Mfa' Ghantum 23

1Paulo te miag num ntse'te ghatsho'te ntsha, ntshob ndù: Fèt tshàm, nzentù àm ze mebwô tshwèt nsoṅ àm ndù me zin mbwe Nsi mba ménla' là tà nkum sènni. 2Là ngale'te Nsi ze ndùb, lén se Anania tshob ben tse bo be mbaṅ Paulo là ndù bo lab ntshu i. 3Ndùlala #Mat. 23.27-28Paulo tshob yi ndù: Kumba' ze bo se' mbem nà, Nsi a' lab o! O tswe nke ndiag netsho't'àm ntshùa num ntshù', o tshwèt mbagte ntshù', nummbe o tshob ndù bo lab àm. 4Ben tse bo be bwe là tshob ndù: O ke nso ndon à tu ngale'te Nsi ze ndùb! 5Paulo #Netu. 22.28tshob ndù: Fèt tshàm, me lo ke lèn ndù a b'a ngale'te Nsi ze ndùb; nummbe bo lo kite ndù: O ke nsi tshob nukebwô num nkam ngô o.

6Paulo #Mfa' Gha. 26.5; Fili. 3.5be lèn ndù ntse'te ghatsho'te ntsha ghù benntùn bag bàa, bag ba Sadukai mba bag ba Férésia, nkua'a, ntshob netèt bo ndù: Fèt tshàm, me b'a mèn num bag ba Férésia, mbe mèn ba Férésia. Bo ke ntsho't'àm à num nenywinte mba num nelo benntùn num vù. 7Men ntshob li kag tantshu netèt ba Férésia mba ba Sadukai, ntse'te ghabte bag bàa. 8Nummbe #Mat. 22.23; Mark. 12.18; Luk. 20.27ba Sadukai num ntshob ndù nelo num vù ke' be, Angél mba Ywèt ke be, là ba Férésia num mbam njoṅ tshen nà fa. 9Tshu'te ndùb vù netèt bo, tsemo' ghalèn ṅwa'ni Nsi num bag ba Férésia lo tù, nta ntshu kua' neta, ntshob ndù: Bag ke' yen sàm nukebwô num yen mèn ni, là, a' be ndù Ywèt ke Angél lo tshob nu yi. 10Tantshu bèn nke nèn mbwe, mfen ba soyé bwôg ndù bo a' tsho'te Paulo mfémfé, ngù ba soyé swe', nsô i netèt bo, ndo' i mbèn yi ndà ba soyé.

11A be tèttswe', Tshùaben ṅwag, ntshob Paulo ndù: Fèn ntù, mb'o à kwé nta màm Yérusalém nà, a bwô ndù o bèn nkwé nta màm mba Roma.

Mba ba Yuda tsin tsham nezwi Paulo là

12Njù be làne, ba Yuda tsin tsham, nkàn mfe num tu wut tshob ntshob ndù: Ndon tsho tu bo, a be ze bo jù, mbèn nu ke be ndù bo zwi Paulo là. 13Ben tse bo tsin tsham nà lo tôg benntùn ṅam nkuà. 14Bo nèn ntèt ghale'te Nsi tse ndùbndùb mba ghakwé mbwe, ntshob bo ndù: Bag kàn mfe, nso ndon num tu wut tshag ndù bag ke yab ju ntshu bag ke be ndù bag zwi Paulo. 15Bin à ntse'te ghatsho'te ntsha be ntshu ntshù' mbètte mfen ba soyé ndù a fà i bin, mba bin nekwé i nelôte tun ntsha i kua' mebwô là; ndùlala bag a' zwi i a ke yoṅ nkum nsen ni, bag à nabte njoṅ nu fa.

16Là mén ngomna Paulo lèn nu sen ywi' là, nèn ndà ba soyé, nsoṅ Paulo yen nu là. 17Paulo tsiaṅ mo' tà ba soyé, ntshob yi ndù: Nèn bin yen ménnshum ni mbwe mfen ba soyé, nummbe a ghù nu netshob yi.

18A lo' i bo yi nèn mbaṅ mfen ba soyé, a tshob ndù: Ngandàtsha Paulo tsiaṅ àm nde't'àm ndù me lo' ménnshum ni z'a ghù nu netshob wù là, nse' mfà wù. 19Mfen ba soyé tshùb bu ménnshum nà, mbènte bo yi njam, mbètt'é ndù: Ke z'o ghù netshob m'à?

20A bùnte ndù: Ba Yuda nabte netèt bo nele't'o ndù ndamnjù o lo' Paulo nèn yi mbwe ntse'te ghatsho'te ntsha mba bo nekwé i nelôte tun ntsha i kua' mebwô là. 21Là bam nà neju' ntshu yube! Ben ṅam nkuà kà ntôg netèt bo bùn i ywi', bo kàn mfe num tu wut tshob ndù ndon tsho tu bo, a be ze bo jù mbèn nu ke be ndù bo zwi Paulo là; bo à nabte njoṅ nu fa, bo ke ntù' béb, a be z'o bam nà.

22Mfen ba soyé lé'te ménnshum nà, ntshob yi ndù: Kà ghù sàm mèn lèn ndù o soṅ àm yen nu là.

Mba bo tshag Paulo Késaréa là

23A tsiaṅ tsemo' tà ba soyé, ntshob ndù: Bin nabte soyé nkù bàa, ghako' nyàmna' ṅam sammbàa mba ghama' nkô nkù bàa, bin nèn Késaréa neto' nyam bwe'e tèttswe', 24mbèn nabte mba ba nyàm tse Paulo nsi ko' bwe là ndù bin lo' i nèn mfà ngomna Félix be kua' mebwô. 25A kite yen ṅwa'ni li ngomna ndù: 26Klaudia Lisia num ngomna ndùb Félix, me tsha't'o!

27Yen mèn ni ba Yuda lo tshùb i, nke ndiag nezwi i, me se' bag à soyé nkwé i ngelaṅ me ju' ndù a b'a ze Roma là. 28Me diag nelèn nu ze bo bot'é num bwe là, ngù bo lo' i nèn yi mbwe ntse'te ghatsho'te ntsha. 29Me yen ndù bo na' mbot'é à num nu tantshu mfà num ntshù' yub, là mo' sàm ju neghù ndù bo zwi i ke nema' i tsha lo ke be. 30Ngelaṅ bo soṅ àm ndù ba Yuda bùn i ywi' là, be ndùse kà me njoṅ ntum i wù. Me bèn ntshob ben tse bo bot'é là ndù bo lo' ntsha nse' ntèl o yi.

31Ba soyé lo' Paulo mba bo lo ntshob bo là, nèn tèttswe' nte i Antipatri. 32Njù làn, bo faṅ i boa ghako' nyàm, nène; ba soyé bèn njam ndà bo. 33Ghako' nyàm kum Késaréa, mfà ṅwa'ni ngomna, nte Paulo mbwe i. 34Ngelaṅ a miagte nesiaṅ ṅwa'ni là, a bètte Paulo bag ngô z'a be mèn bwe là; mbe ju' ndù a b'a ze Kilikia, 35ntshob ndù: M'a' bètt'o nu ngelaṅ ze ben tse bo bot'o se' là. A tshob bo lé' i ntùm ntshwèt Hèrodé na' nkut là.

Currently Selected:

Mfa' Ghantum 23: BMa

Highlight

Copy