Mfa' Ghantum 24

Paulo mbwe Félix

1Lé'njù tàn lo be tôge, ngale'te Nsi ze ndùb Anania swe' nèn Késaréa boa tsemo' ghakwé mbwe mba mo' lôya, lén se Tèrtulô, mbote Paulo mbwe ngomna. 2A ghù bo tsiaṅ Paulo. Tèrtulô to' netete tun njoṅ nu fa num Paulo ntshob ndù: Félix ze tanjoṅ, bag ke ntswe fite à njam o; ntùm yu neta, yen ngô li ghù tshu mebwô. 3Njoṅ dù' fa, ntùm njoṅ ngelaṅ fa, bag num mbame, mbèn nke ndabt'o num njoṅ numebwô fa. 4Me ke' kô neghùtni o yàme, là me labt'o ndù o na' nju' yag metsili ntùm bwôntù o. 5Bag yen yen mèn ni a b'a mo' ngokèt z'a tshwèt nkag tshu'tu netèt njoṅ ba Yuda fa ntùm njù fa là; a bèn mbe ngalo' mbwe num nu ba Nazarèt; 6a lo diag nenaṅ tuswe Ndà Nsi kà bag ngom i. [Bag lo ke ndiag netsho't'é mb'a be ntùm ntshù' yag là, 7là Lisia mfen ba soyé sa' i neta ntùm mbu mage, 8ntshob ndù ghabot'é lo' ntsha nse' yi mbwe o.] Mba tu wul o ghù nebe bètt'é nu, ntshùa num mbùnte nu mi ndèn nenùn yag nebot'é. 9Ba Yuda kwét'é, mbam ndù a b'a nenùne.

10Là Paulo ze ngomna ghù lèn yi ndù a tshob nu là, bùnte ndù: Me lèn ndù o bèn mbe ngakeb ntsha yen ngô li fe ngu'njù yàme, ndùlala me ghù nekwé nta wul àm ke bwôg. 11Tu wul o ghù nebètte, njen ndù a ke' tôg lé'njù ntshob bàa gham mba me na' nko' nèn Yérusalém neghamte Nsi là. 12Bo ke' to' yen bag mèn nke nsoṅte ntshobe, ke bèn njen me kag tshu'tu netèt bwoṅ benntùn, ke ntùm Ndà Nsi ke ntùm sinagogue ke mba ntùm ngô lo. 13Bo ke' ku'ni nela'te nenùn nu ze bo tshwèt mbot'àm bwe là. 14Me tshob yen nu li wù ndù: Me ke mfa' à Nsi ba tà tshàm num nu Yésu ze bo tshwèt ntshob ndù a b'a nu ba Nazarèt là; me ke mbam à njoṅ nu fa tse bo kite ntùm ntshù' mba ntùm ṅwa'ni Nsi là. 15Ndaṅndaṅ mba bo là, me num nywinte num Nsi ndù nelo num vù ben netsine, mba tse ketsin nsi be. 16Ndùlala me num nkagtùn njoṅ ngelaṅ fa neghù à be ntù z'a ke' fàn nu mbwe Nsi mba mbwe benntùn nà.

17Fe #Mfa' Gha. 21.17-28ngu'njù yàm me lo ke be ntùm ngô, ndonni me bèn njam nefà tshu neywimte ghayennge' yi ngô àm, mba tshu nele'te Nsi. 18Ngelaṅ me fà tshen tshu li, mbe ndù m'a lànte wut là, bo yen àm Ndà Nsi, me ke tse'te benntùn ke bèn nkag tshu'te. 19Tsemo' ba Yuda tse bo fe Asia là yen àm ntùm Ndà Nsi; a lo mbe mebwô ndù bo bèn nse' mbot'àm mbwe o, ke bag à bo ghù mo' nu lo. 20Tshen ben ni nsen ni tshob nukebwô ze bo yen me fàn, ngelaṅ me na' mbe netèt ntse'te ghatsho'te ntsha là. 21Mo' #Mfa' Gha. 23.6ndù mb'a b'a nda' men ntshob li me na' ntshob netèt bo ndù: A num nu nelo num vù ze bin tshwèt ntsho't'àm sènni là.

22Félix z'a na' ndèn nu kua' mebwô mfà num nu Yésu là, lé' ntsha, ntshob ndù: Ngelaṅ Lisia mfen ba soyé nsi se' là kà me ndôte zin ntsha. 23A tshob tà ba soyé ndù a lo' Paulo ndé' ndàtsha, là ke ghùtni ke bèn nto' tse ben ndù kà bo se' ndôt'é.

24Tsemo' lé'njù lo be tshùa, Félix mba nzwi i Drusila, ngon Yuda se', ntum bo nèn ntsiaṅ Paulo num neju' mba Paulo tshob nu mfà num bamntù num Kristô Yésu là. 25Là mba Paulo ke ntshob nu num nunetsine, num nu nebe mèn, mba num netsho'te ntsha z'a nsi se' là, Félix bwôg, ntshob yi ndù: Ndonni nène, m'a' bèn ntsiaṅ o ngelaṅ me fon lé'njù là. 26A lo ke nywinte ndù Paulo a' fà nkàb yi; a ndùlala bèn ngù k'a nke ntsiaṅ i netshobte bo yi njoṅ ngelaṅ fa.

27Ngu'njù bàa lo be tshùa, Pôrkiô Fèstô jù ndà Félix, là Félix faṅ Paulo ndàtsha, nummbe a lo ke ndiag nebe mèn mebwô mbwe ba Yuda.

Currently Selected:

Mfa' Ghantum 24: BMa

Highlight

Copy