Netume 34

Kàn Tshùaben wat là. Ntafèt nswe

(Neb. 10.1-5)

1Tshùaben tshob Mosé ndù: Tshua'te ntafèt ndoṅ mbàa yu tu wut ndaṅndaṅ mba mi a be mbwe là. M'a' kite ntshob mi a be num mbwe ntafèt mi o tsit là num bwe, be kua' ndaṅndaṅ. 2A bwô o ghù ndùlala num ndamnjù nkebnjù. O nsi ko' mà nkebnjù num mbat Sinaï tsin mbwe àm, mfe num ntshùa mbale. 3Kà ko' à bin sàm mèn; kà bo yen sàm mèn num mbat mba yà lo. A ke' bwô ndù mbwe ke nyàmna' lo fèt mbaṅ yen mbat là. 4Mosé tshua'te ndoṅ mbàa mba mi mbwe là, ndo nsi mà nkebnjù mba Tshùaben tshob yi là nko' num mbat Sinaï, ndù a tshùb ntafèt ndoṅ nà bu i. 5Tshùaben swe' ntùm ndot, ntsin mbaṅ Mosé, ntsiaṅ lén se Tshùaben. 6Tshùaben #Netu. 20.5-6; Nes. 14.18; Neb. 5.9-10; 7.9-10tôg mbwe Mosé ntshob ndù: Tshùaben, Tshùaben, Nsi mbétni mbe ngatshàmndèn, o num ndèt wut num yantù, mbe ndù o dun nkôni bo nenùne. 7O num mfà nkôni num zwiaṅ ntsha'ntsha', nke mfènte nukebwô, tatu bo kebwô. Là, o ke' be faṅ mfànnu ndùlala. O num nso ntsha i tu bon tshob nèn nkum zwiaṅ ben tat bo zwiaṅ kuà. 8Be ndùse Mosé vù nsi, nte nkekwi' mi nsi, 9ntshob ndù: Tshùaben, a be ze me fon kondèn num miag mu là, mb'a bwô ndù wù Tshùaben zin netèt bag, nummbe nzwit ghatatu li, mèn ni b'a ze kekol i sag là. Lagte mfànnu mag boa nukebwô tshage, ndo' yag mba yu ju ntsi' là.

10Tshùaben #Netu. 23.14-19; Neb. 7.1-5; 16.1-17bùnte ndù: Tshù, m'a' wat ta' kàn. M'a' ghù tshu nekuni mbwe ngô o, lèn ts'a ke' to' be num nsitsha' mba ntùm sàm ta' ngô là. Ngô ts'a diaṅ o mbum nà nsi yen fa' sàm, me Tshùaben. Me nsi tshùa njam o kà ghù tshen tshu là bumte. A nsi b'a tshu nekuni. 11Zete num ju ze me nsi tshob wù sènni là. M'a' ta' ba Amor, ba Kanaan, ba Hétia, ba Férésia, ba Hévia boa ba Yébusia mbwe o. 12Zete newat kàn bin à ba la' z'o nsi tsho ntùm ngô yub là, mbwôg ndù kà tshen ben nà tù' ywi' wù. 13Là, #Neb. 16.21bin nsi sate ntômbwôg mube, ndoṅ la' mube, be'te njoṅ i fa. Bin be'te njoṅ bebun tshob fa, ntshu' i fa naṅ nsi. 14O ke nsi te nkekwi' mu mbwe mo' nsi nummbe lén Tshùaben b'a ndànghe'e, a b'a ta' Nsi z'a num ndàn ghe' là. 15Kà wat kàn bin à ba la', mbwôg ndù kà bo be kat boa nsi tshobe, mfà tshule'te bo, ntsiaṅ o bin à bo jù tshule'te tshobe. 16A be z'o bètte ngonngon tshob mfà tsho bon nà, mba bo a' be kat boa nsi tshob nsoṅte bon tsho mba bo kat yub boa nsi tshobe.

17Kà #Netu. 20.4; Lev. 19.4; Neb. 5.8; 27.15lo' tùn nabte ta' nsi yi.

