Mfa' Ghantum 14

Paulo mba Barnaba mà Ikônia

1Mà Ikônia, Paulo mba Barnaba bèn ntsho ntùm sinagogue ba Yuda, ntshob nu bwe kà bwoṅ ba Yuda mba ba Grikia ju', mbame. 2Là ba Yuda tse bo be ke bam nu Yésu là, tènte ghakelèn Nsi, ngù ntù tshob ya num fètfèle. 3Bo bèn ntswe Ikônia yàme, nke ntshob ntshob Tshùaben ke bwôg, nummbe a lo ke nkwé nta ntshob kondèn i, nke mfà neta neghù nu nsà mba nu netshàm bo. 4Là bwoṅ benntùn ghabte bag bàa ntùm ngô, tsemo' be num ze bag ba Yuda, tsemo' be num ze ghantum.

5Ghakelèn Nsi, ba Yuda mba kamkam tshob tum, ndiag neghùtni yube, mbèn ntamte yub ndoṅ. 6Paulo mba Barnaba be yen yen nu là, nkù nèn Listra, Dèrbe mà Likaônia mba ntùm dù' ts'a ghebte bwe là; 7bo to' netshob nkùn mebwô bwe.

Neyate kekat mà Listra

8Mo' mèn lo be Listra ndù nku mi be'te, a be kekat fe bam màab ke to' yoṅ nzine. 9A lo tswe nsi, nke nju' mba Paulo tshwèt ntshob là. Mbe yen ndù a ghù bamntù z'a ku'ni neyat'é là, 10ntshob yi nze neta ndù: Lo tù, tsin tù ndaṅndaṅ num nku mu. A tsho' ketshat, nzine.

11Bwoṅ benntùn be yen nu ze Paulo ghù là, ntshob kua' mà neta ntùm ntshob Likaônia ndù: Ba nsi kaṅ ntù' benntùn, nswe' nse' netèt be. 12Bo tsiaṅ Barnaba ndù Zeus, ntsiaṅ Paulo ndù Hèrmès, nummbe a b'a yi na' mbèn nke ntshob nu. 13Ngale'te Nsi Zeus ze ndà i na' mbe ntshu mbu' ngô là, lo' ba mfô nse' yi mbwe nzendà ndùb ndù bo taṅte nsàmtù num bo, nke ndiag ndù boa bwoṅ benntùn lo' ngamte yub yi. 14Ghantum, Barnaba mba Paulo be ju' yen nu là, mfagte nzwe tshobe, nkù nde, ntsho netèt benntùn, nkua' neta.

15Ntshob #Netu. 20.11; Yobk. 146.6ndù: Shun tshag, numke bin nke ngù tshen tshu l'à? Mba bag yag b'a benntùn ghayennge' mba bin nà. Bag ke ntshob à nkùn mebwô z'a tshwèt ntshob bin ndù bin ghua' tshen tshu banban nà, nkaṅ ntù tsin, ntam njam Nsi z'a be ntùn nà, yi z'a na' nabte kamànyam, tsha'a, dibantse mba njoṅ tshu fa ts'a be ntùm bwe là. 16Ntùm zwiaṅ njù ts'a tôg là, Nsi lo faṅ ghakelèn Nsi nke nzin ntùm manze tse ntù tshob kô là, 17mba ndùlala, a ke be tag ke kwé nta tu wul i ntshùa njam numebwô tse, nke mfà mbaṅ kamànyam mba ndùsàn bin, nke ngù ntù tsin ndun jujù mba tsiaṅte.

18Bo tshob ndùlala, nto' yub ndù kà bo ghamte yube, là njen nge' yàm neto' yube. 19Là tsemo' ba Yuda lo Antiôkia mba Ikônia, nse' mbagte tu bwoṅ benntùn, ntamte Paulo ndoṅ, nsoṅ i, ma' njam ngô, nke nkwate ndù a kwù. 20Là mba ghabam Yésu se' ndiaṅ i mbum nà, Paulo lo nsi ntsho ntùm ngô. Njù be làne, bo Barnaba lo, nèn Dèrbe.

Mba Paulo mba Barnaba bèn njam Antiôkia mà Siria là

21Ngelaṅ bo tshob nkùn mebwô ntùm yen ngô li kà benntùn yàm tù' ghazi'te nu Kristô là, bo bèn njam Listra, Ikônia mba Antiôkia, 22nke mfite ntù benkristô, ntagte yub ndù bo ghô ntùm bamntù, mbèn nke ntshob ndù: Be nsi tshùa à ntùm nge' yàm kà tsho ntùm nufen Nsi. 23Bo ghù bo tsho' ghakwé mbwe mba netèt zit ntse'te benkristô lo, nde'te Nsi, ntswe nziku'u, ndem yub ntùm mbu Tshùaben ze bo na' mbam i là. 24Bo tshùa mà ngô Pisidia nèn mà Pamfilia. 25Ngelaṅ bo tshob ntshob Nsi Pèrgé là, bo lo, nèn mà Atalia, 26ndo bwe, ntsho kenu nèn Antiôkia dù' ze bo na' mbètte kondèn Nsi num bo kà bo nèn tshwèt fa' se bo fe neghù a bumte là. 27Bo be kume, ntse'te ntse'te benkristô, nto' nesoṅ njoṅ tshu fa tse Nsi ghù bo à bo là, mba mba Nsi gha' nze bamntù ghakelèn Nsi là. 28Bo tswe boa ghazi'te nu Yésu ngelaṅ yàme.

Currently Selected:

Mfa' Ghantum 14: BMa

Highlight

Copy