Netume 33

1Tshùaben #Net. 12.7; 26.3; 28.13tshob Mosé ndù: Lo nsen ni, bin ngô z'o sô mà Egipto là, nko' nèn num tsha' tse me na' ndo' à netshob nu nsaṅlaṅ bwe mbù yi Abraham, Isak mba Yakob ndù m'a' fà bo là. Me lo tshob nsaṅlaṅ bwe num men nka'ni là ntshob ndù: M'a' fà nzwit yub. 2M'a' tum ta' Angél i mbwe o, nta' ba Kanaan, ba Amor, ba Hít, ba Férésia, ba Hévia boa ba Yébusia. 3Ko' nèn ntùm ngô là ze mbùn nyàm be nswe' bwe bo ṅwa' là. Là, me ke nsi ko' nèn bag bin, nummbe bin b'a nzwit ghatatu, mèn ze kekol i sag là, mbwôg ndù kà me biagte zin num manze. 4Ndùse ngô ju' men ntshob li là, bo te vù, sàm mèn ke bèn ma' nzwe ntùn num i.

5Ndùlala Tshùaben tshob Mosé ndù: Tshob bon Israél ndù bo b'a nzwit ghatatu, mèn ze kekol i sag là. A be ze me ko' nse' netèt bin nda' metsit ngelaṅ nà, mb'a m'a' biagte zine. Bin sô nzwe jùa num bin me yene, ndèn ju ze me nsi ghù num bin nà. 6Bon Israél sô nzwe jùa num bo, neto' fe num mbat Horéb.

7Mosé lo' ntàb, ndù' njam mbàn, ntsiaṅ ndù ntàb mbumte. Mba we lo z'a kô nebètte Tshùaben nu là, nke nèn mbaṅ ntàb mbumte, z'a be njam mbàn nà. 8Ndùse Mosé tum nke nèn mbaṅ ntàb mbumte là, ngô tum, mba we lo tsin ntshu ze ntàb, nke nte lag num Mosé tà nkum ndùs'a tsho ntùm ntàb mbumte là. 9Ndùse Mosé yoṅ ntsho ntàb là, bwoṅ ndot zwe' ntsin ntshu ntàb, Tshùaben nke ntshobte bo Mosé bwe. 10Ngô nke njen mba bwoṅ ndot tsin ntshu ntàb là, mba zit mèn no lo ntsin tù, nte nkekwi' mi nsi mbwe ko' ze ntàb. 11Tshùaben nke ntshobte bo Mosé se se, mba mènntùn num ntshobte bo nshun i là. Yen nà nke mbe tôg Mosé bèn ntùm mbàn, ngafa' i, Yoshua nshum Nun, lo ke be tum tse ntàb.

Mba Nsi na' ṅwag Mosé là

12Mosé tshob Tshùaben ndù: O tshob me ndù me ghù yen ngô li ko'o, là ke ghù me lèn mèn z'o tum àm bag yi là. Mbe ndù o tshob me ndù: Me lèn o lén so, o bèn mfon kondèn num miag màm. 13Ndonni, a be ze me fon kondèn num miag mu là, o la'te tsho manze me, ndùlala ndù me lèn o, mbèn mfon kua' kondèn num miag mu. Lèn mbe ngô li b'a yu nzwit mèn. 14Tshùaben bùnte ndù: Bag wù nsi bèn ke zine, me bèn mfà fite wù. 15Mosé tshob yi ndù: A be ze bag bin ke nsi bèn zin nà, o kà ghù ndù bag lo nsen ni. 16Be bo lèn à ndùke mbe me mba yu nzwit mèn fon kondèn num miag mu à? Bo ke nsi lèn à ngelaṅ o tshwèt nzin bag à bin, mfagte yag nu boa njoṅ nzwit benntùn fa tse bo be num nsitsha' là ké? 17Tshùaben tshob Mosé ndù: Ju z'o lo netshob là, me nsi ghù à ndùlala, nummb'o fon kondèn num miag màm, me bèn ndèn o lén so.

18Mosé tshob ndù: La'te nkuni mu me. 19Nsi #Rom. 9.15bùnte yi ndù: M'a ghù njoṅ bwôntù àm fa ntôg mbwe o, me tshob lén sàm Tshùaben mbwe o. Me be nko ndèn mèn me kô i nko ndèn mi là, ntshàm ndèn mèn ze me kô netshàm ndèn mi là. 20Tshùaben bèn ntshob ndù: B'o ke yen se àm, nummbe be mènntùn ke yen àm njôge. 21Tshùaben tshob ndù: Tshù ta' dù' là mbaṅ àm. A bwô ndù o tsin num gholoṅ. 22Ndùse nkuni màm nsi tôg là, me nsi ma' o ntùm tô gholoṅ, kabt'o bu àm tà kum ngelaṅ me miagte netshùa là. 23M'a' bù' bu àm, o yen àm njamnjam, là be mèn ke ku'ni neyen se àm.

Currently Selected:

Netume 33: BMa

Highlight

Copy

Compare