Mfa' Ghantum 15

Ntse'te Yérusalém

1Tsemo' #Lev. 12.3benntùn fe Yudéa, nse' Antiôkia, ntswite fètfèt, ntshob ndù: A be ze bin ke' si ket mb'a be ntùm ntshù' Mosé là, mba bin ke' ku'ni neyôge. 2Yen nu là kam ntanta, Paulo ta ntshu bo à bo kua' neshu, bo nabte ndù Paulo mba Barnaba ko' nèn Yérusalém boa tsemo' fètfèle, njen ghantum mba ghakwé mbwe num yen nu tantshu là. 3Ntse'te benkristô te yub num manze, bo tshùa ntùm ngô Fénikia mba Samaria, nke nsoṅ mba ghakelèn Nsi kaṅ ntù tshob là, ngù tsiaṅte ndùb dun ntùm ntù fètfèle.

4Bo kum Yérusalém, ntse'te benkristô, ghantum mba ghakwé mbwe lo' yub kua' mebwô; bo soṅ njoṅ tshu fa tse Nsi ghù bo à bo là. 5Là tsemo' ben netèt bag ba Férésia, tshen nà tse bo bam Yésu là, lo tù, ntshob ndù: A lo bwô bo si ket, bèn nànte yub ndù bo ke nze ntshù' Mosé.

6Ghantum mba ghakwé mbwe tse'te nelôte yen nu là. 7Mba #Mfa' Gha. 10.1-43bo ke nta ntshu nèn be mbwe là, Pétro lo tù, ntshob ndù: Fèt tshàm, bin lèn netsho' Nsi z'a tôg netèt bin fe num ngelaṅ mbwe là, Nsi lo ghù ghakelèn Nsi tshùa num ntshu àm, nju' nkùn mebwô, mbame. 8Nsi #Mfa' Gha. 2.4; 10.44z'a lèn ntù benntùn nà lo kwé nta mube, mfà Ywèt Nelàn bo ndaṅndaṅ mba be là. 9Netèt bo mba be là, Nsi lo ke ghù sàm fagte; njam bamntù, a lo lànte ntù tshobe. 10Numke bin nke ndaṅte Nsi ndonni, nke ma' kele' se tà be mba be na' mbe ke ku' neket là tô ghabam Yésu à? 11Là be num mbam ndù be yôg njam kondèn Tshùaben Yésu ndaṅndaṅ mba bo yub là.

12Njoṅ benntùn fa mi', nju' mba Barnaba mba Paulo soṅ nu nsà mba tshu netshàm tse Nsi na' ngù netèt ghakelèn Nsi njam bo là.

13Ngelaṅ bo miagte netshob là, Yakobo lo tù, mbùnte ndù: Fèt tshàm, bin ju' àm. 14Siméon tote mba Nsi na' nèn ndôte ghakelèn Nsi fe ngelaṅ mbwe, ntsho' mo' nzwit mènntùn netèt bo ndù a ke ngamte lén se là. 15Yen ni b'a ntshu ntshù' bo ntshob ghatshob ntshob Nsi ndaṅndaṅ mba bo kite ndù:

16Yen #Am. 9.11-12nà be tshùa, me bèn nse' mbù'te

ntàb David z'a na' ngwù là,

m'a' tsiagte tse i, mbèn nkul i,

17ndù mbwe' benntùn bo tù' là mba ghakelèn Nsi

tse bo tshob lén sàm bo là diag Tshùaben.

18A b'a ju ze Tshùaben tshob là.

A ghù tshen tshu là tse be lèn fe ngu'ngu' là bumte.

