Netume 35

Tshu bwôntù num nekut Dù'ntswe yi

1Mosé tsiaṅ mbumte bon Israél fa, ntshob bo ndù: Tshù tshu tse Tshùaben bètte neghù li. 2Fa' #Netu. 20.8-11; 23.12; 31.15; 34.21; Lev. 23.3; Neb. 15.12-14nsi ke b'a num lé'njù ntôge; là mbatte lé'njù sammbàa nsi b'a ju nelàn num miag mine. A b'a Sabbat, lé'njù fite, se bo yab Tshùaben nà. Mèn z'a fa' mba ke lo num sen lé'njù là là, mba bo a' zwi ng'é. 3Bin ke nsi kwé'te mbwôg ntùm sàm ndà zin mba ntshù' num lé'njù Sabbat.

4Mosé #Netu. 25.1-9tshob njoṅ mbumte bon Israél fa ndù: Tshù ju ze Tshùaben bètte li. 5Bin lo' ju num ze bin ghù là, mfà ju bwôntù yi Tshùaben. Mba zit mèn no ze ntù i bwô là fà yen ju bwôntù là Tshùaben: Gol, silba, bo tùn meba; 6nzwe ṅwa'ṅwa' nenàfi, meba, neziage, silik, nyiaṅ mbwe; 7ngub komnjù tse bo vèn nto'nto' meba là, ngub mbeloṅ; 8ntshwèn tù bù, mfèt lambo, la nelamte num mfèt yo', labinda ze bo ton nà; 9loṅ onix boa memo' ndoṅ nelo' nkàn kum nesag se bo ke nkel à num ngelaṅ fa' là yi bo kum s'a ke nswe' nkabt'a ntù mèn nà. 10A #Netu. 39.32-43bwô ndù njoṅ benntùn fa tse ve tsho bu bo netèt bin nà se' mfa' njoṅ ju fa ze Tshùaben tshob là: 11Dù'ntswe, ntàb i, kabt'é, ngub mi, ntù mi, fa tse, ntom tse boa tun tse; 12Koṅ boa fa tse, téblé nete num bwe bo nzwe nekabte Koṅ yi; 13téblé boa fa tse, njoṅ bon tshundà fa num bàn ju bwôntù; 14ju neghette nka' bwe boa bon tshu tse, ndambo mi bo mfèt nka'; 15tômbwôg labinda boa fa tse, mfèt yo', labinda ze bo ton nà bo nzwe nzendà z'a nsi be netsho ndà là; 16tômbwôg neton nyàm bwe bo ke't'é ze bo lo' tùn meba mfa yi là, fa tse boa bon tshu tse fa; kab tshaṅ bo ju nelo' nkel i yi nsi; 17ba nzwe bam ntshundà boa ntom tshobe, ba tun tshobe, bo nzwe nzendà bam ntshundà; 18nsaṅ dù'ntswe, nsaṅ bam ntshundà, boa nkù tse; 19ba nzwe netshob ntshob Nsi yi, num neke mfa' yi dù' nelàne, nzwe nelàn tse ngale'te Aron, boa nzwe tse nshumnshum tse nsi ket ke fa' fa' sàm yi là.

20Njoṅ mbumte bon Israél fa lo mbwe Mosé nène. 21Ndùlala njoṅ benntùn fa tse bo ghù ntù mebwô là se', mba we lo z'a ghù ntù ntùn nà lo' ze ju bwôntù nse' yi mbwe Tshùaben, num mfa' ndà mbumte, num fa' Tshùaben mba num ba nzwe nelàne. 22Bandum boa bènnzwi se', mba we lo z'a ghù ntù ntùn nà lo' ba mba'ntoṅ, nkwa, mbwô nzenze boa nzenze tshu gol nse' yi. Mba zit mèn no lo' ju bwôntù gol z'a se' yi là nèn yi mbwe Tshùaben. 23Njoṅ benntùn fa tse bo ghù nzwe ṅwa'ṅwa' nenàfi, meba, neziage, silik, nyiaṅ mbwe, ngub komnjù tse bo vèn nto'nto' meba là, ngub mbeloṅ nà, lo' nse' yi. 24Njoṅ benntùn fa tse bo fà ju bwôntù Tshùaben nà, a b'a silba ke tùn meba lo là, nèn yi mbwe i. Njoṅ benntùn fa tse ntshwèn tù bù be bo là, nèn yi mfà num mfa'.

25Njoṅ bènnzwi fa tse bo ghù ve tu bo là, se' ndeb kua' mbu mub kà nse' mfà. A na' mb'a ndeb z'a ba mba tsinkém, mba kua' mebwô là, mba nke nziag là bo mbwô silik. 26Njoṅ bènnzwi fa tse bo ghù ntù ntùn, ngù ve tu bo là se' nyiaṅ mbwe. 27Ben ndùbndùb ntùm ngô fà ndoṅ onix boa memo' ndoṅ num nekàn kum nesag se bo ke nkel à num ngelaṅ fa' là yi bo kum s'a ke nswe' nkabt'a ntù mèn nà; 28mfà ba nda' bo mfèt num ju neghette nka' bwe, mfèt yo', labinda ze bo ton nà. 29Njoṅ bon Israél fa, bandum boa bènnzwi tse bo ghù ntù ntùn neywimte fa' se Tshùaben tshob Mosé là fà tshu bwôntù Tshùaben mb'a ko' ntù bo là.

30Mosé #Netu. 31.1-11tshob bon Israél ndù: Bin lèn ndù Tshùaben lo tsho' Betsaléel nshum Uri, nshum Hur, mèn ntùm tunndà Yuda. 31A ghù Ywèt tse dun num i. Ywèt zenu, tse siaṅte, tse nelèn bon nzenze mfa'. 32A lo ghù a ku'ni netàmte tshu yàme, nefa' gol, silba bo tùn meba, 33netshebte ndoṅ mi neloṅ ntùm tshu; nefa' num ntshwèn mba nefa' bon nzenze mfa' ve. 34A lo fà fen yi num neke ntswite, ndaṅndaṅ mb'a na' mfà Oholiab nshum Ahisamak mèn ntùm tunndà Dan nà. 35A lo ghù zenu dun num bo, ndù bo ke mfa' njoṅ nzenze mfa' nekom tshu bo ve, nevèn bo neba' ba nzwe tse nto'nto' nenàfi, meba, neziage bo mbwô silik, mba ndù bo tàmte bon nzenze mfa' nke mfa'a.

Currently Selected:

Netume 35: BMa

Highlight

Copy

Compare