Mfa' Ghantum 13

Netum Saulo mba Barnaba

(Gal. 2.7-9; Mfa' Gha. 14.26,27; 2 Tim. 3.8,9)

1Netèt ntse'te benkristô Antiôkia, ghatshob ntshob Nsi mba ghatswite lo be bwe: Barnaba, Simon ze bo num ntsiaṅ i Niger là, Lukiô ze Kiréné, Manahèm ze bo kwiagt'é bo mfen Hèrodé là, mba Saulo. 2Ngelaṅ bo ke mfa' fa' Tshùaben, mbèn nke ntswe nziku' là, Ywèt Nelàn tshob bo ndù: Bin sô Barnaba mba Saulo, njab me num fa' se me na' ntsiaṅ yub bwe là. 3Bo be miagte netswe nziku'u, mba nele'te Nsi, njab mbu num bo, ndé'te yub bo nèn.

Saulo mba Barnaba mà Kiprô

4Bo tse Ywèt Nelàn na' ntum yub là swe' nèn mà Selekia, ntsho kenu nèn Kiprô. 5Ngelaṅ bo kum Selekia là, bo to' netshob ntshob Nsi ntùm ba sinagogue ba Yuda. Bo lo ghù Yohané ngaywimte yube. 6Bo be miagte netshùa ntùm ngô tètntse, nkum Pafôs, njen mo' mén Yuda lén se Baryésu, ngaka, mbèn mbe ngatshob ntshob Nsi ze tatte. 7A lo be mbaṅ ngomna Sérgiô Paulo nkummèn. Yen ni ghù bo tsiaṅ Barnaba mba Saulo, a lo kô neju' ntshob Nsi. 8Là Elima ngaka, yen ni b'a mbagte tun lén se, nke ntshètte yube, ndiag neto' ngomna ndù k'a bam Yésu. 9Là Saulo ke Paulo lo dun Ywèt Nelàne, nte miag mi num i, ntshob yi ndù: 10Ngankùnkù mba ngatatte, mén Satan, ngakeban njoṅ nunetsin fa, o ke' ku' nefaṅ ke bèn nebagte manze Tshùaben ts'a b'a tse netsin nà ké? 11Tshù, be ndonni bu Tshùaben tshùb o, o nsi tù' mfùmiag, ke bèn neyen lagnyam num mo' ngelaṅ. Be ngelaṅ mbile, miag mi sènte, ntam njame; a to' nediaṅ dù' mbume, nèn bag bag, nke ndiag mèn z'a tshagt'é là. 12Ngomna be yen nu z'a tshùa là, nyàmte nu Tshùaben ze bo tswite là.

Ntshob Paulo Antiôkia mà Pisidia

13Paulo mba shun tse tsho kenu Pafôs, nèn Pèrgé mà Pamfilia. Là Yohané fagte bo à bo, mbèn njam Yérusalém. 14Mba bo là, bo lo Pèrgé nèn tà nkum Antiôkia mà Pisidia. A be lé'njù Sabbat bo tsho sinagogue, ntswe nsi. 15Bo be miagte nesiaṅ ntshù' mba ghatshob ntshob Nsi, ghalôte sinagogue tum bo tshob bo ndù: Fèt tshag, a be ze bin ghù memo' ntag nefà benntùn nà, bin tshob. 16Paulo lo tù, ma' bu i bo, ntshob ndù:

Bin ba Israél mba bin tse bin num mbwôg Nsi là, bin ju'u! 17Nsi #Netu. 1.7; 12.51tshen ba Israél li lo tsho' ba tà tshage, mbù'te yub ngelaṅ bo na' mbe ghùn ntùm ngô Egipto là, mbèn mbù' bu i, nsô yub yi bwe. 18Num #Nes. 14.34; Neb. 1.31kônkwa, a nke mfènte yub num ngu'njù ṅam nkuà, 19mbiagte #Neb. 7.1; Yosh. 14.1ngô sammbàa Kanaan, mfà tsha' tse bo mba ju ntsi' là, 20num #Ghasa'. 2.16; 1 Sam. 3.20nguan ngu'njù bon tàn nkù kuà. Yen nà be tshùa, a fà ghakeb ntsha bo tà nèn nkum ngelaṅ ngatshob ntshob Nsi Samuél. 21Yen #1 Sam. 8.5; 10.21ngelaṅ nà bo to' nebètte mfen, Nsi fà Saulo mén Kis ntùm tunndà Benjamin bo, a tô yub ngu'njù ṅam nkuà. 22Nsi #1 Sam. 13.14; 16.12; Yobk. 89.20be ghua' Saulo, tsho' David num fen, nkwé nta mi ntshob ndù: Me yen David mén Isaï, a mèn ze ntù àm kô là, a nsi ghù yàm nekô bumte. 23A ntùm nzwil i ze Nsi tsho' ngayôg Israél, Yésu, ndaṅndaṅ mb'a na' nka' là. 24Yohané #Mark. 1.4; Luk. 3.3lo bwôgmbwe nse'e, nke ntshob nu nekwéntse ze nekaṅ ntù njoṅ ba Israél fa. 25Yohané #Mat. 3.11; Mark. 1.7; Luk. 3.16; Yoha. 1.20,27lo be kum num ze miagte fa', nke ntshob ndù: Mèn ze bin num nkwate ndù me b'a yi là, me ke' b'a yi; tshù, mèn njam àm nse' ndù me ke' ku'ni neké'te mba nkù nketo' mi nku mi.