18O #Netu. 12.14-20; Lev. 23.6-8; Nes. 28.16-25nsi ke ze jùa bàn ke te ywibte se; a bwô a be ndùlala num lé'njù sammbàa, num ngelaṅ i ntùm maṅwù ngefele. O nsi jù bàn ke te ywibte se mba me na' ntshob wù là. Nummb'o na' ntum Egipto à ntùm maṅwù ngefele.

19Njoṅ #Netu. 13.2mbwe bon bandum fa me bèn ngù, mba kua' mbwe bon nyàm, nyàmna' bo mbwe. 20O #Netu. 13.13nsi lo' mén njùmbwe lo' jun tu mbwe mén kekwèn yi. A be z'o ke' jun tu i là, mb'a bwô ndù o be' ntô mi. A bwô ndù o jun tu mba zit mbwe mén nshumnshum tsho lo. Kà sàm mèn se' mbwe àm mbu mbu.

21O #Netu. 20.9-10; 23.12; 31.15; 35.2; Lev. 23.3; Neb. 5.13-14nsi ke fa' num lé'njù ntôge, fite wul o num mbatte lé'njù sammbàa. O nsi ke fite mba num ngelaṅ nedù' nà bo ze netsho' tshu.

22O #Lev. 23.15-21,39-43; Nes. 28.26-31nsi ke ze jùa ba ngabnjù, se mbwe tshu, netsho' ngefele, bo jùa netsho' tshu num miagte ngu'njù.

23Njoṅ bandum fa nsi ke nèn mbwe Tshùaben Nsi, Nsi Israél yoṅ tse tat num tamngu'. 24Nummbe m'a' ta' ngôngô mbwe o, nga'te tsho ndùnsi; sàm mèn ke nsi ghe'te ngô o, ndùs'o nsi ko' se' tsin mbwe Tshùaben Nsi o yoṅ tat num tamngu' là.

25Nyàm #Netu. 12.10z'o nsi wat me là, o ke nsi se' yi mbwe àm à bo bàn ze bo te ywibte se là. Jule'te ze jùa ke nsi zi ndà kà tèt nkebnjù.

26O #Neb. 14.21; 26.2nsi lo' kua' mbwe ntàm mi a tum ntùm nà o là nèn yi ntùm ndà Tshùaben Nsi o. A ke' bwô ndù o na mén mbwe ntùm mbùn màab.

27Tshùaben tshob Mosé ndù: Kite men ntshob li; nummbe me nsi tsin num men ntshob là kà wat kàn bag wù mba Israél.

28Mosé tswe bo Tshùaben bwe lé'njù ṅam nkuà, mbwôgtshù bo tèttswe', ke jù bàn ke bèn nu ntse, nkite ntshob kàn num ntafèt, ntshob là b'a gham.

29Mosé #2 Korin. 3.7-16swe' num mbat Sinaï ndù a tshùb ntafèt ntshù' mbàa bu i ndùs'a ke mfe num mbat là. A lo ke lèn ndù ngub se i tshwèt nziag mb'a tshobte bo Tshùaben nà. 30Aron boa njoṅ bon Israél fa lôte Mosé, njen ndù ngub se i tshwèt nziage, bo bwôg neghebte num i. 31Mosé tsiaṅ yube. Aron boa njoṅ ghakwé mbwe fa ntùm mbumte nèn mbaṅ Mosé, a tshob nu bo. 32Yen ni be tôge, njoṅ bon Israél fa ghebte, Mosé fà ntshob mi Tshùaben tshob yi num mbat Sinaï là bo. 33Ndùse Mosé miagte netshob nu bo là, a ma' kam nzwe num se i. 34Mosé lo ke mbù' kam nzwe se i ndùs'a tsho mbwe Tshùaben netshob nu yi là, tà nkum ndùs'a tum bwe là. Ngelaṅ z'a tum nà, a soṅ bon Israél ju ze Tshùaben tshob yi là. 35Bon Israél lo ke ndôte se Mosé, njen ngub se i nke nziage; ndùlala Mosé nke ma' kam nzwe se i tà nkum ndùs'a tsho mbwe Tshùaben tshobte bo yi là.

Currently Selected:

Netume 34: BMa

Highlight

Copy

Compare