Mfa' Ghantum 25

Paulo mbwe Fèstô

1Lé'njù tat lo be tshùa mba Fèstô kum bag ngô z'a tô là, a lo Késaréa nèn Yérusalém. 2Ghale'te Nsi tse ndùbndùb mba kamkam ba Yuda se' mbwe i mbote Paulo, 3ndabt'é ndù a ko ndèn mub ntum Paulo bo Yérusalém; bo lo bùn Paulo ywi' nke ndiag nezwi i num manze. 4Fèstô bùnte ndù: Paulo b'a ndàtsha Késaréa, mba tu wul àm ke ghubte kà nèn bwe. 5A bèn ntshob ndù: A bwô ndù bag à ben tse bin tsho' yub là nène; a be ze yen mèn ni ghù nu z'a bag là bo bot'é.

6A be tswe netèt bo lé'njù fome, ke gham no, nswe' mbèn njam Késaréa. Njù be làne, a tswe num diaṅ ntsha, ngù bo lo' Paulo nse' yi mbwe yi. 7Ngelaṅ z'a se' là, ba Yuda tse bo swe' Yérusalém nà diaṅ i mbume, mbot'é num ba nu ndùbndùb yàm tse bo ke' ku'ni nela'te nenùn i là. 8Paulo gha, ntshob ndù: Me ke' fàn sàm nu num ntshù' ba Yuda ke num Ndà Nsi, ke mba num Kàsà lo. 9Fèstô z'a ke ndiag nebe mèn mebwô mbwe ba Yuda là tshob Paulo ndù: O kô neko' nèn Yérusalém bo tsho't'o num tshen nu li bwe mbwe àm ké?

10Là Paulo tshob ndù: Me tsin ndù à mbwe diaṅ ntsha Kàsà, a be bwe là ze bo nsi tsho'te yàm ntsha là. Sàm nuketsin ze me ghù ba Yuda là ke' be, mba kua' tu wul o lèn ndùlala. 11Me lo ngù nu z'a ke' tsin nà ke neghù mo' nu z'a ku'ni neghù bo zwi àm nà, mba me ke' gha nekwù. Là, a be ze nu tse bo bot'àm bwe ke' ghù ntun mi là, mba sàm mèn ke' ku' nefà àm bo mba nda' là. Me tsiaṅ à Kàsà num yàm ntsha. 12Ngelaṅ Fèstô tshobte boa tse ghatsho'te ntsha là, a tshob Paulo ndù: O tsiaṅ Kàsà num yu ntsha, o a' nèn mbwe Kàsà.

Paulo mbwe Agriba

13Tsemo' lé'njù lo be tshùa, mfen Agriba mba Bèrèniké se' Késaréa netsha'te Fèstô. 14Bo lo tswe bwe lé'njù yàme, Fèstô soṅ mfen num ntsha Paulo ntshob ndù: Mo' mèn num nsen ni ze Félix na' mfaṅ i ndàtsha là. 15Ngelaṅ me na' nèn Yérusalém nà, ghale'te Nsi tse ndùbndùb mba ghakwé mbwe ba Yuda bot'é me, mbètt'àm ndù me naṅ ntsha tu i. 16Me lo bùnte bo ndù mat ngô ba Roma ke' bam ndù bo fà mèn mba nda' là, ke be ndù mèn ze bo bot'é là tsho'te ntsha boa ben tse bo bot'é là mbwe ndàntsha, ngwù. 17Bo lo se' nsen ni me ke lé' ntsha; njù be làne, me tswe num diaṅ ntsha, ngù bo lo' yen mèn nà nse' yi. 18Ben tse bo bot'é là se' ke tshob sàm nukebwô num tse tu wul àm ke nkwate ndù bo a' tshob ndo' mbot'é yi là. 19Là bo à bo na' ngù tantshu à nda' num nu neghamte Nsi yube, mba num mo' Yésu z'a na' nkwù, Paulo nke ntshob be neta ndù a b'a ntùn nà. 20Nu tshùa àm nelôte tun lèn tshen nu là, me bètte Paulo a be z'a kô nenèn Yérusalém bo tsho't'é num tshen nu là bwe là. 21Là mba Paulo tsiaṅ Kàsà num ze ntsha, mbètte ndù bo lem i là, me tshob ndù bo lem i tà nkum ngelaṅ ze me nsi tum i mbwe Kàsà là. 22Agriba tshob Fèstô ndù: Mba me kô neju' yen mèn nà. Fèstô bùnte ndù: O a' ju' i ndamnjù.

23Njù làn, Agriba mba Bèrèniké kwi wut tshob nse' boa fenfen ba soyé mba ben ndùbndùb ntùm ngô ntsho ndàntsha. Fèstô ghù bo lo' Paulo nse' yi. 24Fèstô tshob ndù: Mfen Agriba mba njoṅ zin fa tse bag à bin be nsen ni ndonni là, tshù mèn ze njoṅ ba Yuda fa, nelo Yérusalém kà nkum mba nsen ni, na' nse' njen àm, nke nkua' neta ntshob ndù kà me faṅ i ntùn nà. 25Tu wul àm me lo lôte, njen ndù a ke' ghù sàm ju z'a ku'ni neghù bo zwi i là, a tsiaṅ Kàsà num ze ntsha, me yen ndù a bwô netum i yi. 26Me ke' ghù sàm nu ntùn z'a be me kite Kàsà num i là. Ndonni, mbwe njoṅ benntùn fa mba wù Agriba, me te i bwe ndù be tsho't'é, me ghù ju ze be me kite là. 27Nummbe me yen ndù a ke' bwô netum ngandàtsha ke kite nsoṅ tu nu z'a be num i là.

Currently Selected:

Mfa' Ghantum 25: BMa

Highlight

Copy