Mfa' Ghantum 12

Mba bo ma' Pétro ndàtsha Angél sô i là

(Mfa' Gha. 5.17-24; Dan. 6.16-23; Es. 49.24,25; Apok. 2.10)

1Num yen ngelaṅ nà, mfen Hèrodé to' neghùtni tsemo' benntùn netèt ntse'te benkristô. 2A ghù bo wat Yakobo, mfèt Yohané; 3mbe yen ndù yen nu là bwô ba Yuda, ngù bo tshùb mba Pétro. A na' mb'a lé'njù Pasa. 4Ngelaṅ #Netu. 12.1-27bo tshùb i là, a ma' i ndàtsha, ngù tse soyé kuà ts'a ghù soyé kuà là nke mbéb i, nummbe a lo kô nete i mbwe ngô, ngelaṅ Pasa nsi tôg là. 5Ndùlala bo nke mbéb Pétro ntùm ndàtsha, là ntse'te benkristô nke nde'te Nsi num tu i ke bot.

6Là, a be tèttswe' ze njù ke ndàn Hèrodé kô nete i mbwe ngô là, Pétro nke nzi netèt soyé bàa ndù bo kul i nkù tùne, ghabéb dù' bàa be nzendà, nke mbéb ndàtsha. 7Tshù, mo' Angél Tshùaben ṅwag, mo' nka' nelàn dun ntùm ndàtsha. Angél labte nsa Pétro, ngù a bam. A tshob yi ndù: Lo tù ndende! Nkù tùn kebte mum mbu mi, ngwù nsi. 8Angél bèn ntshob yi ndù: Taṅ kob so, nso nketo' mo! Pétro ghù be ndaṅndaṅ. Angél bèn ntshob yi ndù: Ma' kummbaṅ so ntam njam àm!

9Pétro tum, ntam njam i ke yoṅ ndèn nenùn ju z'a tshwèt ngù njam Angél là, a kwate ndù a yen à njem. 10Bo tôg mbwe nzendà ze bo ke mbéb là, a gha' tu wul i mbwe bo. Bo tshùa, nèn nkum num manze; Angél faṅ Pétro be ndùse, nène. 11Pétro yôg ngom wul i, ntshob ndù: Me lèn ndonni kua' nenùn ndù Tshùaben lo ntum Angél i, mbèn nkwé àm mbu Hèrodé mba num nu ze ba Yuda ke mbéb neghù là.

12Ngelaṅ z'a lèn ndùlala là, a nèn ndà Maria mà Yohané, ze mo' lén se be Marko, dù' ze ben yàm tse'te bwe, nke nde'te Nsi là. 13Pétro se' nke'te nzendà; mo' ngafa' ze mènnzwi lén se Rôde, kù'te nse' nzwi'te, 14mbe lèn nze Pétro, ntsiaṅte neshu, ndagte mba netsho' nzendà yi, nkù nde mbèn njam, ntshob ndù: Pétro bèn nke nke'te. 15Bo tshob yi ndù: O b'a mbabune! A bèn ntshob ndù: A b'a nenùne. Bo tshob yi ndù: A b'a Angél i.

16Pétro bèn nke'te mo' yoṅ i, bo ghab nzendà, njen i, ntù yub tum. 17A ma'te bu bo ndù bo mi ntswe, nsoṅ yub mba Tshùaben na' ngù kà nsô i ndàtsha là. A bèn ntshob bo ndù: Bin tshob yen nu là Yakobo mba fètfèle. Mbe miagte ntum nèn mo' dù' ghua.

18Njù be làne, nu tshùa ba soyé num nu z'a tum num Pétro là. 19Hèrodé z'a tum bo nèn ndiag Pétro ke yen i là, be miagte netôte ghabéb ndàtsha, ntshob bo zwi yube. A lo Yudéa, nèn Késaréa, ntswe bwe.

Vù Hèrodé

(Tànk. 16.18; Yobk. 37.35,36; Es. 51.7,8)

20Hèrodé lo ke mbàn ba Tiro mba ba Sidon neshu. Tshen ben ni tamte nse' ntshu yub boa Blastô ngabéb ndà mfen tù' ntshù'. Bo nèn ntèt Hèrodé mbètt'é fite, nummbe ngô yub ke njun yub jujù à ntùm ze ngô. 21Ntùm lé'njù se bo yab là, Hèrodé ma' tse nzwe fen num i, ntum nsém, ntswe num ko'fen, ntshob nu benntùn. 22Là benntùn kua' ntshob ndù: A b'a Nsi bèn nke ntshobe, a ke' b'a mènntùn! 23Là, be kua' ndùse, Angél Tshùaben lab i, nummbe a lo ke fà ghamte Nsi; mbé' fèl i, a kwù.

24Mba ndùlala, ntshob Nsi nke nèn be mbwe yàme. 25Barnaba mba Saulo be miagte fa' se bo tum yub bwe là, ndo Yérusalém, ndo' Yohané ze mo' lén se be Marko là, mbèn njam.

Currently Selected:

Mfa' Ghantum 12: BMa

Highlight

Copy