a na' mb'a se Simon nà, nde't'é ndù a na' ndo nèn netèt ntse mén nda'nda'. A tswe nsi ntùm kenu, nke ntswite bwoṅ benntùn ntshob Nsi. 4Ngelaṅ a miagte netshob là, a tshob Simon ndù: Kù'te nèn dù' ntse tsho là, bin ma' mbunjà mine, ngom ngontse. 5Simon #Yoha. 21.3bùnte ndù: Tà, bag ghùtni wut tshag yen tèttswe' li ke ghom sàm ju, là num ntshob mu me nsi ma' mbunjà. 6Bo #Yoha. 21.6ghù ndùlala ngom ngontse yàm neshu, kà mbunjà mub nke nkebte. 7Bo kwàbte shun tshob ntùm mo' kenu ndù bo se' njwimte yube. Bo se', naṅ ngontse ntùm nkenu mbàa, a dun kà ntù' nebi. 8Simon Pétro be yen ndùlala, ngwù num nku Yésu, ntshob ndù: Tshùaben, lo mbaṅ àm, nummbe me b'a mèn kebwô. 9A tshàm neshu boa ben tse bo à bo be là, nummbe bo ghom ngontse yàme. 10Yakobo mba Yohané, bon Zèbèdéo, tse bo be shun Simon nà tshàm yub be ndaṅndaṅ. Yésu tshob Simon ndù: Kà bwôg, lo sènni o a' tù' ke ngom à benntùn. 11Bo sô nkenu mub ntse, nse' yi num tsha'a, mfaṅ tshu fa, ntam njam Yésu.

Mba Yésu yate mo' ngankin nà

(Mat. 8.1-4; Mark. 1.40-45)

12Mba Yésu be ntùm mo' ngô là, mo' mèn ze nkin fim i fa là, be yen Yésu, ngwù nsi kabkab mbwe i, nde't'é ntshob ndù: Tshùaben, a be z'o kô là, mb'o ku'ni neghù me làn. 13Yésu nyit bu i, nkwag i, ntshob ndù: Me kô, làne! Be ndùse, nkin mi num i. 14Yésu #Lev. 14.1-32tshob yi ndù k'a soṅ sàm mèn mba ntshù, là nèn nda'te wul o ngale'te Nsi, mbèn mfà ju nelànte wut mba Mosé na' ntshob là, ndù a be yub ju nekwé nta. 15Lén se ju'ni yàm yàm neshu, bwoṅ benntùn yàm tse'te num neju' i mba ndù a yate yub num ngokèt tshobe. 16Là, a tum nèn mo' kônkwa, nke nde'te Nsi.

Mba Yésu yate mo' kekat là

(Mat. 9.1-8; Mark. 2.1-12)

17A lo be mo' lé'njù ze Yésu ke ntswite là, ba Férésia mba ghalèn ntshù' Nsi bo na' mfe ntùm ntaṅla' Galiléa, Yudéa mba ntùm Yérusalém nà lo tswe nsi. Neta Tshùaben nke njate ghangokèt. 18Tshù, tsemo' benntùn se' ndù bo ket mo' mèn num kunndà ndù a b'a kekale, nke ndiag netsho yi ndà, njab i mbwe Yésu.

19Mba bo be ke yen dù' ze bo tshùa bwe là, nummbe benntùn lo yàm nà, bo tù' ko' num ba', nkeb tô bwe, ntôge, nswe' ngangokèt là num metsit kunndà netèt benntùn njab mbwe Yésu. 20Yésu be yen bamntù yube, ntshob ndù: Mènntùn, nukebwô tsho mi. 21Ghalèn ṅwa'ni Nsi mba ba Férésia to' nekwate nke ntshob ndù: Yen mèn ni b'a we kà nke ntshabte Nsi ndù à? We z'a ku'ni nelagte nukebwô, k'a ke nda' Nsi tù' i à?

22Là Yésu lèn nkwatenu mube, mbùnte ntshob bo ndù: Bin kwate nu ntùm ntù tsin numke? 23Netshob ndù: Nukebwô tsho mi, ke netshob ndù: Lo nsi nzine, a mit ntshob netèt men ni mi a fùag à? 24Là ndù bin lèn ndù Mén mèn ghù ngù' nelagte nukebwô ntùm yen njù li! A tshob kekat là ndù: Me tshob wù ndù: Lo tù, nket kun su, nèn la' o.

25A lo tù be ngelaṅ mbile, mbwe bo, nket kun s'a lo nô bwe là, nèn la' i, nzin nke ngamte Nsi. 26Njoṅ benntùn fa tshàm neshu, nke ngamte Nsi, bwôg bèn ntshùb yub bo tshob ndù: Bag yen nu ke to' yen sènni.

Netsiaṅ Lévi. Netswe nziku'u

(Mat. 9.9-13; Mark. 2.13-17)

27Yen nà be tshùa, a tum, njen mo' ngakwéfé' lén se Lévi, ndù a tswe dù' nekwé fé', Yésu tshob yi ndù: Tam njam àm. 28Lévi faṅ njoṅ tshu tse fa, ndo tù, ntam njam i.

29A ghù mo' mà tsiaṅte ndùb Yésu ntùm ndà i. Mo' bwoṅ ghakwéfé' mba benntùn tswe téblé bo à bo. 30Ba #Luk. 15.1-2Férésia mba ghalèn ṅwa'ni Nsi tshobte, ntshob ghazi'te nu Yésu ndù: Numke bin nke njù mbèn nke nu bin à ghakwéfé' mba ben kebwô à? 31Yésu bùnte, ntshob bo ndù: Benntùn tse bo tswe mebwô là ke' be diag ngaghù fu, là, nda' ben tse bo tswe kebwô là. 32Me ke na' nse' tsiaṅ à ben netsine, là ben kebwô num nekaṅ ntù.

33Là bo tshob yi ndù: A lo be matnu ghazi'te nu Yohané neke ntswe nziku'u, mbèn nke nde'te Nsi, mba ba Férésia! Numke tsho ghazi'te nu nke njù mbèn nu à? 34Là, a tshob bo ndù: Be bin ghù shun ndungon tswe nziku' ngelaṅ boa ndungon bèn mbe l'à ndùke? 35Tsemo' lé'njù nsi be se'e, bo lo' ndungon; a tshen lé'njù là tse bo nsi tswe nziku' là.

36A tshob mba mo' tànkùt bo ndù: Sàm mèn ke' be keb kam nzwe nswe nkwitte njwèn nzwe yi, nummbe a keb nzwe nswe mba kam nzwe nswe ke bwô bo njwèn i. 37Be mèn ke ne mbèn naṅ ndu' nswe ntùm ntu' njwèn, a be z'a ghù ndùlala là, mba ndu' nswe a' tsit ntu', ndu' naṅ nsi, bo bèn mbi ntu'.

38Là, a bwô nenaṅ ndu' nswe ntùm ntu' nswe. 39Sàm mèn ke bwe z'a nu njwèn ndu', mb'a bètte mi nswe là, nummbe a' tshob ndù: njwèn ndu' bèn mbwô.

Currently Selected:

Lukas 5: BMa

Highlight

Compare

Copy