Mfa' Ghantum 26

Ntshob Paulo mbwe Agriba

1Agriba tshob Paulo ndù: Bo bam ndù o tshob nu num tu wul o. Ndùlala Paulo nyit bu i, ntshob ndù: 2Mfen Agriba, me yen ndù me b'a mènfen nekwé nta wut màm mbwe o num njoṅ nu fa tse ba Yuda bot'àm bwe là. 3Mebwô b'a ndù o lèn njoṅ mat ngô fa mba tantshu fa ts'a be mbe netèt ba Yuda là. A ndùlala me le't'o ndù o ju' àm ntùm nefènte.

4Yàm mat neyôg fe ménnshum, ndaṅndaṅ mb'a na' mbe fe neto'te ntùm ngô àm Yérusalém nà, njoṅ ba Yuda fa lène. 5Mba #Mfa' Gha. 23.6; Fili. 3.5bo lèn àm fe mbwe là, bo ku'ni nekwé nta, a be ze bo kô là ndù me lo yôg netèt bo ntùm bag nu ba Férésia z'a b'a bag nu ndaṅndaṅ ntùm nu neghamte Nsi yag là. 6Ndonni bo ke ntsho't'àm à num nu nenywinte nka'ni mi Nsi na' nka' ba tà tshag là; 7tunndà tshag tse ntshob bàa gham num mfa' Nsi tèttswe' mba mbwôgtshù ke bot, nke mbéb nebumte yen nka'ni là. A b'a num nu yen nenywinte là ze ba Yuda tshwèt mbot'àm nà, me mfen Agriba. 8Numke netèt bin, be bin ke bam ndù be Nsi bam fe ben num vù à?

9Mba #Mfa' Gha. 8.3; 22.4-5tu wul àm lo kwate ndù a bwô neghù nukebwô yàm num lén Yésu ze Nazarèt. 10Me lo ne ngù Yérusalém: Ntùm ngù' ze me kwé ghale'te Nsi tse ndùbndùb là, me lo ma' ben yàm netèt ben nelàn ndàtsha; ngelaṅ bo bèn nke nzwite tsemo' là, bag à bo be ntshu ntshù'. 11Yoṅ yàme, ntùm ba sinagogue, me lo ke ngùtni yube, mbèn nke nànte yub ndù bo tshabte lén Yésu; ntùm tshùagkèt ntù àm, me lo tsho' nku mub kebàn tà nèn nkum mba ntùm ngô ba tum.

12Be #Mfa' Gha. 9.1-19; 22.6-16num tshen nu là, me nke nèn Damas ndù me kwé ngù' mba neta ghale'te Nsi tse ndùbndùb. 13Num manze, me mfen Agriba, a na' mb'a nka mbwôgtshù, me yen mo' nka' swe' mfe kamànyam, nké' ntshùa nkônyam, nse' ndiaṅ àm mba shun zin tshàm mbume. 14Mba njoṅ yag fa vù nsi là, me ju' mo' nze a nke ntshob me ntshob ba Héber ndù: Saulo, Saulo, numk'o nke ntsho' nku màm kebàn à? Ko' ghom o, netum ke bwe. 15Me bùnte ndù: Tshùaben, o b'a we? Tshùaben tshob ndù: Me b'a Yésu z'o num ntsho' nku mi kebàn nà. 16Là lo tù, tsin num nku mu; tshù ju z'a ghù me ṅwag wù li: Me tsho' o ngafa' àm mba ngakwénta màm num nu ts'o lo neyene, mba tse me nsi bèn ṅwag wù bwe là. 17Me kwé o yen ngô li mba ghakelèn Nsi tse me tshwèt ntum o netèt bo, 18negha' miag mub ndù bo kaṅ ntù tshob ntum ntùm njam nse' ntùm nelàne, ntum ntùm neta Satan, ntam njam Nsi, mbam àm, nkwé nelagte nukebwô tshob mbèn nkwé ntsi' netèt ben tse Nsi lànte yub là.

19Ndùlala, mfen Agriba, me ke' ku'ni neta tu njem z'a swe' kamànyam nà, 20là #Mfa' Gha. 9.20,28-29neto'te num tse bo be Damas là nèn nkum Yérusalém, ntùm njoṅ ngô Yuda fa mba netèt ghakelèn Nsi, me lo ke ntshob ndù bo kaṅ ntù tshob ntam njam Nsi, mbèn nke mfa' mfa' mi a ku'ni num nekaṅ ntù là. 21A b'a num tshen tshu li tse ba Yuda na' ntshùb àm Ndà Nsi, nke ndiag nezwi àm nà. 22Là Nsi se' me ntùm ywimte, nkwé àm; me tshwèt nke' njôg tà nkum sènni, nke nkwé nta mbwe bônke' mba dùbdùb, ntshob be nu tshen nà tse ghatshob ntshob Nsi mba Mosé na' ntshob ndù a' bumte là. 23Yen #Es. 42.6; 49.6; 1 Korin. 15.20nà b'a ndù: Kristô nsi yen nge', bèn be mbwe mèn nelo num vù, tshob nu nka' yen ngô li mba ghakelèn Nsi.

24Mb'a ke nke' nkwé nta wut mi là, Fèstô tshob kua' neta ndù: Paulo, o b'a mbabune! Zenu o ze ndùb bagte tu o. 25Paulo tshob ndù: Fèstô ze tanjoṅ, me ke' b'a mbabune, là me ke ntshob à ntshob nenùne, mba mi zenu. 26Nummbe mfen lèn tshen nu li kua' mebwô, yi ze me tshob ntshob yi ke bwôg là; me lèn kua' nenùn ndù mfen ke' b'a ngùn num tshen nu là, nummbe tshen nu là lo ke tôg à ntùm dù' nelemte. 27Mfen Agriba, o bam ghatshob ntshob Nsi ké? Me lèn ndù o num mbame. 28Agriba tshob Paulo ndù: A tù' mén nda'nda' o ghù me tù' mènkristô. 29Là Paulo bùnte ndù: Ke mén nda'nda' ke yàm no, me num nde'te Nsi, ke b'a nda' wù tù' o, là njoṅ benntùn fa tse bo tshwèt nju' àm sènni là, bin tù' zin mba me là, kà ntag nda' netsho ntùm nkù.

30Mfen lo tù bo ngomna, Bèrèniké mba ben tse bo tswe mbaṅ bo là. 31Bo sô wut tshob mbèn njam, ntshobte netèt bo, ntshob ndù: Yen mèn ni ke' ghù sàm ju z'a ku'ni neghù bo zwi i ke nema' i tsha là lo. 32Agriba tshob Fèstô ndù: Yen mèn ni na' mbe ke tsiaṅ Kàsà num ze ntsha, mb'a lo mbwô nekag i.

Currently Selected:

Mfa' Ghantum 26: BMa

Highlight

Copy