19Ndùlala, me tshob ndù a ke' bwô nefà ngùtni ghakelèn Nsi tse bo tshwèt nkaṅ ntù tshob ntam njam Nsi là, 20là #Netu. 34.15-17; Lev. 17.10-16; 18.6-23be kite bo ndù bo tshùb wut tshob num nu ṅu' nsi neto, nekale, nefèt mbàb nyàm bo ke' wat nsô lem tse là, nenu lem. 21Fe tà mbwe, ntùm njoṅ zwiaṅ benntùn fa, Mosé lo ghù ghatshob nu i, nummbe bo be nsiaṅ i njoṅ lé'njù Sabbat fa ntùm sinagogue.

22Ndùlala, ghantum, ghakwé mbwe boa njoṅ ntse'te benkristô fa yen ndù a bwô netsho' tsemo' ben netèt bo, ntum yub Antiôkia boa Paulo mba Barnaba. A na' mb'a Yuda ze mo' lén se be Barsaba là mba Silas; bo na' mb'a ghatshagte netèt fètfèle. 23Tshù ṅwa'ni bo tum bo li: Bag ghantum, ghakwé mbwe mba fètfèle, tsiaṅte be bin, me fètfèt tse bin tshwèt ntswe Antiôkia, Siria mba Kilikia ndù bin tum à netèt ghakelèn Nsi là. 24Bag ju' ndù tsemo' ben tum netèt bag nse' ntshu' tu tsine, nsobte ntù tsin ntshobe, ke be ndù bag tum yube. 25Ntùm ntshu ntshù', bag lo yen ndù a bwô netsho' benntùn, ntum yub bin, boa fèt tshag tse nkôni Barnaba mba Paulo, 26tshen ben ni tse bo bam vù num lén Tshùaben be Yésu Kristô là.

27Bag tum Yuda mba Silas bin, mba bo nsi soṅ zin njoṅ nu fa ntshu. 28Nummbe Ywèt Nelàn mba bag yen ndù a ke' bwô neyab lèt num bin k'a ke nda' tshen tshu li ts'a be tse neywimte là, tshù a li: 29Bin tshùb wut tsin num tshu tse bo ghamte nsi neto yi là, nenu lem, nefèt mbàb nyàm bo ke' wat nsô lem tse là, mba nekale. Bin zete num tshen ni, mba bin ghù mebwô! Bin tswe mebwô.

30Ghantum lé'te yub nswe' nèn Antiôkia, ntse'te njoṅ benkristô fa, mfà ṅwa'ni bo. 31Bo siaṅ, ntsiaṅte num ntshob fitentù mi a tum bwe là. 32Yuda mba Silas tse mba bo na' mb'a ghatshob ntshob Nsi là tshob nu yàm ndo' ntagte, mbèn nso neta yi ntù fètfèle. 33Bo tswe bwe tsemo' lé'njù, ndé'te fètfèt ntùm fite, mbèn njam mbaṅ ben tse bo na' ntum yub là. [ 34A bwô Silas neghô bwe.] 35Paulo mba Barnaba tù' Antiôkia, nke ntswite, mbèn nke ntshob ntshob Tshùaben boa tsemo' fètfèt yàme.

Mba Paulo fagte bo Barnaba là

36Tsemo' lé'njù lo be tshùa, Paulo tshob Barnaba ndù: Be bèn njam ndôte fètfèt ntùm njoṅ ngô fa dù' ze be na' ntshob ntshob Tshùaben nà, num neyen mat bo tswe yi là.

37Barnaba diag nelo' Yohané ze mo' lén se be Marko là. 38Là #Mfa' Gha. 13.13Paulo gha nelo' mèn z'a na' mfaṅ yub mà Pamfilia ke bèn nkô neke nzin mfa' fa' bo à bo là. 39Yen tantshu là fà yantù kà fagte tum netèt bo. Barnaba lo' Marko, ntsho kenu nèn Kiprô. 40Là Paulo tsho' Silas, fètfèt bètte kondèn Tshùaben num i, a nèn. 41A zin ntùm ngô Siria mba Kilikia, nke mfà neta njoṅ ntse'te benkristô fa.

Currently Selected:

Mfa' Ghantum 15: BMa

Highlight

Copy