26Fèt tshàm, bon nzwit Abraham mba bin tse bin num mbwôg Nsi là, bo na' ntum ntshob sen yôg li à be. 27Mba ba Yérusalém mba kamkam tshob be ke lèn i là, bo tsho't'é, ndùlala bo ghù ntshob ghatshob ntshob Nsi mi bo num nsiaṅ lé'njù Sabbat là bumte. 28Mba #Mat. 27.22; Mark. 15.13-14; Luk. 23.21-23; Yoha. 19.15mba bo ke' yen sàm nu z'a ku'ni neghù ndù bo zwi i là, bo bètte Pilato ndù bo zwi i. 29Ngelaṅ #Mat. 27.57-61; Mark. 15.42-47; Luk. 23.50-56; Yoha. 19.38-42bo na' ngù njoṅ nu fa bo kite num i là bumte là, bo swe' fe i num fanta'tù njab ntùm mo' fi. 30Là Nsi bam i num vù. 31Ntùm #Mfa' Gha. 1.3lé'njù yàme, a nke ntswite wul i ben tse bo à bo lo Galiléa nko' nèn Yérusalém nà. Tshen ben ni bèn mbe tse ghakwénta ndonni netèt benntùn.

32Bag, bag ke nsoṅ zin à nkùn mebwô ndù nka'ni mi Nsi na' nka' ba tà be là, 33Nsi #Yobk. 2.7ghù a bumte num be bon tshobe, mbam Yésu num vù ndaṅndaṅ mba bo kite ntùm ṅwa'ni Yobkwi mbatte bàa là; O b'a Mén àm, me bwe o sènni. 34Nsi #Es. 55.3lo bam i num vù ndù k'a bi, a ju z'a num ntshob ndù: M'a' fà tshu nelàn David bin, ts'a b'a kua' tse nenùn nà. 35A #Yobk. 16.10ndùlala a bèn ntshob mo' dù' ndù: O ke nsi bam ndù Mén o ze nelàn bi.

36Nummbe David lo be miagte nefa' ze nekô Nsi num ze ngelaṅ, nkwù, bo bèn njab i mbaṅ ba tà tse, a bi. 37Là mèn ze Nsi bam i num vù là lo ke bi. 38Fèt tshàm, bin lèn ndù a tshùa njam i kà bag ntshob bin ndù Nsi lagte nukebwô tsine. 39A tshùa à njam i mèn z'a bam i là b'a mèn netsine, netsin ze ntshù' Mosé na' mbe ke ku'ni nefà bin nà.

40Bin bam nà ndù kà nu ze bo na' ntshob

ntùm ṅwa'ni ghatshob ntshob Nsi là tshùb zine.

41Bin #Hab. 1.5ghawag, bin lôte,

ntshàme, mbèn nsate,

nummbe me nsi fa' mo' fa' ntùm tsin lé'njù,

fa' se bin ke' ku'ni nebame,

a be ze mèn soṅ zin nà.

42Bo be tume, bo labte yub ndù bo bèn nzi nse' ntshob be tshen nu là bo mbatte lé'njù Sabbat. 43Ngelaṅ mbumte fagte là, tsemo' ba Yuda mba ben tse bo bam nu ba Yuda, nke ngamte Nsi là, tam njam Paulo mba Barnaba; bo à bo tshàm nu, bo tshùa bwe ntagte yub ndù bo ghô ntùm kondèn Nsi.

44A be num mbatte lé'njù Sabbat, njoṅ benntùn fa ntùm ngô tse'te num neju' ntshob Nsi. 45Là ba Yuda be yen yen bwoṅ benntùn nà, ghe'te dun ntùm ntù tshobe, bo to' nebagte ntshob Paulo, mbèn nke ntshabt'é. 46Paulo mba Barnaba tshob bo kua' ndaṅndaṅ ndù: A lo bwô ndù bag bwôgmbwe ntshob ntshob Nsi à bin; là mba bin tshwèt nga ntshob Nsi, nke ndo' wut tsin mba bin ku'ni num yôg matmat là, tshù, ndonni bag tù' nèn tshag tèl à ghakelèn Nsi, 47nummbe #Es. 42.6; 49.6tshù ju ze Tshùaben na' ntshob bag li:

Me lo yab o ndù o be nka' ghakelèn Nsi,

mbèn mbe yôg tà nèn nkum num ntôg tsha'a.

48Num men ntshob là, ghakelèn Nsi tsiaṅte, ngamte ntshob Tshùaben, mba ben tse Nsi tsho' yub num yôg matmat là bam.

49Ntshob Tshùaben sa ntùm njoṅ dù' fa. 50Là ba Yuda tènte bènnzwi ndùbndùb tse bo ke ngamte Nsi là mba kamkam ntùm ngô, bo kam ntsha; ntsho' nku Paulo mba Barnaba kebàn, nta' yub ntùm yub bag ngô. 51Bo #Mat. 10.14; Mark. 6.11; Luk. 9.5; 10.11bé'te mbab num nku mub num bo, ndo nèn mà Ikônia. 52Mbe se' mba ghazi'te nu Yésu là, tsiaṅte mba Ywèt Nelàn lo dun ntùm ntù tshobe.

Currently Selected:

Mfa' Ghantum 13: BMa

Highlight

Copy