Lévitiko 1
1
Nefà tshule'te
1Tshùaben tsin ntùm ndà mbumte ntsiaṅ Mosé ntshob yi ndù: 2Tshob bon Israél ndù: Ndùse ta' mènntùn netèt bin ke mfà ju bwôntù Tshùaben nà, mb'a bwô ndù a fà nyàm, nyàm ndùb ke nyàm nke' lo.
3A be ze ju bwôntù b'a nyàm ze bo tone, mbe nyàm ndùb là, mb'a bwô ndù a b'a ndu i, mbe z'a ke' ghù lo' là. A bwô ndù a fà i ntshundà ndà mbumte mbwe Tshùaben. Yen nà b'a ndù Tshùaben bam ze nu. 4A nsi yab bu i num tu nyàm ze bo wat là, Tshùaben bam yen nyàm nà num netamte fa yi num tu i. 5Bo nsi wat metshab fot mfô mbwe Tshùaben, ghafà tshule'te tse nshum Aron fà lem tse. Bo nsi fètte lem nà lo' diaṅ tômbwôg yi bume; sen tômbwôg là b'a ntshundà ndà mbumte. 6Bo nsi fét nyàm, kebt'é nkam nkam. 7Tse nshum ngafà tshule'te, Aron nsi yab ntshwèn tômbwôge, te mbwôg num bwe. 8Ghafà tshule'te, tse nshum Aron nsi yab nkam nkam nyàm tse bo kebte là, tu i boa nzit mi num ntshwèn z'a tômbwôg là. 9A nsi lo' ntse sôg tshu bam nyàm yi boa mbwe tun mi; ngafà tshule'te nsi ton njoṅ i fa num tômbwôge. Yen nà b'a nyàm netone, mbe jule'te ze bo ton mbwôg là, ze njwèt mi lamte Tshùaben kua' mebwô là.
10A be ze ju bwôntù i b'a nyàm nke'e, njùmbwe ke mbwe lo là, mb'a bwô ndù a b'a ndu i, mbe z'a ke' ghù lo' là. 11A bwô ndù a wal i num bag tômbwôg z'a shù tu là, mbwe Tshùaben; ghafà tshule'te tse nshum Aron nsi fètte lem tse lo' diaṅ tômbwôg yi bume. 12A nsi kebt'é nkam nkam: Ghafà tshule'te nsi yab nkam nkam nyàm bo kebte là, tu i boa nzit mi num ntshwèn z'a tômbwôg là. 13A nsi lo' ntse sôg tshu bam nyàm yi boa mbwe tun mi; ngafà tshule'te nsi fà njoṅ i fa, ton i num tômbwôge. Yen nà b'a nyàm netone, mbe jule'te ze bo ton mbwôg là, ze njwèt mi lamte Tshùaben kua' mebwô là.
14A be ze ju bwôntù i b'a nsaṅ nà, mb'a bwô ndù a fà ba bwoṅtambia' ke ba bwoṅ saṅ no. 15Ngafà tshule'te nsi fà saṅ num tômbwôge. A nsi tsho' tu i, naṅ lem tse num mbaṅ tômbwôge, ton fe saṅ num tômbwôge. 16A nsi sô nkin i, tsho' mfe mi, tamte ma' mbaṅ tômbwôge, num bag i z'a shù ntumnyam nà, num dù' ze bo num naṅ ba bwembwôg bwe là. 17A nsi fagte mbàb mi, là ke sôte yub num saṅe; ngafà tshule'te nsi ton saṅ num tômbwôge, num ntshwèn z'a mbwôg là. A b'a saṅ netone, mbe jule'te ze bo ton mbwôg là, ze njwèt mi lamte Tshùaben kua' mebwô là.
Currently Selected:
Lévitiko 1: BMa
Highlight
Copy
Compare
Share
Want to have your highlights saved across all your devices? Sign up or sign in
La Sainte Bible en Bamiléké-Medùmba © Alliance Biblique du Cameroun, 1993. All rights reserved.
